جىڭ ناھىيەسى: قۇم دېڭىزى ئۈجمىلىككە ئايلاندى

　　جىڭ ناھىيەسىنىڭ ئۇلان دانداغاي قۇملۇقىدىكى 20 مىڭ مو ئۈجمە قۇملۇققا يېشىللىق ئاتا قىلىپلا قالماي، يەنە شۇ جايدىكى دېھقان-چارۋىچىلارنىڭ «تىللا تۆكۈلىدىغان دەرەخ»ىگە ئايلاندى.

　　6-ئاي كىرىشى بىلەن، ئۇلان دانداغاي قۇملۇقىنىڭ ئىچكىرىسىدە، جىنساڭۋەن بىيو پەن-تېخنىكا چەكلىك شىركىتى تېرىغان 20 مىڭ مو ئۈجمە ئۈزۈش مەزگىلىگە كىردى. ئەلى كامال بىلەن خوتۇنى بۇ يەرنىڭ كونا خىزمەتچىسى بولۇپ، بۇ يەردە ئىشلەۋاتقىنىغا سەككىز يىل بولغانىدى، ئۇ يېڭى كەلگەن چاغدىكى مەنزىرىنى ئەسلەپ مۇنداق دېدى: «يېڭى كەلگەندە، ھەر يىلى ئەتىيازدا بوران چىقىپ، ھەممە يەرنى قۇم بېسىپ كېتەتتى، يولدا ماڭساق كۆزىمىزنى ئاچالمايتتۇق، قۇملار ئۇرۇلۇپ يۈزىمىزنى ئاغرىتىۋېتەتتى. ھازىر مۇھىت بارغانسېرى ياخشىلاندى، ھاۋا ساپلاشتى، يازدىمۇ بەك قۇرۇق ئىسسىق بولۇپ كەتمەيدىغان بولدى.»

　　جىڭ ناھىيەسى ئاپتونوم رايونىمىزنىڭ قۇمدىن مۇداپىئەلىنىش، قۇمنى تىزگىنلەشتىكى نۇقتىلىق ناھىيەلەرنىڭ بىرى بولۇش سۈپىتى بىلەن، ئۇلان دانداغاي قۇملۇقىنى تىزگىنلەش يېڭى ئۇسۇلى ئۈستىدە پائال ئىزدەندى. 2013-يىلى بۇ ناھىيە سودىگەر چاقىرىش ئارقىلىق جىنساڭۋەن بىيو پەن-تېخنىكا چەكلىك شىركىتىنى كىرگۈزدى، بىر قاتار ئېتىبار بېرىش سىياسەتلىرىنىڭ قوللىشى بىلەن، بۇ كارخانا قۇملۇقتا ئۈجمە ئۆستۈرۈشكە باشلىدى.

　　قۇملۇقنىڭ مۇھىتى ناچار بولغاچقا، كۆچەت تىكىش ئاسان ئەمەس ئىدى. جىنساڭۋەن بىيو پەنـتېخنىكا چەكلىك شىركىتىنىڭ مەسئۇلى ليۇ جىفا كوللېكتىپنى باشلاپ، ئۈجمە تىكىش ئۈستىدە ئىزدەندى. نەچچە يىل ئىزدىنىش ئارقىلىق، ئۈجمە ئۆستۈرۈش كۆلىمى ئۈزلۈكسىز كېڭىيىپ، كارخانا ئۈجمە يوپۇرمىقى، ئۈجمىلەرنى چۆرىدەپ مەھسۇلاتنى ئىنچىكە پىششىقلاپ ئىشلەشكە باشلىدى.

　　قۇم دېڭىزى ئۈجمىلىككە ئايلاندى، ئۈجمىنىڭ مۇۋەپپەقىيەتلىك تىكىلىشى ئىقتىسادىي ئۈنۈم يارىتىپلا قالماي، ئۇلان دانداغاي قۇملۇقىنىمۇ بوستانلىققا ئايلاندۇردى.