سۈرەتتە: 11-ئاينىڭ 8-كۈنى، ئامېرىكا ۋېنتۇرا ناھىيەسىنىڭ توۋساند ئوكس شەھىرىدە، ساقچىلار ئوققا تۇتۇش ۋەقەسى يۈز بەرگەن قاۋاقخانا ئەتراپىدا ۋەزىپە ئىجرا قىلماقتا.
خەلق تورى ئۇيغۇرچە قانىلىنىڭ 9- نويابىر بېيجىڭدىن بەرگەن تېلېگراممىسى: ئامېرىكا كالىفورنىيە ئىشتاتىنىڭ جەنۇبىدىكى ۋېنتۇرا ناھىيەلىك ساقچى تەرەپنىڭ 8-چېسلا سەھەردە دېيىشىچە، 7-چېسلا كەچتە مەزكۇر ناھىيەدە يۈز بەرگەن ئوققا تۇتۇش ۋەقەسىدە، ئوققا تۇتقۇچى ۋە بىر ساقچىنى ئۆز ئىچىگە ئالغان ئاز دېگەندە 13 ئادەم ئۆلۈپ، يەنە ئاز دېگەندىمۇ 10 ئادەم يارىلانغان.
ۋېنتۇرا ناھىيەلىك ساقچى تەرەپ ئەمەلدارىنىڭ ئېيتىشىچە، شۇ يەر ۋاقتى 7-نويابىر كەچ سائەت 11دىن 20 مىنۇت ئەتراپىدا، بىر قوراللىق كىشى بۇ ناھىيەنىڭ توۋساند ئوكس شەھىرىدىكى بىر قاۋاقخانىغا كىرىپ، تۈتەك بومبىسى ئاتقان ھەمدە ئادەملەر توپىغا قارىتىپ ئوق چىقارغان. زور تۈركۈم ساقچىلار دەرھال نەق مەيدانغا يېتىپ كەلگەن ھەمدە جىنايەت گۇماندارى بىلەن ئېتىشقان، 29 يىل ساقچىلىق ئىستاژىغا ئىگە رون خېللۇس ئىسىملىك بىر ساقچى نەچچە ئوق تەگكەنلىك سەۋەبلىك، داۋالاش ئۈنۈم بەرمەي قازا قىلغان. بۇ قوراللىق كىشى ئارقىدىن ساقچىلار بىلەن ئېتىشىش داۋامىدا ئۆلگەن. ساقچىلار قوراللىق كىشىنىڭ سالاھىيىتى ۋە مۇددىئاسى قاتارلىق ئۇچۇرلارنى تېخى ئېلان قىلمىغان.
كۆرۈپ بېكىتكۈچى: ياسىن قادىر
مەنبە: خەلق تورى