خەلق تورى ئۇيغۇرچە قانىلىنىڭ 8- ئۆكتەبىر بېيجىڭدىن بەرگەن تېلېگراممىسى: (ئىختىيارىي مۇخبرىمىز تۇرسۇن راخمان خەۋىرى ، فوتوسى) پوسكام ناھىيەسىدە ھازىرغىچە تولۇق مېۋىگە كىرگەن سەرخىك مول ھوسۇللۇق چىلانلىق باغ كۆلىمى 200 مىڭ موغا، ئۈلگە كۆرسىتىش رايونى چىلانلىق كۆلىمى 100 مىڭ موغا يېتىپ، چىلان بۇ ناھىيەدىكى دېھقانلارنڭ ئىقتىسادىي كىرىمىنى ئاشۇرۇپ، نامرتلىقتىن قۇتۇلۇشىدىكى كوزىر مەھسۇلات بولۇپ قالدى.
ئىگىلىنىشىچە، بۇ يىل پوسكام ناھىيەسىدە چىلان كۆچەتلىرىنىڭ تۈرلۈك پەرۋىشلىرى تەلەپ بويىچە ئوبدان ئىشلەنگەنلىكى ئۈچۈن، چىلانلار ئوبدان ئوخشاپ، چىلان ئومۇمى مەھسۇلات مىقدارىنىڭ 80 مىڭ توننىغا، مەھسۇلات قىممىتىنىڭ 800 مىليون يۈەندىن كۆپرەككە يېتىشى مۇقىملاشقان. مول ھوسۇل شادلىقىغا چۆمگەن دېھقانلار نۆۋەتتە ئۈرۈمچى، ئاقسۇ، قەشقەر، ئاتۇش قاتارلىق جايلاردىن كەلگەن چىلان سودىگەرلىرى بىلەن چىلان سودىسى كېلىشىمى ئىمزالاش بىلەن بىللە، چىلان يىغىۋېلىش، سېتىپ چىقىرىشنىڭ تۈرلۈك تەييارلىق خىزمەتلىرىنى پۇختا ئىشلىگەن.
سۈرەتتە: 7-ئۆكتەبىر، كۈيباغ يېزىسىنىڭ قەمبە كەنتىدىكى ئۈلگە كۆرسىتىش چىلانلىق بېغىدا تېخنىكىلار دېھقانلار بىلەن چىلاننىڭ سۈپىتىنى تەكشۈرمەكتە.
كۆرۈپ بېكىتكۈچى: ياسىن قادىر
مەنبە: خەلق تورى