«ئاتموسفېرا بۇلغىنىشىنىڭ ئالدىنى ئېلىش ۋە ئۇنى تۈزەش ھەرىكەت پىلانى» ئېلان قىلىندى
12-سېنتەبىر، گوۋۇيۈەن «ئاتموسفېرا بۇلغىنىشىنىڭ ئالدىنى ئېلىش ۋە ئۇنى تۈزەش ھەرىكەت پىلانى»نى ئېلان قىلىپ، بۇلغىما قويۇپ بېرىشنى ئازايتىش، كەسىپ قۇرۇلمىسىنى تەڭشەش ۋە ئەلالاشتۇرۇش، پۈتۈن خەلقنى ئىشتراك قىلىشقا سەپەرۋەر قىلىش قاتارلىق 10 تەرەپنى چىقىش قىلغان ھالدا 35 تەدبىرنى ئوتتۇرىغا قويۇپ، 2017-يىلىدىن بۇرۇن ئاتموسفېرا بۇلغىنىشىنىڭ ئالدىنى ئېلىش ۋە ئۇنى تۈزەشكە قارىتا تەپسىلىي «تۈزەش لايىھەسى»نى چىقاردى. مەركەز مالىيەسى يەنە 5 مىليارد يۈەن مەبلەغ ئورۇنلاشتۇرۇپ، تۇمان ئېغىر بولغان بېيجىڭ، تيەنجىن، خېبېي، ئىچكى موڭغۇل، شەنشى، شەندۇڭ قاتارلىق ئالتە ئۆلكە ۋە بىۋاسىتە قاراشلىق شەھەردىكى ئاتموسفېرا بۇلغىنىشىنىڭ ئالدىنى ئېلىش ۋە ئۇنى تۈزەشكە ئىشلىتىشنى قارار قىلدى. بۇ يىلدىن بۇيان، مەملىكەت بويىچە ئوتتۇرىچە تۇمانلىق كۈن سانى 29.9 كۈنگە يېتىپ، ئىلگىرىكى يىللاردىكى ئوخشاش مەزگىلدىكىدىن 10.3 كۈن كۆپ بولۇپ، 1961-يىلىدىن بۇيانقى تارىختىكى ئوخشاش مەزگىلدىكى ئەڭ يۇقىرى چەككە يەتكەن. ھاۋانىڭ بۇلغىنىش ۋەزىيىتى جىددىيلىشىپ، جەمئىيەتتىكى ھەر ساھەنىڭ يۈكسەك دىققىتىنى قوزغىغان، ئاتموسفېرا بۇلغىنىشىنىڭ ئالدىنى ئېلىش ۋە ئۇنى تۈزەش ھەر دەرىجىلىك ھۆكۈمەتلەرنىڭ ئەمەلىي ھەرىكىتىگە ئايلاندى.