خەلق تورى ئۇيغۇرچە قانىلىنىڭ 22-ئىيۇن بېيجىڭدىن بەرگەن تېلېگراممىسى: ئىراق ھەربىي تەرەپ 21-چېسلا: ئەسەبىي تەشكىلات «شام ئىسلام دۆلىتى» شۇ كۈنى موسۇل شەھىرىنىڭ كونا شەھەر رايونىغا جايلاشقان نۇرى مەسچىتىنى ۋە بۇ مەسچىتنىڭ مۇنارىنى پارتلىتىۋەتتى، دېدى.
ئىراق بىرلەشمە ھەرىكەت قوماندانلىق ئىشتابىنىڭ گېنېرال لېيتېنانتى ئابدۇللا ئامىر يالالا بىر باياناتىدا مۇنداق دېدى: ئىراق تېررورلۇققا قارشى تۇرۇش قىسىمى شۇ كۈنى موسۇل شەھىرىنىڭ كونا شەھەر رايونىدا داۋاملىق ئالغا ئىلگىرىلەپ، نۇرى مەسچىتىگە تەخمىنەن 50 مېتىر قالغاندا، «شام ئىسلام دۆلىتى» تېررورچىلىرى يەنە بىر تارىخىي جىنايەت ئۆتكۈزۈپ، نۇرى مەسچىتى ۋە ئۇزۇن تارىخقا ئىگە مەسچىت مۇنارىنى پارتلىتىۋەتتى.
نۇرى مەسچىتى 1172-يىلى سېلىنغان بولۇپ، تارىختا ئۇنىڭ ئاساسىي گەۋدىسى كۆپ قېتىم ۋەيران قىلىنغان، لېكىن بۇ مەسچىتنىڭ ئەزان ئېيتىش مۇنارى ساقلىنىپ قالغان.
نۇرى مەسچىتى موسۇل شەھىرىنىڭ بەلگە خاراكتېرلىك قۇرۇلۇشى بولۇپ، 2014-يىلى، ئەسەبىي تەشكىلاتنىڭ كاتتىبېشى باغدادى نۇرى مەسچىتىدە «شام ئىسلام دۆلىتى» قۇرۇلغانلىقىنى جاكارلىغان ئىدى.
ئىراق ھۆكۈمەت ئارمىيەسى 6-ئاينىڭ 18- كۈنى موسۇل شەھىرىنىڭ كونا شەھەر رايونىغا كۆپ تەرەپتىن ھۇجۇم قىلدى، نەچچە ئاي داۋاملاشقان موسۇل شەھىرىنىڭ غەربىي شەھەر رايونىدىكى ئۇرۇش ئاخىرقى باسقۇچقا كىردى.
كۆرۈپ بېكىتكۈچى: ياسىن قادىر
مەنبە: خەلق تورى