شىنخۇا تورى، مېكسىكا شەھىرى، 12-ئىيۇل تېلېگراممىسى. مېكسىكا دۆلەت خەۋپسىزلىكى كومىتېتى شۇ جاي ۋاقتى 12-ئىيۇل سەھەردە دۇنيا بويىچە 1-نومۇرلۇق زەھەر ئەتكەسچىسى، مېكسىكىنىڭ سىنالوئا ئىشتاتىدىكى زەھەر ئەتكەسچىلىكى گۇرۇھىنىڭ كاتتىبېشى يوئاكۇئىن گۇزمان لوئېرانىڭ 11-ئىيۇل كەچتە مېكسىكىدىكى «ئېگىزلىك» فېدېراتسىيە تۈرمىسىدىن قېچىپ كەتكەنلىكىنى دەلىللىدى.
مېكسىكا دۆلەت خەۋپسىزلىكى كومىتېتىنىڭ خەۋىرىگە قارىغاندا، گۇزمان ئاخىرقى قېتىم 11-ئىيۇل كەچ سائەت 20دىن 52 مىنۇت ئۆتكەندە تۈرمىنىڭ نازارەت قىلىش سىنئالغۇسىدا كۆرۈنگەن. نازارەت قىلىش سىنئالغۇسىدا كۆرسىتىلىشىچە، ئۇ تۈرمىنىڭ 20-رايون 2-نومۇرلۇق كارىدورىدىكى مۇنچا رايونىغا كىرگەن، مۇنچا رايونى كۆرۈنمەس رايونغا تەۋە ئىكەن. گۇزمان نازارەت قىلىش سىنئالغۇسىدا ئۇزاق ۋاقىت كۆرۈنمىگەندىن كېيىن، تۈرمە ساقچىسى مۇنچىخانا ۋە كامېرغا كىرگەن، بۇ ۋاقىتتا گۇزمان ئاللىبۇرۇن قېچىپ كەتكەن.
گۇزماننىڭ تۈرمىدىن قاچقانلىقى دەلىللەنگەندىن كېيىن، تۈرمە ۋە مىكسىكا ساقچى تەرەپ دەرھال تۈرمىنىڭ ئەتراپىدىكى رايون ۋە مېكسىكا ئەتراپىدىكى ھەر قايسى ئىشتاتلارغا تۇتىشىدىغان يوللارنى قامال قىلدى ھەم تۈرمىگە ئەڭ يېقىن بولغان مېكسىكا تولۇكا ئايروپورتىدا ھەربىي ھالەت يۈرگۈزۈپ، ھەر قانداق ئۇچۇش پائالىيىتىنى چەكلىدى.
سۈرەتتە: «پاكىنەك» دەپ لەقىمى بار گۇزمان (سولدا)نىڭ 2014-يىل 2-ئاينىڭ 22-كۈنى مېكسىكا شەھىرىدىكى دېڭىز ئارمىيەسى ھەربىي ئايروپورتىدا ئەسكەرلەر تەرىپىدىن تۇتۇپ تۇرۇلغان ۋاقتىدىكى سۈرىتى. (شىنخۇا ئاگېنتلىقى)
مەنبە: خەلق تورى