خەلق تورى ئۇيغۇرچە قانىلىنىڭ 30- دېكابىر بېيجىڭدىن بەرگەن تېلېگراممىسى: 12-ئاينىڭ 29-كۈنى، ئامېرىكا پايتەختى ۋاشىنگتوندا، ساقچىلار رۇسىيەنىڭ ئامېرىكىدا تۇرۇشلۇق ئەلچىخانىسىنىڭ سىرتىدا قاراۋۇللۇقتا تۇرماقتا.
ئامېرىكا زۇڭتۇڭى ئوباما 29-كۈنى، رۇسىيە تور ھۇجۇمى ئارقىلىق ئامېرىكا زۇڭتۇڭ سايلىمىغا ئارىلىشىشقا چېتىشلىق، دەپ گۇمان قىلغانلىقى ئۈچۈن، رۇسىيەگە جازا يۈرگۈزىدىغانلىقىنى، ئامېرىكا گوۋۇيۈەنى رۇسىيەنىڭ 35 نەپەر دىپلوماتىيە خادىمىنى قوغلاپ چىقىرىدىغانلىقىنى جاكارلىدى.
ئوباما شۇ كۈنى بىر تۈرلۈك مەمۇرىي بۇيرۇق ئېلان قىلىپ، رۇسىيە ئاخبارات باش ئىدارىسى بىلەن رۇسىيە فېدېراتسىيەسى بىخەتەرلىك ئىدارىسى قاتارلىق بەش رۇسىيە ئەمەلىي گەۋدە ئاپپاراتى ۋە رۇسىيە ئاخبارات باش ئىدارىسىنىڭ تۆت نەپەر يۇقىرى قاتلام ئەمەلدارىغا قارىتا جازالاشنى يولغا قويدى.
بۇنىڭدىن سىرت، ئامېرىكا گوۋۇيۈەنى 29-دېكابىر رۇسىيەنىڭ ئامېرىكىدا تۇرۇشلۇق باش ئەلچىخانىسى ۋە رۇسىيەنىڭ سان فىرانسېسكودا تۇرۇشلۇق كونسۇلخانىسىنىڭ 35 ئەمەلدارىنىڭ قارشى ئېلىنمايدىغان ئادەملەر ئىكەنلىكىنى، ئۇلارنىڭ يۈرۈش-تۇرۇشى بىلەن دىپلوماتىيە سالاھىيىتىنىڭ ئۇيغۇن كەلمەيدىغانلىقىنى، ئۇلار ۋە ئۇلارنىڭ ئائىلىسىدىكىلەرنى 72 سائەت ئىچىدە چېگرادىن چىقىپ كېتىشكە بۇيرۇغانلىقىنى ئېلان قىلدى. شۇنىڭ بىلەن بىر ۋاقىتتا، ئامېرىكا گوۋۇيۈەنى نيۇ يورك ئىشتاتى ۋە مارىلاند ئىشتاتىدىكى ئىككى جايدىكى رۇسىيە ھۆكۈمىتى ئىلكىدىكى ئۆي-مۈلۈكنىڭ تاقىلىدىغانلىقىنى جاكارلىدى.
كۆرۈپ بېكىتكۈچى: ياسىن قادىر
مەنبە: خەلق تورى