- مۇھىم
- مەملىكەت
- شىنجاڭ
- خەلقئارا
ئاپتونوم رايون جۇڭگو تېلېگراف گۇرۇھ شىركىتى بىلەن 13 - بەش يىللىق ئىستراتېگىيەلىك ھەمكارلىق كېلىشىمى ئىمزالىدى
جۇڭگو تېلېگراف گۇرۇھ شىركىتى 30 مىليارد يۈەن مەبلەغ سېلىپ، شىنجاڭنىڭ ئۇچۇرلاشتۇرۇش قۇرۇلۇشىنى ئىلگىرى سۈرىدۇ
جاڭ چۈنشيەن ياڭ جيې ۋە ئۇنىڭ ھەمراھلىرى بىلەن كۆرۈشتى
2016.01.29 13:48 مەنبە: شىنجاڭ گېزىتى
ئاپتونوم رايونلۇق خەلق ھۆكۈمىتى 26 - يانۋار چۈشتىن كېيىن جۇڭگو تېلېگراف گۇرۇھ شىركىتى بىلەن ئۈرۈمچىدە 13 - بەش يىللىق ئىستراتېگىيەلىك ھەمكارلىق رامكا كېلىشىمى ئىمزالىدى. كەلگۈسى بەش يىلدا جۇڭگو تېلېگراف گۇرۇھى 30 مىليارد يۈەن مەبلەغ سېلىپ، شىنجاڭنىڭ ئۇچۇرلاشتۇرۇش قۇرۇلۇشىنى ئومۇميۈزلۈك ئىلگىرى سۈرىدۇ. ج ك پ مەركىزىي كومىتېتى سىياسىي بىيۇروسىنىڭ ئەزاسى، ئاپتونوم رايونلۇق پارتكومنىڭ شۇجىسى جاڭ چۈنشيەن شۇ كۈنى كېلىشىم ئىمزالاش مۇراسىمىغا كەلگەن جۇڭگو تېلېگراف گۇرۇھ شىركىتىنىڭ باش دىرېكتورى ياڭ جيې ۋە ئۇنىڭ ھەمراھلىرى بىلەن كۆرۈشتى.
جاڭ چۈنشيەن كۆرۈشۈشتە مۇنداق دېدى: جۇڭگو تېلېگراف گۇرۇھ شىركىتى بىلەن شىنجاڭ ياخشى ھەمكارلىق ئاساسىغا ئىگە بولۇپ، ئىككى تەرەپ ئۇزاقتىن بۇيان ئۈستۈنلۈكتىن ئۆزئارا پايدىلىنىپ، ھەمكارلىشىپ ئورتاق پايدا ئېلىپ، نۇرغۇن ئەمەلىي نەتىجىلەرنى قولغا كەلتۈردى. «13 - بەش يىل»دىمۇ ئىككى تەرەپ ھەمكارلىق كېلىشىمى ئىمزالاپ، جۇڭگو تېلېگراف گۇرۇھ شىركىتى ئالاقىدار مەزمۇنلارنى ناھايىتى ياخشى ئەمەلىيلەشتۈردى ھەم ۋەزىپىلەرنى نورمىدىن ئاشۇرۇپ ئورۇندىدى. بۇ قېتىم «13 - بەش يىل»دا ھەمكارلىق ئىشلىرىنى تېخىمۇ ئايدىڭلاشتۇرۇش ئارقىلىق تېخىمۇ ياخشى ئۈنۈم ھاسىل قىلىدىغانلىقىغا ئىشىنىمەن.
جاڭ چۈنشيەن مۇنداق دېدى: ئاپتونوم رايونلۇق پارتكوم، خەلق ھۆكۈمىتى ئۇچۇرلاشتۇرۇش قۇرۇلۇشىغا يۈكسەك ئەھمىيەت بېرىدۇ. مەركەزنىڭ 1 - قېتىملىق شىنجاڭ خىزمىتى سۆھبەت يىغىنى ئېچىلغاندىن بۇيان، ئاپتونوم رايون «ماس قەدەمدە بەشلەشتۈرۈش» ئىستراتېگىيەسىنى ئوتتۇرىغا قويدى، ئۇچۇرلاشتۇرۇش بۇنىڭ ئىچىدىكى ئىنتايىن مۇھىم بىر قىسمى. جۇڭگو تېلېگراف گۇرۇھ شىركىتىنىڭ شىنجاڭنىڭ زامانىۋىلاشتۇرۇش مۇساپىسىگە يېقىندىن ئەگىشىپ، ئۇچۇرلاشتۇرۇش ئارقىلىق شىنجاڭنىڭ ئەمەلىي ئىقتىسادىي تەرەققىياتىغا مەدەت بېرىپ، شىنجاڭنىڭ ئىشلىرىنىڭ تەرەققىياتىنى داۋاملىق ئۇچۇرلاشتۇرۇش تىرىكىگە ئىگە قىلىشىنى؛ ئۈزلۈكسىز ئىسلاھ قىلىپ، يېڭىلىق يارىتىپ، ئۇچۇرلاشتۇرۇشنىڭ كەڭ كۆلەملىك تەرەققىياتى ئارقىلىق يىپەك يولى ئىقتىساد بەلبېغى يادرولۇق رايونى قۇرۇلۇشىنى ئىلگىرى سۈرۈپ، شىنجاڭنىڭ سىرتقا ئېچىۋېتىش قەدىمىنى تېزلىتىپ، خەلقئارا بازىرىنى پائال ئېچىشىنى؛ ئۇچۇرلاشتۇرۇش قۇرۇلۇشىنى ئەمىن شىنجاڭ، دېھقانچىلىق، چارۋىچىلىقنى زامانىۋىلاشتۇرۇش قاتارلىقلار بىلەن ئۆزئارا بىرلەشتۈرۈپ، ھازىرقى نەتىجىلەر ئاساسىدا، شىنجاڭنىڭ تەرەققىياتتا يېڭىلىق يارىتىش، ماس تەرەققىي قىلىش، تەرەققىيات يېشىل بولۇش، ئوچۇق تەرەققىي قىلىش، تەرەققىيات نەتىجىسىدىن ئورتاق بەھرىلىنىشنى يەنىمۇ ئىلگىرى سۈرۈشنى ئۈمىد قىلىمەن. ئاپتونوم رايونىمىزدىكى ئالاقىدار تارماقلار جۇڭگو تېلېگراف گۇرۇھ شىركىتى بىلەن ماس قەدەمدە ئۇدۇللىشىشنى كۈچەيتىپ، ئىككى تەرەپنىڭ ھەمكارلىق ئىشلىرىنى ھەقىقىي ئەمەلىيلەشتۈرۈشى كېرەك.
ياڭ جيې مۇنداق دېدى: جۇڭگو تېلېگراف گۇرۇھ شىركىتى شىنجاڭنىڭ ئۇچۇرلاشتۇرۇش قۇرۇلۇشىغا ئىنتايىن ئەھمىيەت بېرىدۇ، جۇڭگو تېلېگراف گۇرۇھ شىركىتى 13 - بەش يىللىق يىرىك پىلاندا «بىر بەلباغ، بىر يول» بىلەن بىرلەشتۈرۈش ئىستراتېگىيەسىنى ئالاھىدە ئوتتۇرىغا قويۇپ، شىنجاڭنىڭ يىپەك يولى ئىقتىساد بەلبېغى يادرولۇق رايونى قۇرۇلۇشىغا ياردەم بېرىدۇ. بۇنىڭدىن كېيىن، جۇڭگو تېلېگراف گۇرۇھ شىركىتى تىپنى ئۆزگەرتىش ۋە ئىسلاھاتنى يەنىمۇ چوڭقۇرلاشتۇرۇپ، شىنجاڭنى مۇھىم ئۇچۇرلاشتۇرۇش قۇرۇلۇشىنىڭ بازىسى قىلىپ، ئىككى تەرەپنىڭ ھەمكارلىق كېلىشىمىدىكى مەزمۇنلارنى پۈتۈن كۈچى بىلەن ئەمەلىيلەشتۈرىدۇ.
ئاپتونوم رايون بىلەن جۇڭگو تېلېگراف گۇرۇھ شىركىتى ئىمزالىغان ھەمكارلىق كېلىشىمىگە ئاساسەن، «13 - بەش يىل»دا جۇڭگو تېلېگراف گۇرۇھ شىركىتى 30 مىليارد يۈەن مەبلەغ سېلىپ، ئالاقە تورىغا دائىر ئۇچۇر ئۇل ئەسلىھە قۇرۇلۇشىنى زور كۈچ بىلەن ئىلگىرى سۈرۈپ، «ئالاقە تورى+ئەمىن شىنجاڭ»، «ئالاقە تورى+خەلق تۇرمۇشى»، «ئالاقە تورى+كەسىپ» قاتارلىق سەككىز چوڭ ئۇچۇرلاشتۇرۇش قۇرۇلۇشىنى يولغا قويۇپ، شىنجاڭنىڭ ئۇچۇرلاشتۇرۇش تەرەققىيات قەدىمىنى تېزلىتىدۇ.
ياڭ جيې كېلىشىم ئىمزالاش مۇراسىمىدا مۇنداق دېدى: جۇڭگو تېلېگراف گۇرۇھ شىركىتى ئەشيا تورى، بۇلۇت ھېسابلاش، چوڭ سانلىق مەلۇمات قاتارلىق ئۇچۇرلاشتۇرۇش يېڭى تېخنىكىسى ئارقىلىق شىنجاڭنىڭ يېڭى كەسىپ، يېڭى كەسىپ ھالىتىنىڭ جۇش ئۇرۇپ راۋاجلىنىشىنى ئىلگىرى سۈرۈپ، شىنجاڭنىڭ ئىقتىسادىي تەرەققىياتى، قۇرۇلمىنى سەرخىللاشتۇرۇشى، ھەرىكەتلەندۈرگۈچ كۈچنى ئالماشتۇرۇشىغا ئومۇميۈزلۈك تۈرتكە بولىدۇ. شۇنىڭ بىلەن بىللە، بايلىق سېلىنمىسىنى ئاشۇرۇپ، ئىجرا قىلىش بىلەن تۈرلەرنى ئەمەلىيلەشتۈرۈشنى چىڭ تۇتۇپ، «13 - بەش يىل»دا شىنجاڭنىڭ ئۇچۇر مۇلازىمىتى ئىقتىدارىنى يېڭى پەللىگە كۆتۈرۈپ، زامانىۋى خەۋەرلىشىش ئۇچۇر تېخنىكىسى ئارقىلىق شىنجاڭدىكى تېخىمۇ كۆپ ساھە ۋە ھەر مىللەت ئاممىغا نەپ يەتكۈزۈشكە تىرىشىدۇ.
ئاپتونوم رايونلۇق پارتكومنىڭ مۇئاۋىن شۇجىسى، ئاپتونوم رايوننىڭ رەئىسى شۆھرەت زاكىر كېلىشىم ئىمزالاش مۇراسىمىدا مۇنداق دېدى: جۇڭگو تېلېگراف گۇرۇھ شىركىتىنىڭ بۇ قېتىمقى ھەمكارلىق كېلىشىمى ئىمزالاشنى پۇرسەت دەپ بىلىپ، شىنجاڭنىڭ يۇقىرى سۈرئەتلىك ئوپتىك تالالىق تور قۇرۇلۇشى قەدىمىنى يەنىمۇ تېزلىتىپ، خەلق تۇرمۇشىنى ئالدىنقى ئورۇنغا قويۇشتا چىڭ تۇرۇپ، خەۋەرلىشىش ئۇل ئەسلىھەسىدىكى «كەمتۈك»لۈكلەرنى تولۇقلاپ، شىنجاڭنىڭ مەدەنىيەت كەسپى ۋە ئۇچۇر كەسپىنىڭ چوڭقۇر قاتلاملىق يۇغۇرۇلما تەرەققىياتىنى ئىلگىرى سۈرۈپ، شىنجاڭدىكى «چىقىرىش» ئىستراتېگىيەسىنى يولغا قويغان كارخانىلار ۋە چېگرا سىرتىدىكى كەسىپلەر كۆجۈملەشكەن رايونلارغا پائال، ياخشى مۇلازىمەت قىلىپ، يىپەك يولى ئىقتىساد بەلبېغى يادرولۇق رايونى قۇرۇلۇشىغا ياردەم بېرىشىنى ئۈمىد قىلىمەن.
ئاپتونوم رايونلۇق پارتكوم دائىمىي كومىتېتىنىڭ ئەزاسى، ئاپتونوم رايوننىڭ دائىمىي مۇئاۋىن رەئىسى خۇاڭ ۋېي كېلىشىم ئىمزالاش مۇراسىمىغا رىياسەتچىلىك قىلدى ھەم ئاپتونوم رايونلۇق خەلق ھۆكۈمىتىگە ۋاكالىتەن جۇڭگو تېلېگراف گۇرۇھ شىركىتى بىلەن كېلىشىم ئىمزالىدى.
ئاپتونوم رايونلۇق سىياسىي كېڭەشنىڭ مۇئاۋىن رەئىسى ليۇ جيەنشىن، جۇڭگو تېلېگراف گۇرۇھ شىركىتىنىڭ مۇئاۋىن باش دىرېكتورى ياڭ شياۋۋېي قاتارلىقلار ئايرىم - ئايرىم يۇقىرىقى پائالىيەتلەرگە قاتناشتى.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
خەلق تورى ئۇيغۇرچە ئۈندىدار سۇپىمىزنى قوشۇۋېلىپ، ئەڭ نوپۇزلۇق خەۋەرلەردىن خەۋەردار بولۇڭ
مەسئۇل مۇھەررىر : مەرھابا ئەبەت
ئالاقىدار خەۋەرلەر
باش بەت قىلىڭ
بەت ساقلاڭ ئالاقىلىشىڭ بىز 
