ئامېرىكىنىڭ ئىراقتا تۇرۇشلۇق ئەلچىخانىسى
16-ئىيۇن ، ئامېرىكا زۇڭتۇڭى ئوباما ئامېرىكىنىڭ ئىراقتا تۇرۇشلۇق ئەلچىخانىسى ۋە بۇ يەردىكى خىزمەتچى خادىملارنىڭ بىخەتەرلىكى ئۈچۈن ، ئىراققا 275 نەپەر ھەربىي ئەۋەتىدىغانلىقىنى جاكارلىغان . بۇ 2011-يىلى ئامېرىكا ئىراقتىن ئەسكەر چېكىندۈرىدىغانلىقىنى جاكارلىغاندىن كېيىن ، تۇنجى قېتىم ئىراققا ئەسكەر كۆپەيتىشى ھېسابلىنىدىكەن .
نۆۋەتتە ، ئىراقتا 160 ئامېرىكا ئەسكىرى بار ، بۇنىڭ ئىچىدىكى 50 نەپىرى دېڭىز ئارمىيەسىنىڭ قۇرۇقلۇقتا جەڭ قىلغۇچى قىسمىدىن ، 100 نەپىرى قۇرۇقلۇق ئارمىيەسىدىن ئەۋەتىلگەن . بۇنىڭدىن باشقا ، يەنە 100 ئەسكەر ئىراقتىكى ئامېرىكا ئەسكەرلىرىگە ماسلىشىش ئۈچۈن ، ئىراققا قوشنا دۆلەتلەرگە ئەۋەتىلىدىغان بولۇپ ، ئوباما ئۇلارنى قاچان چېكىندۈرىدىغانلىقىنى ئاشكارىلىمىغان .
شۇنىڭ بىلەن بىر ۋاقىتتا ، ئامېرىكا دېڭىز ئارمىيەسى پارس قولتۇقىغىمۇ ‹‹ دېڭىز بۈركۈتى ›› ناملىق ئايروپىلان ۋە دېڭىز ئارمىيەسىنىڭ قۇرۇقلۇقتا جەڭ قىلغۇچى ئەسكەرلىرىنى ئېلىپ يۈرىدىغان ھەربىي پاراخوت ئورۇنلاشتۇرغان . بۇنىڭدىن بۇرۇن ، ئامېرىكا دۆلەت ئىشلىرى كاتىپى كېررى ئىراقتىكى رادېكال كۈچلەرنى توسۇش مەسىلىسى توغرىسىدا ئىران بىلەن مۇزاكىرە ئېلىپ بارىدىغانلىقىنى بىلدۈرگەن .
كېررى يەنە كەلگۈسى بىر نەچچە كۈندە ئامېرىكا ئارمىيەسىنىڭ ئۇچقۇچىسىز ئايروپىلان بىلەن ئىراقتىكى رادېكال ئۇنسۇرلارغا ھاۋا ھۇجۇمى قوزغايدىغانلىقىدىن بىشارەت بەرگەن . بىراق ، سەئۇدى ئەرەبىستان ئېنىق قىلىپ ئامېرىكىنىڭ قورال ئىشلىتىپ ، ئىراقنىڭ ئىچكى ئىشىغا ئارىلىشىشغا قارشى تۇرىدىغانلىقىنى بىلدۈرگەن . ئۇلار يەنە ئىراق ھۆكۈمىتىنى ‹‹ قوللانغان تەدبىرلىرى مەسىلىنى ھەل قىلالمايدۇ ›› دەپ ئەيىبلىگەن .
16-ئىيۇن ، ئىراقتىكى قوراللىق ئۇنسۇرلار ئىراقنىڭ شىمالىدىكى Taylormethod شەھىرىنى ئىگىلىۋالغان ، 200 مىڭ نوپۇسقا ئىگە بۇ شەھەر ئىراقنىڭ پايتەختىدىن سۇرىيەگە بارىدىغان مۇھىم يول ، شۇنداقلا سۈننىي ۋە شىئە مەزھەپتىكى مۇسۇلمانلار ئارىلاش ئولتۇراقلاشقان رايون بولۇپ ، بۇ رايوننى ئىگىلەش رادېكال ئۇنسۇرلارنىڭ داۋاملىق جەنۇبقا قاراپ ئىلگىرىلىشىگە پايدىلىق .