خەلق تورى ئۇيغۇرچە قانىلىنىڭ 19-ئىيۇن بېيجىڭدىن بەرگەن تېلېگراممىسى: 16-ئىيۇن، 10-نۆۋەتلىك جۇڭگو شىنجاڭ خەلقئارا كۆرۈم تېشى، خوتەن قاشتېشى نەپىس بۇيۇملىرى كۆرگەزمىسى شىنجاڭ خەلقئارا كۆرگەزمە مەركىزىدە ئېچىلدى.
10-نۆۋەتلىك جۇڭگو شىنجاڭ خەلقئارا كۆرۈم تېشى، خوتەن قاشتېشى نەپىس بۇيۇملىرى كۆرگەزمىسى ئېچىلىش ھارپىسىدا، 7-نۆۋەتلىك شىنجاڭ ھۆسنخەت، ھۈنەر-سەنئەت، يىغىپ ساقلانغان بۇيۇملار كۆرگەزمىسى، 4-نۆۋەتلىك شىنجاڭ خەلقئارا ئۈنچە-مەرۋايىت، زىننەت بۇيۇملىرى كۆرگەزمىسى، 3-نۆۋەتلىك شىنجاڭ رۇدا ياقۇت كۆرگەزمىسى، 2-نۆۋەتلىك مېتېئورىت تاشلىرىنى تونۇشتۇرۇش، چۈشەندۈرۈش مەملىكەتلىك كۆرگەزمىسى بىللە ئېچىلدى.
بۇ قېتىملىق كۆرگەزمىگە دۆلەت ئىچى ۋە سىرتىدىن كەلگەن 1200 دىن ئارتۇق سودىگەر، شىركەت-ئورۇنلار قاتناشتى. كۆرگەزمىگە قاتناشقان ھەر خىل ياقۇت، كۆرۈم تاش، ھۈنەر-سەنئەت بۇيۇملىرى قاتارلىق تاۋارلار 1000 خىلدىن ئاشتى، كۆرگەزمىگە قاتناشقان تۈرلەر ئۈنچە-مەرۋايىت، قاشتېشى، رۇدا تاش، مېتېئورىت تاش، كۆرۈم تاش، ھۆسىن خەت ۋە رەسىم، ئاسارئەتىقە، يىلتىز ئويما، ھۈنەر-سەنئەت بۇيۇملىرى، يىغىپ ساقلىنىدىغان بۇيۇملار قاتارلىقلارنى ئۆز ئىچىگە ئالىدۇ.
ئىگىلەشكە قارىغاندا، كۆرگەزمە جەريانىدا يەنە ھەقسىز باھالاش پائالىيىتى ئۆتكۈزۈلىدىكەن. شەھەر ئاھالىلىرى قولىدىكى ئۈنچە-مەرۋايىت، قاشتېشىنى كەسپىي ئاپپاراتلارغا ھەقسىز تەكشۈرتۈپ باھالىتىپ باقسا بولىدىكەن.
بۇ قېتىملىق كۆرگەزمە 25-ئىيۇن ئاخىرلىشىدىكەن.
كۆرۈپ بېكىتكۈچى: ياسىن قادىر
مەنبە: خەلق تورى