خەلق تورى ئۇيغۇرچە قانىلىنىڭ 14-فېۋرال بېيجىڭدىن بەرگەن تېلېگراممىسى: 11-فېۋرالدىكى رۇسىيە خەلق ئاۋىياتسىيەسى ئايروپىلانىنىڭ ھادىسىگە ئۇچراش ۋەقەسىنى تەكشۈرۈشكە مەسئۇل رۇسىيە رازۋېدكا كومىتېتى 12-فېۋرال مۇنداق بىلدۈردى: دەسلەپكى تەكشۈرۈشكە قارىغاندا، ھادىسىگە ئۇچرىغان ئەن-148 تىپلىق يولۇچىلار ئايروپىلانى يەرگە چۈشۈپ كېتىپ پارتلاپ كەتكەن، ئايروپىلاننىڭ چېچىلىپ كەتكەن پارچىلىرىنىڭ چۈشۈش دائىرىسى 30 گېكتار (300 مىڭ كىۋادرات مېتىر) بولغان. ھادىسىگە ئۇچرىغان ئەن-148 تىپلىق يولۇچىلار ئايروپىلانى 11-فېۋرال چۈشتىن كېيىن موسكۋادىن رۇسىيەنىڭ شەرقىي جەنۇبىدىكى شەھەر ئورسكقا بارماقچى بولغان بولۇپ، ئايروپىلان يەردىن كۆتۈرۈلۈپ ئۇزاق ئۆتمەي، ئايرودۇرۇمدىن 35 كىلومېتىر يېراقلىقتىكى موسكۋانىڭ شەرقىي جەنۇبىدىكى سىتېفانوۋسكى كەنتىگە يېقىن بىر جايغا چۈشۈپ كەتكەن. ئايروپىلاندىكى ئالتە ئايروپىلان خادىمى ۋە 65 يولۇچىنىڭ ھەممىسى قازا قىلغان.
كۆرۈپ بېكىتكۈچى: ياسىن قادىر
مەنبە: خەلق تورى