ئافغانىستان پايتەختى كابۇل ساقچى ئىدارىسىنىڭ باشلىقلىقىغا تەيىنلەنگەن تۇنجى ئايال ـــ جەمىلە باياز
خەلقئارا لىىنىيەسى خەۋىرى: ئەنگلىيە ‹‹كۈندىلىك پوچتا خەۋەرلىرى››نىڭ 15-يانۋاردىكى خەۋىرىگە قارىغاندا، ئافغانىستان ئىچكى ئىشلار مىنىستىرلىقى تۇنجى قېتىم بىر ئايالنى پايتەخت ساقچى ئىدارسىنىڭ باشلىقلىقىغا تەيىنلىگەن، بۇ نۇرغۇنلىغان ئاياللارنىڭ بىخەتەرلىك تارماقلىرىغا كىرىشكە بولغان قىزىقىشىنى قوزغىغان. نۆۋەتتە، ئافغانىستان ساقچى ئىدارىسىدىكى ئاياللارنىڭ سانى پەقەت بىر پىرسەنتكىلا يەتسىمۇ، ئەمما ئۇلار دائىم دېگۈدەك قوراللىق ئۇنسۇرلار، ھەتتا ئۇرۇق-تۇغقانلىرىنىڭ قوراللىق تەھىدىتىگە دۇچ كېلىدىكەن.
خەۋەرلەردە دېيىلىشىچە، جەمىلە باياز ئافغانىستاننىڭ پايتەختى كابۇلدا ساقچى ئىدارىسىنىڭ باشلىقى بولۇشتىن ئىلگىرى پايتەخت كابۇل ساقچى باش ئىشتابىنىڭ تەكشۈرۈش بۆلۈمىدە خىزمەت قىلغان بولۇپ، 25 يىللىق خىزمەت تەجرىبىسى باركەن.
جەمىلە ئۆزىنىڭ ‹‹ئېزىلگەن كىشىلەر›› ئۈچۈن مۇلازىمەت قىلىدىغانلىقىنى ئېتىراپ قىلىپ، بۇ قېتىمقى ۋەزىپىگە تەيىنلىنىشىم تېخىمۇ كۆپ ئاياللارنىڭ ساقچى تارماقلىرىغا كىرىشىگە تۈرتكە بولىدۇ، دەپ قارىغان.
ئەمما، خەۋەرلەردە دېيىلىشىچە، ئافغانىستاندىكى ئايال ساقچىلار ناھايىتى ئاسانلا قوراللىق ئۇنسۇرلارنىڭ ھۇجۇم نىشانى بولۇپ قالىدىكەن، ھەتتا نۇرغۇن قېتىم ئۇرۇق-تۇغقانلىرىنىڭ تەھدىتىگە ئۇچرىغان.