ئۆزبېكىستان زۇڭتۇڭىنىڭ چىرايلىق قىزى گۈلنارە.
تەيۋەندە چىقىدىغان «جۇڭگو گېزىتى»نىڭ خەۋىرىدە مۇنداق دېيىلدى: تولا ئاڭلاپ ياد بولۇپ كەتكەن كىنولاردىكىدەك ۋەقە ئوتتۇرا ئاسىيادىكى ئۆزبېكىستاندا يۈز بەردى. 75 ياشلىق مۇستەبىت ئىسلام كەرىموفنىڭ چوڭ قىزى «تەختكە ۋارىسلىق قىلىشىم» بەرھەق دەپ ئويلاپ يۈرگەندە، مەخپىي ساقچىلار ئۇنىڭ ئۈستىدىن شىكايەت قىلدى. يېرىم يالىڭاچ سۈرەت بىلەن خىيانەتچىلىك جىنايى ئىسپاتلىرى قاچىلانغان ئارخىپنى كۆرگەن كەرىموف ئاچچىقىغا پايلىماي كۈلدان بىلەن يانفونىنى يەرگە چۆرۈۋەتتى، قىزىنى چاقىرىپ راسا تىللىغاندىن كېيىن يىغلاپ كەتتى. غەرب دۆلەتلىرى ئۆزبېكىستاننىڭ يۇقىرى قاتلىمىدىكى ھوقۇق تالىشىشنىڭ سىياسىي ئۆزگىرىشكە ئايلىنىپ كېتىپ، ئوتتۇرا ئاسىيا ۋەزىيىتىدە مۇقىمسىزلىق كەلتۈرۈپ چىقىرامدۇ-يوق دەپ دىققەت قىلماقتا.
كەرىموف ئۆزبېكىستاندا ھاكىممۇتلەق ھۆكۈمرانلىق يۈرگۈزگىلى 23 يىل بولغان بولسىمۇ، ھوقۇقنى چىڭ تۇتۇۋېلىۋاتىدۇ، چېكىنىشىدىن ھېچبىر دېرەك يوق، قارىغاندا ھوقۇق ئەۋلادمۇئەۋلاد مىراس قالىدىغان خانىدانلىق بەرپا قىلماقچىدەك تۇرىدۇ. «ئۆزبېكىستان مەلىكىسى» دەپ تەرىپلىنىۋاتقان گۈلنارە كۆپكە قادىر «ۋارىس مەلىكە»لىك ئوبرازىنى ساقلاپ كېلىۋاتقانلىقى ئۈچۈن دادىسىنىڭ ھوقۇقىغا ۋارىسلىق قىلىش ئېھتىمالى ئەڭ چوڭ دەپ قارالغانىدى، ئەمما يېقىندىن بۇيان ئەھۋالدا ئۆزگىرىش بولدى.