خەلق تورى ئۇيغۇرچە قانىلىنىڭ 24-نويابىر بېيجىڭدىن بەرگەن تېلېگراممىسى: كورېيە ۋە ياپونىيە ئىككى دۆلەت 23-نويابىر سېئۇلدا كورېيە- ياپونىيە «ھەربىي ئاخباراتنى قوغداش كېلىشىمى»نى رەسمىي ئىمزالىدى، كورېيەنىڭ ھاكىمىيەت سىرتىدىكى پارتىيەلەر ۋە كورېيە ئاممىسى بۇنىڭغا ئارقا-ئارقىدىن ئېتىراز بىلدۈردى.
كورېيە بىرلەشمە ئاگېنتلىقىنىڭ خەۋەر قىلىشىچە، شۇ كۈنى، كورېيە دۆلەت مۇداپىيە مىنىستىرى خەن مىنچيۇ ۋە ياپونىيەنىڭ كورېيەدە تۇرۇشلۇق باش ئەلچىسى ناگامىنى ئەنسېي ئايرىم-ئايرىم ئىككى دۆلەتكە ۋاكالىتەن كورېيە دۆلەت مۇداپىيە مىنسىتىرلىقى ئىشخانا بىناسىدا كېلىشىم ئىمزالىدغان. ئىككى تەرەپ يازما شەكىلدە ئۆزئارا ئومۇمىي ئۇقتۇرۇش قىلغاندىن كېيىن، كېلىشىم دەرھال كۈچكە ئىگە بولىدىكەن.
«ھەربىي ئاخباراتنى قوغداش كېلىشىمى» ئالاھىدە بەلگىلىك دۆلەتلەر ئارىسىدا ھەربىي ئىشلار مەخپىيەتلىكىدىن ھەمبەھىر بولۇش ئۈچۈن ئىمزالايدىغان كېلىشىم بولۇپ، بۇ قېتىملىق كېلىشىم مەخپىيەتلىكنى تەمىنلەش ئۇسۇلى، قوغداش پىرىنسىپى، يوق قىلىش ئۇسۇلى ۋە يوقىتىپ قويۇشقا بولغان قارشى تەدبىر قاتارلىق 21 تۈرلۈك ماددىغا چېتىلىدۇ، كېلىشىم ئىمزالانغاندىن كېيىن، كورېيە- ياپونىيە ئىككى تەرەپ ئامېرىكىدىن ھالقىپ، تېزلىكتە ئاخباراتلاردىن ھەمبەھىرلىنەلەيدۇ.
كۆرۈپ بېكىتكۈچى: ياسىن قادىر
مەنبە: خەلق تورى