بۇ يىل 15-ئۆكتەبىر دۇنيا مۇسۇلمانلىرىنىڭ يىلدا بىر كېلىدىغان قۇربان ھېيت كۈنى. شۇ مۇناسىۋەت بىلەن 13-ئۆكتەبىر چۈشتىن كېيىن، بېيجىڭدىكى ھەر ساھە، ھەر كەسىپلەردە خىزمەت قىلىۋاتقان 800 دىن ئارتۇق ئۇيغۇر قېرىنداشلار مەركىزىي مىللەتلەر ئۇنىۋېرسىتېتى چوڭ زالىغا يىغىلىپ، ئەدەبىيات ـ سەنئەت پائالىيىتى ئۆتكۈزۈپ قۇربان ھېيتنى قۇتلۇقلىدى.
مەملىكەتلىك خەلق قۇرۇلتىيى دائىمىي كومىتېتىنىڭ مۇئاۋىن باشلىقى، شىنجاڭ ئۇيغۇر ئاپتونوم رايونلۇق خەلق قۇرۇلتىيى دائىمىي كومىتېتىنىڭ مۇدىرى ئەركىن ئىمىرباقى، مەملىكەتلىك خەلق قۇرۇلتىيى دائىمىي كومىتېتىنىڭ سابىق مۇئاۋىن مۇدىرلىرىدىن ئىسمائىل ئەھمەد، تۆمۈر داۋامەت، ئىسمائىل تىلىۋالدى، مەملىكەتلىك سىياسىي كېڭەشنىڭ سابىق مۇئاۋىن رەئىسى ئابلەت ئابدۇرېشىت قاتارلىقلار تەبرىكنامە ئەۋەتىش قاتارلىق شەكىللەر ئارقىلىق كۆپچىلىكنىڭ قۇربان ھېيتىنى تەبرىكلىدى.مەملىكەتلىك خەلق قۇرۇلتىيى دائىمىي كومىتېتى مىللەتلەر ئىشلىرى كومىتېتىنىڭ مەخسۇس ۋەزىپىدىكى مۇئاۋىن مۇدىر ئەزاسى شۆھرەت زاكىر پائالىيەتكە قاتناشتى.
شىنجاڭ ۋە بېيجىڭدىكى داڭلىق سەنئەتكارلاردىن ئادىل مىجىت، گىتار شاھى ئەركىن، ئۆسمۈر چولپان ئارافات قاتارلىقلار ئېسىل سەنئەت نومۇرلىرىنى ئورۇنلاپ ھېيت شادلىقىنى يەنىمۇ يۇقىرى پەللىگە كۆتۈردى.
بۇ قېتىمقى پائالىيەتنى جۇڭگو ئۇيغۇر تارىخ-مەدەنىيەت تەتقىقات جەمئىيىتى، مەركىزىي مىللەتلەر ئۇنىۋېرسىتېتى بىرلىكتە ئۇيۇشتۇرغان.