خەلق تورى ئۇيغۇرچە قانىلىنىڭ 14-فېۋرال بېيجىڭدىن بەرگەن خەۋىرى: (مۇخبىرلار دەي لەن، خۇ رېنبا) 12-فېۋرال سائەت 17دىن 19 مىنۇت ئۆتكەندە، شىنجاڭ ئۇيغۇر ئاپتونۇم رايونى خوتەن ۋىلايىتىنىڭ كېرىيە ناھىيەسىدە يۈز بەرگەن 7.3 بال يەر تەۋرەش ئاپىتى پارتىيە مەركىزىي كومىتېتى، پۈتۈن مەملىكەت خەلقىنىڭ دىققەت ئېتىبارىنى قوزغىدى. نۆۋەتتە، ھەر قايسى جايلار ئاپەتتىن قۇتقۇزۇش بۇيۇملىرىنى ئاپەت رايونىغا توشۇماقتا.
يەر تەۋرەش بىرقەدەر قاتتىق بولغان چىرا ناھىيەسى بوستان يېزىسى تۈگمەنبېشى كەنتى، ئاچچان كەنتلىرىدە خەنزۇچە «ئاپەتتىن قۇتقۇزۇش» دېگەن خەت بېسىلغان كۆك رەڭلىك لاپاسلار تىكلەندى، ئاپەت رايونىدىكى خەلق شۇ كۈنى كېچىسىلا ھۆكۈمەت ياساپ بەرگەن ئاپەتتىن قۇتقۇزۇش لاپاسلىرى ۋە مەكتەپلەرگە ئورۇنلاشتى، ئاپەتتىن قۇتقۇزۇش بۇيۇملىرى ئاپەت رايونىدىكى خەلققە تارقىتىپ بېرىلدى.
يەر تەۋرىگەندىن كېيىن، ج ك پ مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ مۇنۇلارنى كۆرسەتتى، ئۆلۈش-يارىلىنىش ۋە مال-مۈلۈك زىيىنىنى ئەڭ يۇقىرى چەكتە ئازايتىش كېرەك. يەر تەۋرەپ 20 مىنۇتتىن كېيىن، ج ك پ سىياسىي بىيۇروسىنىڭ ئەزاسى، ئاپتونۇم رايونلۇق پارتكومنىڭ شۇجىسى جاڭ چۈنشيەن ئاپەتتىن قۇتقۇزۇش خىزمىتىنى ئورۇنلاشتۇرۇپ، خەلق ئىشلىرى تارماقلىرىنىڭ ئاپەتتىن قۇتقۇزۇش ئۈچ دەرىجىلىك تاقابىل تۇرۇش لايىھەسىنى يولغا قويۇپ، خەلق ئاممىسىنىڭ ھاياتى ۋە بىخەتەرلىكىنى كاپالەتكە ئىگە قىلىشنى ئالدىنقى ئورۇنغا قويۇپ، ئاپەتكە ئۇچرىغان ئاممىنىڭ كىيىم-كېچەك، تاماق، داۋالىنىش، تۇرالغۇ مەسىلىسى كاپالەتكە ئىگە قىلىپ، ئەگەشمە ئاپەتنىڭ ئالدىنى ئېلىشنى تەلەپ قىلدى. (جۇڭگو مىللەتلەر تەرجىمە ئىدارىسى تەرجىمىسى)