خەلق تورى ئۇيغۇرچە قانىلىنىڭ 9-يانۋار بېيجىڭدىن بەرگەن تېلېگراممىسى: 7-يانۋار، مۇخبىرنىڭ ئاپتونوم رايونلۇق ساياھەت تەرەققىيات كومىتېتىدىن ئىگىلىنىشىچە، 2017-يىلى شىنجاڭ ساياھەتچىلىكىدە «يىللىق ساياھەتچى كۈتۈۋېلىش سانىنى 100 مىليون ئادەم قېتىمغا يەتكۈزۈش» نىشانى پىلاندىن ئاشۇرۇپ ئورۇنلانغان.
سانلىق مەلۇماتتا كۆرسىتىلىشىچە، 2017-يىلى 10-ئاينىڭ 5-كۈنىگىچە، شىنجاڭغا كەلگەن ساياھەتچى 100 مىليون 250 مىڭ ئادەم قېتىمغا يېتىپ، شۇ يىللىق نىشان مۇددەتتىن بۇرۇن ئورۇنلانغان. 100 مىليون ئادەم قېتىملىق چوڭ نىشاننى ئورۇندىغان شىنجاڭ ساياھەتچىلىكى ئىزىدا توختاپ قالماي، 2017-يىلى 11-ئاينىڭ 30-كۈنىگە قەدەر كۈتۈۋالغان ساياھەتچى 105 مىليون 619 مىڭ 100 ئادەم قېتىمغا يېتىپ، بۇلتۇرقى ئوخشاش مەزگىلدىكىدىن %32.41 ئاشقان. ساياھەت ئىستېمال قىممىتى 179 مىليارد 114 مىليون يۈەنگە يېتىپ، بۇلتۇرقى ئوخشاش مەزگىلدىكىدىن %27.27 ئېشىپ، كۈتۈۋېلىنغان ساياھەتچى ئومۇمىي سانى ۋە ساياھەت ئىستېمالى ئومۇمىي سوممىسىدا يېڭى رېكورت يارىتىلغان.
كىشىنى تېخىمۇ خۇشال قىلىدىغىنى شۇكى، شىنجاڭ ساياھەتچىلىكى يۇقىرى سۈرئەتتە تەرەققىي قىلىش بىلەن بىللە، پۈتۈن بىر يىلدا بىرمۇ زور بىخەتەرلىك ھادىسىسى كۆرۈلمەسلىك، بىرمۇ سۈپەتسىز ساياھەت مۇلازىمىتى ۋەقەسى بولماسلىق، بىرمۇ زور ئېكولوگىيەلىك مۇھىتنى بۇلغاش ۋەقەسى بولماسلىقنى ئەمەلگە ئاشۇردى. بۇ، ھەقىقىي مەنىدىكى ساغلام، بىخەتەر، تەرتىپلىك تەرەققىيات ھېسابلىنىدۇ.
كۆرۈپ بېكىتكۈچى: ياسىن قادىر
مەنبە: خەلق تورى