بېرما زۇڭتۇڭى ۋۇ دېين سېين بۇ يىلنىڭ ئاخىرىغىچە بارلىق سىياسىي جىنايەتچىلەرنى قويۇپ بېرىدىغانلىقىنى جاكارلىدى

2013.07.16 17:24   مەنبە: خەلق تورى

بېرما زۇڭتۇڭى ۋۇ دېين سېين

　　خەلق تورىنىڭ 16-ئىيۇل بېيجىڭدىن بەرگەن تېلېگراممىسى: ئەنگىلىيە رادىئو شېركىتى (BBC) تورىنىڭ خەۋەر قىلىشىچە، تۇنجى قېتىم ئەنگىلىيەدە رەسمىي زىيارەتتە بولغان بېرما زۇڭتۇڭى ۋۇ دېين سېين 15-ئىيۇل بۇ يىل يىل ئاخىرىغىچە بارلىق سىياسىي جىنايەتچىلەرنى قويۇپ بېرىدىغانلىقىنى بىلدۈردى.

　　ۋۇ دېين سېين لوندوندىكى بىر ئەقلىي ئامبار تەشكىلاتىدا نۇتۇق سۆزلىگەندە يىل ئاخىرىغىچە بېرمىدا ۋىجدان جىنايەتچىسى بولمايدۇ، بىر ئالاھىدە كومىتېت ھەربىر سىياسىي جىنايەتچىنىڭ دېلوسىنى كۆزدىن ئۆتكۈزۈۋاتىدۇ،دەپ بىلدۈرگەن.

　　ئۇنىڭدىن سىرت، ۋۇ دېين سېين يەنە بېرما ھۆكۈمىتىنىڭ ئالدىنقى ئايدا ئولۇسلار بىلەن تىنچلىق كېلىشىمى ئىمزالاپ، ئولۇس توقۇنۇشىنى تۈگەتكەنلىكىنى، كەلگۈسى نەچچە ھەپتە ئىچىدە پۈتۈن مەملىكەتتە ئۇرۇش ئوتىنى توختىتىپ، 60 يىل داۋام قىلغان ئولۇس توقۇنۇشىنى ئاخىرلاشتۇرۇشقا ئىشىنىدىغانلىقىنى بىلدۈردى.

　　ۋۇ دېين سېين بېرمىنىڭ سىرتقا بېقىنىپ قالغۇسى يوقلۇقىنى، ئۆزىگە تايىنىدىغانلىقىنى، پەقەت ئۆتكۈنچى مەزگىلدە خەلقئارا جەمئىيەتنىڭ ياردىمىگە موھتاج بولىدىغانلىقىنى كۆرسەتتى.

　　ۋۇ دېين سېين ھازىر 2 كۈنلۈك ئەنگىلىيە زىيارىتىدە بولۇۋاتىدۇ، ھەمدە، ئەنگىلىيەنىڭ باش ۋەزىرى كامېيرون بىلەن كۆرۈشۈپ، سودا ئىشلىرى، ياردەم ۋە دېموكراتىك تەرەققىيات قاتارلىق مەسىلىلەر ھەققىدە مۇھاكىمە ئېلىپ بارىدۇ.

　　كامېيرون بېرما زۇڭتۇڭىنىڭ كىشىلىك ھوقۇق جەھەتتە تېخىمۇ چوڭ ھەرىكەت قوللىنىشى زۆرۈرلۈكىنى، بېرمىدىكى روھىنىيە مىللىتى مۇسۇلمان ئازسانلىق مىللەتلىرىگە قىلىنىۋاتقان مۇئامىلىگە ئۆزىنىڭ «ئالاھىدە دىققەت» قىلىۋاتقانلىقىنى بىلدۈردى.

　　BBC نىڭ خەۋىرىدە دېيىلىشىچە، ئۆتكەن بىر يىلدا بېرمىدا كەم دېگەندىمۇ 200 ئادەم دىنىي زوراۋانلىقتا ئۆلۈپ كەتكەن، ئون مىڭلىغان ئادەم يۇرت-ماكانىدىن ئايرىلغان، ئۇنىڭ ئىچىدە كۆپ قىسىمى مۇسۇلمانلار ئىكەن.

　　مەنبە: خەلق تورى