ئۈرۈمچى - سانجى تاموژنىسى سەككىز تۈرلۈك تەدبىر چىقىرىپ جۇڭگو - ياۋروپا نۆۋەتچى پويىزى يىغىلىش مەركىزىنىڭ تەرەققىياتىنى قوللىدى

　　ئۈرۈمچى - سانجى تاموژنىسى سەككىز تۈرلۈك تەدبىر چىقىرىپ

　　جۇڭگو - ياۋروپا نۆۋەتچى پويىزى يىغىلىش مەركىزىنىڭ تەرەققىياتىنى قوللىدى

　　شىنجاڭ گېزىتى پۈتۈن تاراتقۇ مۇخبىرى چېن چياڭۋېينىڭ ئۈرۈمچى تاموژنىسىدىن ئىگىلىشىچە، يېقىندا ئۈرۈمچى - سانجى تاموژنىسى ئۈرۈمچى خەلقئارا قۇرۇقلۇق پورت رايونى جۇڭگو - ياۋروپا نۆۋەتچى پويىزى يىغىلىش مەركىزىنىڭ تەرەققىياتىنى قوللايدىغان سەككىز تۈرلۈك تەدبىر چىقىرىپ، يۇقۇم مەزگىلىدە خەلقئارا كەسىپ زەنجىرى، تەمىنلەش زەنجىرىنىڭ راۋانلىقىغا ھەقىقىي كاپالەتلىك قىلغان.

　　بۇ سەككىز تۈرلۈك تەدبىر مۇنۇلارنى ئۆز ئىچىگە ئالىدۇ: جۇڭگو - ياۋروپا نۆۋەتچى پويىزىنىڭ تاموژنىدىن تېز ئۆتۈشىگە تۈرتكە بولۇش، مەلۇم قىلىش تەننەرخىنى ئازايتىش، ئىمپورت - ئېكسپورت ماللىرىنى تەكشۈرۈشنى ئەلالاشتۇرۇش، يىغىلىش مەركىزى قۇرۇلۇشىنى قوللاش، جۇڭگو - ياۋروپا نۆۋەتچى پويىزى تۈگۈن پورتى قۇرۇلۇشىنى قوللاش، يىغىلىش مەركىزىنىڭ كەسىپ دائىرىسىنى كېڭەيتىشىنى قوللاش، جۇڭگو - ياۋروپا نۆۋەتچى پويىزىنىڭ سودىنى قولايلاشتۇرۇش سەۋىيەسىنى ئۆستۈرۈش ۋە ياخشى تىجارەت - سودا مۇھىتى يارىتىش قاتارلىقلار.

　　7 - ئايدىن بۇيان، يۇقۇمنىڭ ئالدىنى ئېلىش - تىزگىنلەش خىزمىتىنى ياخشى ئىشلەش ئاساسىدا، ئۈرۈمچى - سانجى تاموژنىسى ئالاقىدار تەدبىرلەرنى پائال ئەمەلىيلەشتۈرۈپ، ئۈرۈمچى خەلقئارا قۇرۇقلۇق پورت رايونى جۇڭگو - ياۋروپا نۆۋەتچى پويىزى يىغىلىش مەركىزىدىكى جۇڭگو - ياۋروپا نۆۋەتچى پويىزلىرىنىڭ توشۇشىغا ھەقىقىي كاپالەتلىك قىلدى.

　　«بىز يەككە كۆزنەك ۋە ئالاقە تورى + تاموژنا سۇپىسىغا تايىنىپ، <يۈز كۆرۈشمەي> كەسىپنىڭ پۈتۈن جەريانىنى توردا تېز بېجىرىشنى ئىشقا ئاشۇرۇپ، جۇڭگو - ياۋروپا نۆۋەتچى پويىزى تاموژنىدىن ئۆتۈش مەخسۇس كۆزنىكى تەسىس قىلىپ، <سائەت 24×7> ئالدىن كېلىشىپ تاموژنىدىن ئۆتۈشنى ئەمەلىيلەشتۈرۈپ، يېشىل يول ئېچىش، نازارەت قىلىپ باشقۇرۇش شەكلىدە يېڭىلىق يارىتىش ئارقىلىق، نۆۋەتچى پويىز كەلگەن ھامان دەرھال تەكشۈرۈش، يۇقىرى ئۈنۈملۈك تەكشۈرۈپ ئۆتكۈزۈشنى ئىشقا ئاشۇردۇق» دېدى ئۈرۈمچى - سانجى تاموژنىسى نازارەت قىلىپ باشقۇرۇش 1 - بۆلۈمىنىڭ 4 - دەرىجىلىك مەسئۇلى زوۋ جياڭ.

　　بۇ يىلنىڭ ئالدىنقى يېرىم يىلىدا، ئۈرۈمچى - سانجى تاموژنىسى نازارەت قىلىپ باشقۇرغان چېگرادىن كىرىپ چىققان جۇڭگو - ياۋروپا نۆۋەتچى پويىزى جەمئىي 117، يۈك توشۇش مىقدارى 116 مىڭ 900 توننا، سودا سوممىسى 547 مىليون دوللار بولۇپ، بۇلتۇرقى ئوخشاش مەزگىلدىكىدىن ئايرىم - ئايرىم ھالدا ％7.34، ％20.75، ％11.3 ئاشتى.