ئەنگلىيە «كۈندىلىك پوچتا گېزىتى»نىڭ 10-ئىيۇل خەۋەر قىلىشىچە، ئامېرىكا تېكساس ئىشتاتىدىكى تەنگە گۈل چېكىش سەنئەتكارى Larry Da Leopard بەدىنىنىڭ ھەممە يېرىگە قاپلان تېرىسىدەك گۈل چېكىۋالغان بولۇپ، چېكىلگەن گۈل 1000 دىن ئاشىدىكەن، ھازىر ئۇ قارىماققا «يېرىم ياۋايى ئادەم»گىلا ئوخشايدىكەن.
لاررىينىڭ بىلەك، پۇت، دۈمبە، قۇلاقلىرىدا، ھەتتا ئەۋرىتىدىمۇ قاپلان گۈلى بار ئىكەن. بۇلارنى چېكىشكە نەچچە يىل ۋاقىت كېتىپتۇ، بىراق تېخىچە چېكىپ تۈگىتەلمەپتۇ. ئۇ بەزىدە ھەتتا قاپلان گۈللۈك كىيىم كىيىپ پائالىيەتلەرگە ئاشكارا قاتنىشىدىكەن، باشقىلار بىلەن خاتىرە سۈرەتكە چۈشىدىكەن. ئەلۋەتتە، بۇنداق قىلىشىمۇ ئۆز تىجارىتىنى كېڭەيتىش ئۈچۈن ئىكەن.