- مۇھىم
- مەملىكەت
- شىنجاڭ
- خەلقئارا
ئەڭ يېڭى سۈرەتلەر
شىنجاڭ ئۇيغۇر ئاپتونوم رايونىنىڭ ‹‹جۇڭخۇا خەلق جۇمھۇرىيىتىنىڭ كەنت ئاھالە كومىتېتى تەشكىلىي قانۇنى››نى يولغا قويۇش چارىسى
2015.05.06 11:20 مەنبە: شىنجاڭ گېزىتى
(2001–يىل 9–ئاينىڭ 28–كۈنى شىنجاڭ ئۇيغۇر ئاپتونوم رايونلۇق 9–نۆۋەتلىك خەلق قۇرۇلتىيى دائىمىي كومىتېتىنىڭ 24–يىغىنىدا ماقۇللاندى 2015–يىل 1–ئاينىڭ 10–كۈنى شىنجاڭ ئۇيغۇر ئاپتونوم رايونلۇق 12–نۆۋەتلىك خەلق قۇرۇلتىيى دائىمىي كومىتېتىنىڭ 13–يىغىنىدا ئۆزگەرتىلدى)
شىنجاڭ ئۇيغۇر ئاپتونوم رايونلۇق 12 – نۆۋەتلىك خەلق قۇرۇلتىيى دائىمىي كومىتېتىنىڭ ئېلانى
(13 – نومۇرلۇق)
‹‹شىنجاڭ ئۇيغۇر ئاپتونوم رايونىنىڭ <جۇڭخۇا خەلق جۇمھۇرىيىتىنىڭ كەنت ئاھالە كومىتېتى تەشكىلىي قانۇنى>نى يولغا قويۇش چارىسى›› 2015 – يىل 1 – ئاينىڭ 10 – كۈنى شىنجاڭ ئۇيغۇر ئاپتونوم رايونلۇق 12 – نۆۋەتلىك خەلق قۇرۇلتىيى دائىمىي كومىتېتىنىڭ 13 – يىغىنىدا ماقۇللىنىپ، ھازىر ئېلان قىلىندى، 2015 – يىل 3 – ئاينىڭ 1 – كۈنىدىن باشلاپ يولغا قويۇلسۇن.
2015 – يىل 1 – ئاينىڭ 10 – كۈنى
1 – باب ئومۇمىي پىرىنسىپ
1 – ماددا بۇ چارە يېزا ئاساسىي قاتلام دېموكراتىيەسىنى راۋاجلاندۇرۇش، كەنت ئاھالىسىنىڭ قانۇنىي ھوقۇق – مەنپەئىتىنى قوغداش، يېزىلارنىڭ ئىجتىمائىي مۇقىملىق ۋە ئەبەدىي ئەمىنلىك تەشكىلىي ئاساسى ۋە ئاممىۋى ئاساسىنى مۇستەھكەملەش، سوتسىيالىستىك يېڭى يېزا قۇرۇلۇشىنى ئىلگىرى سۈرۈش مەقسىتىدە، ‹‹جۇڭخۇا خەلق جۇمھۇرىيىتىنىڭ كەنت ئاھالە كومىتېتى تەشكىلىي قانۇنى››غا بىنائەن، ئاپتونوم رايونىمىزنىڭ ئەمەلىيىتىگە بىرلەشتۈرۈپ چىقىرىلدى.
2 – ماددا كەنت ئاھالە كومىتېتى ئۆز – ئۆزىنى باشقۇرىدىغان، ئۆز – ئۆزىنى تەربىيەلەيدىغان، ئۆز – ئۆزىنى نازارەت قىلىدىغان ئاساسىي قاتلام ئاممىۋى ئاپتونوم تەشكىلات.
كەنت ئاھالە كومىتېتى ئاممىنىڭ ئۆز – ئۆزىنى ئىدارە قىلىشىغا، كەنت ئاھالىسىگە مۇلازىمەت قىلىشىغا قولايلىق بولۇش، ئىقتىسادىي تەرەققىياتقا، ئىجتىمائىي باشقۇرۇشقا ۋە مىللەتلەر ئىتتىپاقلىقىغا پايدىلىق بولۇش پىرىنسىپى بويىچە قۇرۇلىدۇ ھەمدە ئۇ دېموكراتىك سايلام ئۆتكۈزۈش، دېموكراتىك تەدبىر بەلگىلەش، دېموكراتىك باشقۇرۇش ۋە دېموكراتىك نازارەت قىلىشنى يولغا قويىدۇ.
3 – ماددا جۇڭگو كوممۇنىستىك پارتىيەسىنىڭ يېزىلاردىكى ئاساسىي قاتلام تەشكىلاتلىرى خىزمەتلەرنى جۇڭگو كوممۇنىستىك پارتىيەسىنىڭ نىزامنامىسى بويىچە ئىشلەيدۇ. رەھبەرلىك يادروسىلىق رولىنى جارى قىلدۇرىدۇ، كەنت ئاھالە كومىتېتىنىڭ خىزمەت ھوقۇقىنى يۈرگۈزۈشىگە رەھبەرلىك قىلىدۇ ۋە ئۇنى قوللايدۇ، ئاساسىي قانۇن، قانۇنلار، نىزاملار بويىچە كەنت ئاھالىسىنىڭ ئۆز – ئۆزىنى ئىدارە قىلىشىنى، دېموكراتىيە ھوقۇقىنى بىۋاسىتە يۈرگۈزۈشىنى قوللايدۇ ۋە كاپالەتلەندۈرىدۇ.
4 – ماددا ئاپتونوم رايون كەنت دەرىجىلىك تەشكىلاتلارنىڭ خىزمەت خىراجىتىنى كاپالەتلەندۈرۈش ۋە ئۇنى نورمال ئاشۇرۇش مېخانىزمىنى بەرپا قىلىدۇ.
كەنت ئاھالە كومىتېتىنىڭ ئىش خىراجىتى، كەنت ئاھالە كومىتېتى تەركىبىدىكىلەرنىڭ ئىش ھەققى، كەنت ئىشلىرى نازارەتچىلىك كومىتېتى تەركىبىدىكىلەر ۋە كەنت ئاھالە گۇرۇپپا باشلىقلىرىنىڭ ئىش ئورنى ياردەم پۇلى، ئىجتىمائىي باشقۇرۇش چىقىمى ۋە مۇلازىمەت چىقىمى قاتارلىق كەنت دەرىجىلىك تەشكىلاتلارنىڭ خىزمەت خىراجىتى دۆلەت ۋە ئاپتونوم رايوننىڭ ئالاقىدار بەلگىلىمىلىرى بويىچە كاپالەتلەندۈرۈلىدۇ.
2 – باب كەنت ئاھالە كومىتېتى، كەنت ئاھالە گۇرۇپپىسى، كەنت ئاھالە ۋەكىلى
5 – ماددا كەنت ئاھالە كومىتېتى مۇدىر، مۇئاۋىن مۇدىر ۋە ئەزا بولۇپ، ئۈچتىن يەتتە كىشىگىچە بولغان تاق ساندىن تەركىب تاپىدۇ.
كەنت ئاھالە كومىتېتى تەركىبىدىكىلەر ‹‹شىنجاڭ ئۇيغۇر ئاپتونوم رايونىنىڭ كەنت ئاھالە كومىتېتىنىڭ سايلام چارىسى›› بويىچە سايلام ئارقىلىق ۋۇجۇدقا كېلىدۇ.
كەنت ئاھالە كومىتېتى ئېھتىياجغا قاراپ، خەلق مۇرەسسەسى، ئامانلىق ساقلاش، جامائەت ساغلاملىقى ۋە پىلانلىق تۇغۇت، دىن ئىشلىرى، خەلق ئىشلىرى، مائارىپ، ئاياللار، ياشلار، ئۆسمۈرلەر خىزمىتى قاتارلىق خىزمەتلەرگە مەسئۇل بولىدىغان بىر قانچە كومىتېت قۇرسا بولىدۇ. كەنت ئاھالە كومىتېتى تەركىبىدىكىلەر كەنت ئاھالە كومىتېتى قارىمىقىدىكى كومىتېتلارنىڭ ئەزالىقىنى قوشۇمچە ئۆتىسە بولىدۇ.
نوپۇسى ئازراق كەنتلەردىكى كەنت ئاھالە كومىتېتلىرى قارىمىقىدا كومىتېت قۇرماي، ئالدىنقى تارماقتا بەلگىلەنگەن مەسئۇلىيەتنى كەنت ئاھالە كومىتېتى تەركىبىدىكىلەر ئىش تەقسىماتى بويىچە ئۈستىگە ئالسىمۇ بولىدۇ.
6 – ماددا كەنت ئاھالە كومىتېتى تۆۋەندىكى مەسئۇلىيەتنى ئادا قىلىدۇ:
(1) ئاساسىي قانۇن، قانۇنلار، نىزاملار ۋە دۆلەتنىڭ سىياسىتىنى تەشۋىق قىلىش، كەنت ئاھالىسىگە قانۇندا بەلگىلەنگەن مەجبۇرىيىتىنى ئادا قىلىش ھەققىدە تەربىيە بېرىش ۋە ئۇنىڭغا تۈرتكە بولۇش؛
(2) شۇ كەنتنىڭ ئىقتىسادىي ۋە ئىجتىمائىي تەرەققىيات يىرىك پىلانى، يىللىق پىلانىنى تۈزۈش ۋە يولغا قويۇش؛
(3) كەنت ئاھالىسىگە ئۆزئارا چۈشىنىش، ئۆزئارا يول قويۇش، ئۆزئارا بەھرىلىنىش، ئۆزئارا ئۆگىنىش، ئۆزئارا ھۆرمەت قىلىش، ئۆزئارا ياردەم بېرىش، مىللىي بۆلگۈنچىلىككە ۋە دىن ئەسەبىيلىكى ئىدىيەسىنىڭ سىڭىپ كىرىشىگە تاقابىل تۇرۇش ھەققىدە تەربىيە بېرىش ۋە ئۇلارنى يېتەكلەش، مىللەتلەرنىڭ ئىناق ئۆتۈشىگە، بىر ياقىدىن باش چىقىرىشىغا، ئىناق تەرەققىي قىلىشىغا تۈرتكە بولۇش؛
(4) ھۆكۈمەتنىڭ دىن ئىشلىرىنى قانۇن بويىچە باشقۇرۇش، جەمئىيەت ئامانلىقىنى ساقلاش، تېررورلۇققا قارشى تۇرۇش، مۇقىملىقنى ساقلاش، كۆچمە نوپۇسقا مۇلازىمەت قىلىش ۋە ئۇلارنى باشقۇرۇش شۇنىڭدەك ئىجتىمائىي كاپالەت، مەجبۇرىيەت مائارىپى، ياشلار، ئۆسمۈرلەر تەربىيەسى، پىلانلىق تۇغۇت جەھەتتىكى خىزمەتلەرنى ئىشلىشىگە ياردەملىشىش؛
(5) كەنت ئاھالىسىنى خەتەردىن، ئاپەتتىن قۇتقۇزۇشقا قاتنىشىشقا تەشكىللەش؛
(6) ئالاقىدار تارماقلارنىڭ مەھەللىدە تۈزەش، جازا مۇددىتى توشۇپ قويۇپ بېرىلگەن نۇقتىلىق تىزگىنلىنىدىغانلارغا تەربىيە، ياردەم بېرىش، ئۇلارنى نازارەت قىلىش خىزمەتلىرىگە ياردەملىشىش؛
(7) ‹‹جۇڭخۇا خەلق جۇمھۇرىيىتىنىڭ كەنت ئاھالە كومىتېتى تەشكىلىي قانۇنى››دا بەلگلەنگەن باشقا مەسئۇلىيەتلەر.
7 – ماددا يېزىلىق (بازارلىق) خەلق ھۆكۈمەتلىرى كەنت ئاھالە كومىتېتىنىڭ تۆۋەندىكى خىزمەتلىرىگە يېتەكچىلىك قىلىشى، مەدەت ۋە ياردەم بېرىشى كېرەك:
(1) كەنت ئىشلىرىنى ئاشكارىلاش، مالىيەنى دېموكراتىك باشقۇرۇش؛
(2) كەنت ئاھالە كومىتېتى تەركىبىدىكىلەرنى شۇنىڭدەك ئىش دەخلىسى ياردەم پۇلىنى كەنت ئاھالىسى ياكى كەنت كوللېكتىپى ئۈستىگە ئېلىپ تەكلىپ قىلغان خادىملارنى دېموكراتىك باھالاش؛
(3) كەنت دەرىجىلىك دېموكراتىك تەدبىر بەلگىلەش، دېموكراتىك باشقۇرۇش ۋە دېموكراتىك نازارەت قىلىش تۈزۈمى قاتارلىق تۈزۈملەرنى ئورنىتىش ۋە يولغا قويۇش؛
(4) كۆچمە ئاھالىگە مۇلازىمەت قىلىش، ئۇلارنى باشقۇرۇش ۋە دىن ئىشلىرىنى باشقۇرۇشنى كۈچەيتىش؛
(5) كەنت ئاھالە كومىتېتى قانۇن بويىچە ئادا قىلىدىغان باشقا مەسئۇلىيەتلەر.
يېزىلىق (بازارلىق) خەلق ھۆكۈمەتلىرى قانۇن بويىچە ئاپتونومىيەسىگە تەۋە كەنت ئاھالە ئىشلىرىغا ئارىلىشىۋالسا بولمايدۇ.
8 – ماددا ناھىيەلىك (شەھەرلىك، رايونلۇق) خەلق ھۆكۈمىتىنىڭ خەلق ئىشلىرى تارمىقى ۋە يېزىلىق (بازارلىق) خەلق ھۆكۈمىتى كەنت ئاھالە كومىتېتى تەركىبىدىكىلەرنى تەربىيەلەشكە تەشكىلاتچىلىق قىلىدۇ، ھەر نۆۋەتلىك كەنت ئاھالە كومىتېتى تەركىبىدىكىلەرنى ۋەزىپە ئۆتەش مۇددىتى ئىچىدە كەم بولغاندا بىر قېتىم تەربىيەلەيدۇ، تەربىيەلەش ۋاقتى يەتتە كۈندىن كەم بولمايدۇ، تەربىيەلەشتە ھەق ئېلىشقا بولمايدۇ.
9 – ماددا كەنت ئاھالە كومىتېتى بىر قانچە كەنت ئاھالە گۇرۇپپىسى قۇرسا بولىدۇ. كەنت ئاھالە كومىتېتى تەركىبىدىكىلەر كەنت ئاھالە گۇرۇپپىسىنىڭ باشلىقلىقىنى قوشۇمچە ئۆتىسە بولىدۇ.
كەنت ئاھالە گۇرۇپپىسى خىزمەتلەرنى كەنت ئاھالە كومىتېتىنىڭ رەھبەرلىكىدە ئىلشەيدۇ، كەنت ئاھالە يىغىنىنىڭ، كەنت ئاھالە ۋەكىللىرى يىغىنىنىڭ، كەنت ئاھالە گۇرۇپپىسى يىغىنىنىڭ ۋە كەنت ئاھالە كومىتېتىنىڭ قارارلىرىنى ئىجرا قىلىدۇ.
10 – ماددا كەنت ئاھالە گۇرۇپپىسى كەنت ئاھالىسىنى تەشكىللەپ، ھەر بەشتىن 15 كىچە ئائىلىدىن بىر كىشىنى ياكى كەنت ئاھالە گۇرۇپپىسى بىر قانچە كىشىنى كەنت ئاھالە ۋەكىللىكىگە سايلىسا بولىدۇ.
كەنت ئاھالە ۋەكىللىرى قانۇن – ئىنتىزامغا رىئايە قىلىشى، ئادىل ئىش قىلىشى، ئىشلارنى مۇھاكىمە قىلىش ئىقتىدارىغا ئىگە بولۇشى، كەنت ئاھالىسىنىڭ تەلەپلىرىنى توغرا ئىپادىلىشى، كەنت ئاھالىسىنىڭ مەنپەئىتىنى قوغدىشى، كەنت ئاھالىسىنىڭ نازارىتىنى قوبۇل قىلىشى كېرەك.
3 – باب كەنت ئاھالە يىغىنى، كەنت ئاھالە ۋەكىللىرى يىغىنى، كەنت ئاھالە گۇرۇپپىسى يىغىنى
11 – ماددا كەنت ئاھالە يىغىنى 18 ياشتىن يۇقىرى كەنت ئاھالىسىدىن تەركىب تاپىدۇ. كەنت ئاھالە يىغىنى ئاچقاندا، 18 ياشتىن يۇقىرى كەنت ئاھالىسىنىڭ تەڭدىن تولىسى ياكى ئۈچتىن ئىككى قىسىمدىن كۆپرەك ئائىلە ۋەكىللىرى قاتنىشىشى كېرەك. كەنت ئاھالە يىغىنىنىڭ قارارى يىغىنغا قاتناشقۇچىلارنىڭ تەڭدىن تولىسىنىڭ ماقۇللۇقىدىن ئۆتۈشى كېرەك.
12 – ماددا كەنت ئاھالە يىغىنى تۆۋەندىكى خىزمەت ھوقۇقلىرىنى يۈرگۈزىدۇ:
(1) ‹‹جۇڭخۇا خەلق جۇمھۇرىيىتىنىڭ كەنت ئاھالە كومىتېتى تەشكىلىي قانۇنى››دا بەلگىلەنگەن ئالاقىدار ئىشلارنى مۇزاكىرە قىلىپ بېكىتىش؛
(2) كەنت ئاھالە كومىتېتىنىڭ يىللىق خىزمەت دوكلاتىنى ۋە مالىيە كىرىم – چىقىم ئەھۋالى توغرىسىدىكى دوكلاتىنى، شۇ كەنتنىڭ ئىقتىسادىي ۋە ئىجتىمائىي تەرەققىيات يىرىك پىلانىنى ۋە يىللىق پىلانىنى قاراپ چىقىش؛
(3) كەنت ئاھالە كومىتېتى تەركىبىدىكىلەرنى سايلاش، قالدۇرۇۋېتىش ۋە تولۇقلاپ سايلاش؛
(4) كەنت ئاھالىسىنىڭ ئاپتونومىيە نىزامنامىسى، كەنت ئەھدىنامىسىنى چىقىرىپ ۋە تۈزىتىپ، يېزىلىق (بازارلىق) خەلق ھۆكۈمىتىگە ئەنگە ئالدۇرۇش؛
(5) كەنت ئاھالە كومىتېتىنىڭ نامۇۋاپىق قارارلىرىنى ئەمەلدىن قالدۇرۇش ياكى ئۆزگەرتىش؛
(6) كەنت ئاھالە ۋەكىللىرى يىغىنىنىڭ نامۇۋاپىق قارارلىرىنى ئەمەلدىن قالدۇرۇش ياكى ئۆزگەرتىش؛
(7) كەنت ئاھالە كومىتېتى تەركىبىدىكىلەرنىڭ شۇنىڭدەك ئىش دەخلىسى ياردەم پۇلىنى كەنت ئاھالىسى ياكى كەنت كوللېكتىپى ئۈستىگە ئېلىپ تەكلىپ قىلغان خادىملارنىڭ خىزمىتىنى باھالاش؛
(8) قانۇن – نىزاملاردا بەلگىلەنگەن باشقا خىزمەت ھوقۇقلىرى.
كەنت ئاھالە يىغىنى چىقارغان ۋە تۈزەتكەن كەنت ئاھالە ئاپتونومىيە نىزامنامىسى، كەنت ئەھدىنامىسى، ئاساسىي قانۇن، قانۇنلار، نىزاملار ۋە دۆلەتنىڭ سىياسىتىگە زىت كەلسە بولمايدۇ.
13 – ماددا كەنت ئاھالە يىغىنىنى كەنت ئاھالە كومىتېتى چاقىرىدۇ. ئوندىن بىر قىسىمدىن كۆپرەك كەنت ئاھالىسى ياكى ئۈچتىن بىر قىسىمدىن كۆپرەك كەنت ئاھالە ۋەكىللىرى تەكلىپ بەرسە، كەنت ئاھالە كومىتېتى كەنت ئاھالە يىغىنى ئېچىشى كېرەك. كەنت ئاھالە يىغىنى ئېچىلىشتىن ئون كۈن بۇرۇن ئۇقتۇرۇش قىلىش ھەمدە يىغىندا مۇزاكىرە قىلىدىغان ئىشلارنى كەنت ئاھالىسىگە ئاشكارىلاش كېرەك.
14 – ماددا ئادەم سانى كۆپرەك ياكى تارقاق ئولتۇراقلاشقان كەنتلەر كەنت ئاھالە ۋەكىللىرى يىغىنى تەسىس قىلسا بولىدۇ، كەنت ئاھالە ۋەكىللىرى يىغىنى كەنت ئاھالە كومىتېتى تەركىبىدىكىلەر ۋە كەنت ئاھالە ۋەكىللىرىدىن تەركىب تاپىدۇ.
كەنت ئاھالە يىغىنى كەنت ئاھالە ۋەكىللىرى يىغىنغا مۇشۇ چارىنىڭ 12 – ماددىسىنىڭ 1 – ، 2 – ، 5 – ، 7 – تارماقلىرىدا بەلگىلەنگەن خىزمەت ھوقۇقلىرىنى بەرسە بولىدۇ.
كەنت ئاھالە ۋەكىللىرى يىغىنىدا پىكىر ئىختىلاپى چوڭراق بولۇپ، قارار قىلغىلى بولمىغان ئىشلارنى كەنت ئاھالە يىغىنىنىڭ مۇزاكىرە قىلىپ قارار قىلىشىغا سۇنۇش كېرەك.
15 – ماددا كەنت ئاھالە ۋەكىللىرى يىغىنىنى كەنت ئاھالە كومىتېتى چاقىرىدۇ، ھەر پەسىلدە بىر قېتىم ئاچىدۇ. بەشتىن بىر قىسىمدىن كۆپرەك كەنت ئاھالە ۋەكىللىرى تەكلىپ بەرسە، كەنت ئاھالە ۋەكىللىرى يىغىنىنى چاقىرىش كېرەك.
كەنت ئاھالە ۋەكىللىرى يىغىنىنى ئاچقاندا، تەركىبىدىكى خادىملارنىڭ ئۈچتىن ئىككى قىسىمدىن كۆپرەكى قاتنىشىشى كېرەك، كەنت ئاھالە ۋەكىللىرى يىغىنىنىڭ قارارىنى يىغىنغا قاتناشقانلارنىڭ تەڭدىن تولىسىنىڭ ماقۇللۇقىدىن ئۆتكۈزۈش كېرەك. كەنت ئاھالە ۋەكىللىرى يىغىنىنىڭ قارارى كەنت ئاھالە يىغىنىنىڭ قارارىغا زىت كەلسە بولمايدۇ.
16 – ماددا كەنت ئاھالە گۇرۇپپىسى يىغىنىنى كەنت ئاھالە گۇرۇپپىسىنىڭ باشلىقى چاقىرىدۇ.
كەنت ئاھالە گۇرۇپپىسى يىغىنىغا كەنت ئاھالە گۇرۇپپىسىدىكى 18 ياشتىن يۇقىرى بولغان كەنت ئاھالىسىنىڭ ئۈچتىن ئىككى قىسىمدىن كۆپرەكى ياكى كەنت ئاھالە گۇرۇپپىسىدىكى ئۈچتىن ئىككى قىسىمدىن كۆپرەك ئائىلە ۋەكىلى قاتنىشىشى كېرەك ھەمدە كەنت ئاھالە كومىتېتى تەركىبىدىكىلەر سىرتتىن قاتنىشىشقا تەكلىپ قىلىنسا بولىدۇ. كەنت ئاھالە گۇرۇپپىسى يىغىنىنىڭ قارارىنى يىغىنغا قاتناشقانلارنىڭ تەڭدىن تولىسىنىڭ ماقۇللۇقىدىن ئۆتكۈزۈش كېرەك.
كەنت ئاھالە گۇرۇپپىسى يىغىنىدا مۇزاكىرە قىلىنغان ئىشلار، چىقىرىلغان قارار ۋە ئۇنىڭ يولغا قويۇلۇش ئەھۋالىنى كەنت ئاھالىسىگە ۋاقتىدا ئاشكارىلاش كېرەك.
17 – ماددا تۆۋەندىكى ئىشلارنى كەنت ئاھالە گۇرۇپپىسى يىغىنى مۇزاكىرە قىلىپ بېكىتىشى كېرەك:
(1) كەنت ئاھالە گۇرۇپپىسىنىڭ كوللېكتىپ ئىگىدارلىقىدىكى يەرنى ھۆددە بېرىش، تەڭشەش لايىھەسى، يەر ئېلىش تولۇقلىمىسىنى ئىشلىتىش، تەقسىملەش لايىھەسى؛
(2) كەنت ئاھالە گۇرۇپپىسىنىڭ كوللېكتىپ ئىگىلىك تاپاۋىتىنى تەقسىملەش ۋە ئىشلىتىش؛
(3) كەنت ئاھالە گۇرۇپپىسى قارىمىقىدىكى كارخانا ۋە باشقا مال – مۈلۈكنى باشقۇرۇش؛
(4) شۇ كەنت ئاھالە گۇرۇپپىسىنىڭ مەنپەئىتىگە چېتىلىدىغان باشقا ئىشلار.
كەنت ئاھالە كومىتېتى كەنت ئاھالە گۇرۇپپىسىنىڭ كوللېكتىپ ئىگىدارلىقىدىكى يەر، كارخانا ۋە باشقا مال – مۈلۈكنى ئۆز بېشىمچىلىق بىلەن نېرى – بېرى قىلسا بولمايدۇ.
18 – ماددا كەنت ئاھالە يىغىنى، كەنت ئاھالە ۋەكىللىرى يىغىنى ياكى كەنت ئاھالە گۇرۇپپىسى يىغىنىنىڭ قانۇن بويىچە شەكىللەنگەن قارارلىرىنى خالىغانچە ئۆزگەرتىشكە بولمايدۇ؛ ئالاھىدە ئەھۋال تۈپەيلىدىن ئۆزگەرتىشكە توغرا كەلسە، كەنت ئاھالە يىغىنى، كەنت ئاھالە ۋەكىللىرى يىغىنى ياكى كەنت ئاھالە گۇرۇپپىسى يىغىنىنىڭ مۇزاكىرە قىلىپ بېكىتىشىدىن ئۆتكۈزۈش كېرەك.
كەنت ئاھالە يىغىنى، كەنت ئاھالە ۋەكىللىرى يىغىنى ياكى كەنت ئاھالە گۇرۇپپىسى يىغىنى مۇزاكىرە قىلىپ قارار قىلغان ئىشلاردىن خاتىرە قالدۇرۇش كېرەك.
4 – باب دېموكراتىك باشقۇرۇش ۋە دېموكراتىك نازارەت قىلىش
19 – ماددا كەنتتە كەنت نازارەتچىلىك كومىتېتى قۇرۇلىدۇ. ئۇ، تۆۋەندىكى نازارەتچىلىك مەسئۇلىيىتىنى ئادا قىلىدۇ:
(1) كەنت ئاھالە كومىتېتى تەركىبىدىكىلەرنىڭ مەسئۇلىيىتىنى ئادا قىلىش ئەھۋالى، پاك، تەلەپچان بولۇش ئەھۋالى؛
(2) كەنت ئاھالە يىغىنى ۋە كەنت ئاھالە ۋەكىللىرى يىغىنىدا قارار قىلىنغان ئىشلارنىڭ ئىجرا قىلىنىش ئەھۋالى؛
(3) كەنت كوللېكتىپ مەبلىغىنى باشقۇرۇش، ئىشلىتىش ۋە كەنت كوللېكتىپ مۈلكى ۋە بايلىقىنى ھۆددە بېرىش، ئىجارە بېرىش، كېپىلگە بېرىش، ئۆتۈنۈپ بېرىش ۋە قۇرۇلۇش تۈرىگە خېرىدار چاقىرىش قاتارلىق كەنت ئىشلىرىنى باشقۇرۇش ئەھۋالى؛
(4) كەنت ئىشلىرىنى ئاشكارىلاش لايىھەسى نازارەت قىلىنىدىغان كەنت ئىشلىرىنى ئاشكارىلاش مەزمۇنى، تەرتىپى، ئۇسۇلى ۋە ۋاقتى، كەنت ئاھالە يىغىنى ۋە كەنت ئاھالە ۋەكىللىرى يىغىنغا دوكلات قىلىدىغان كەنت ئىشلىرىنى ئاشكارىلاش، پۇل – بىساتنى دېموكراتىك باشقۇرۇش ئەھۋالى؛
(5) كەنتنىڭ پۇل – بىساتنى دېموكراتىك باشقۇرۇش تۈزۈمىنى چىقىرىشقا قاتنىشىش؛
(6) كەنت ئاھالىسىنىڭ مۇۋاپىق پىكىر، تەكلىپلىرىنى كەنت ئاھالە كومىتېتىغا ئىنكاس قىلىش ھەمدە كەنت ئاھالە كومىتېتىنىڭ ۋاقتىدا بېجىرىشىگە ھەيدەكچىلىك قىلىش؛
(7) قانۇن بويىچە ئادا قىلىدىغان باشقا نازارەتچىلىك مەسئۇلىيەتلىرى.
20 – ماددا كەنت ئاھالە كومىتېتى ئاز سانلىق كۆپ سانلىققا بويسۇنۇشتەك دېموكراتىك تەدبىر بەلگىلەش مېخانىزمى ۋە ئاشكارا، ئادىل بولۇشتەك خىزمەت پىرىنسىپىنى يولغا قويۇشى، خىزمەت تۈزۈملىرىنى ئورنىتىشى ۋە مۇكەممەللەشتۈرۈشى، ئىشلارنى قانۇن بويىچە بېجىرىشى، كەنت ئاھالىسى ۋە كەنت نازارەتچىلىك كومىتېتىنىڭ نازارىتىنى قوبۇل قىلىشى كېرەك.
21 – ماددا كەنت ئاھالە كومىتېتى كەنت ئىشلىرىنى ئاشكارىلاش تۈزۈمىنى يولغا قويىدۇ. كەنت ئىشلىرىنى ئاشكارىلاش مەزمۇنى، تەرتىپى، شەكلى ۋە ۋاقتى قاتارلىقلار دۆلەت ۋە ئاپتونوم رايوننىڭ ئالاقىدار بەلگىلىمىسى بويىچە بولىدۇ.
كەنت ئاھالە كومىتېتى ئېلان قىلىنغان ئىشلارنىڭ راستلىقىغا كاپالەتلىك قىلىشى ھەمدە كەنت ئاھالىسىنىڭ سۈرۈشتۈرمىسىنى ۋە نازارىتىنى قوبۇل قىلىشى كېرەك.
22 – ماددا كەنت ئاھالە يىغىنى ياكى كەنت ئاھالە ۋەكىللىرى يىغىنى كەنت ئاھالە كومىتېتى تەركىبىدىكىلەر، كەنت ئاھالە گۇرۇپپىسىنىڭ باشلىقلىرىنىڭ ۋە ئىش دەخلىسى ياردەم پۇلىنى كەنت ئاھالىسى ياكى كەنت كوللېكتىپى ئۈستىگە ئېلىپ تەكلىپ قىلغان خادىملارنىڭ مەسئۇلىيىتىنى ئادا قىلىش ئەھۋالىنى يىلدا ئاز دېگەندە بىر قېتىم دېموكراتىك باھالىشى كېرەك.
ئۇدا ئىككى قېتىم باھالاشتا لاياقەتسىز بولغان كەنت ئاھالە كومىتېتى تەركىبىدىكىلەر ۋە كەنت ئاھالە گۇرۇپپىسى باشلىقىنىڭ ۋەزىپىسى ئاخىرلاشتۇرۇلىدۇ؛ ئۇدا ئىككى قېتىم باھالاشتا لاياقەتسىز بولغان تەكلىپ قىلىنغانلار ئىشتىن بوشىتىلىدۇ.
23 – ماددا كەنت ئاھالە كومىتېتى ۋە كەنت ئىشلىرى نازارەتچىلىك كومىتېتى كەنت ئىشلىرى ئارخىپى تۇرغۇزۇشى كېرەك. كەنت ئىشلىرى ئارخىپى چىن، توغرا، مۇكەممەل، ئۆلچەملىك بولۇشى ھەمدە ئۇنى دۆلەت ۋە ئاپتونوم رايوننىڭ ئارخىپ باشقۇرۇشقا دائىر بەلگىلىمىسى بويىچە ساقلاش ۋە ئىشلىتىش كېرەك.
24 – ماددا ناھىيەلىك (شەھەرلىك، رايونلۇق) خەلق ھۆكۈمەتلىرىنىڭ دېھقانچىلىق تارماقلىرى، مالىيە تارماقلىرى ياكى يېزىلىق (بازارلىق) خەلق ھۆكۈمەتلىرى كەنت ئاھالە كومىتېتى تەركىبىدىكىلەرنىڭ ۋەزىپە ئۆتەش مۇددىتى ۋە ۋەزىپىدىن ئايرىلغان چاغدىكى ئىقتىسادىي جاۋابكارلىقنى تەپتىش قىلىشقا تەشكىللىشى، تەپتىش قىلىش نەتىجىسىنى ئېلان قىلىشى، ۋەزىپىدىن ئايرىلغان چاغدىكى ئىقتىسادىي جاۋابكارلىقنى تەپتىش قىلىش نەتىجىسىنى كېيىنكى نۆۋەتلىك كەنت ئاھالە كومىتېتى سايلىمىدىن بۇرۇن ئېلان قىلىشى كېرەك.
ۋەزىپە ئۆتەش مۇددىتى توشقان، قالدۇرۇۋېتىلگەن، ئىستېپا بەرگەن، ۋەزىپىسى ئاخىرلاشتۇرۇلغان كەنت ئاھالە كومىتېتى تەركىبىدىكىلەرنىڭ ۋەزىپە ئۆتىگەن مەزگىلدىكى ئىقتىسادىي جاۋابكارلىقىنى تەپتىش قىلماي تۇرۇپ بىكار قىلىشقا بولمايدۇ.
25 – ماددا كەنت ئاھالە كومىتېتى تەركىبىدىكىلەر ئاساسىي ئىش ھەققى ۋە نەتىجە مۇكاپات پۇلىدىن بەھرىمەن بولىدۇ؛ كەنت نازارەتچىلىك كومىتېتى تەركىبىدىكىلەر، كەنت ئاھالە گۇرۇپپىسى باشلىقلىرى ئىش ئورنى ياردەم پۇلىدىن بەھرىمەن بولىدۇ.
كەنت ئاھالە كومىتېتى تەركىبىدىكىلەردىن ئۆز قارىمىقىدىكى كومىتېتلارنىڭ ئەزالىقىنى ياكى كەنت ئاھالە گۇرۇپپىسىنىڭ باشلىقلىقىنى قوشۇمچە ئۆتىگەنلىرى ئىش ئورنى ياردەم پۇلىدىن بەھرىمەن بولمايدۇ.
26 – ماددا كەنت ئاھالە كومىتېتى ۋە ئۇنىڭ تەركىبىدىكىلەردىن تۆۋەندىكى قىلمىشلارنىڭ بىرىنى سادىر قىلغانلىرىنى ناھىيەلىك (شەھەرلىك، رايونلۇق) خەلق ھۆكۈمىتى ۋە ئۇنىڭ ئالاقىدار تارمىقى ياكى يېزىلىق (بازارلىق) خەلق ھۆكۈمىتى تۈزىتىشكە بۇيرۇيدۇ ۋە قانۇن بويىچە بىر تەرەپ قىلىدۇ:
(1) ئىگىلىۋېلىش، تۇتۇپ قېلىش، ئىشلىتىۋېلىش، بۆلۈشۈۋېلىش، ئالداپ ئېلىۋېلىش قاتارلىق ۋاسىتىلەرنى قوللىنىپ، كوللېكتىپنىڭ مەبلىغى، مۈلكى، بايلىقىنى ياكى جامائەتنىڭ باشقا پۇل – مېلىنى قانۇنسىز ئىگىلىۋالغانلار؛
(2) قۇتقۇزۇش، ئاپەتتىن قۇتقۇزۇش، نەپىقە بېرىش، نامراتلارنى يۆلەش، ئاھالە كۆچۈرۈش پۇل – ماللىرىنى ئىگىلىۋالغانلار؛
(3) مالىيە باشقۇرۇش بەلگىلىمىسىگە خىلاپلىق قىلغانلار؛
(4) پىلانلىق تۇغۇت سىياسىتىنى ئەمەلىيلەشتۈرۈش ۋە نوپۇس يۆتكەش، دەپنە قىلىش قاتارلىق باشقۇرۇش، مۇلازىمەت قىلىش خىزمىتىدە ياكى ھاۋالە بىلەن جامائەت پائالىيىتى قىلغاندا، پۇل – مال ئالغانلار، سورىغانلار؛
(5) كەنت ئاھالە كومىتېتىنىڭ نۆۋەت ئالماشتۇرۇش سايلىمىدا پارا بەرگەنلەر؛
(6) كەنت كوللېكتىپىنىڭ ۋە كەنت ئاھالىسىنىڭ قانۇنىي ھوقۇق – مەنپەئىتىگە زىيان يەتكۈزىدىغان باشقا قىلمىشلار.
كەنت كوللېكتىپى ۋە كەنت ئاھالىسىنىڭ مۈلكى، مەبلىغىنى ئىگىلىۋالغانلار تولۇق قايتۇرۇشقا، تۆلەشكە بۇيرۇلىدۇ؛ جىنايەت شەكىللەندۈرگەنلەر قانۇن بويىچە جىنايى جاۋابكارلىققا تارتىلىدۇ.
27 – ماددا يېزىلىق (بازارلىق) خەلق ھۆكۈمەتلىرى ۋە ئۇنىڭ خادىملىرىدىن قانۇندىكى بەلگىلىمىگە خىلاپلىق قىلىپ، كەنت ئاھالىسىنىڭ قانۇنلۇق ئاپتونوم ھوقۇقى، ئاپتونوم ئىشلىرىغا ئارىلىشىۋالغانلىرى ئالاقىدار قانۇن – نىزاملار بويىچە جاۋابكارلىققا تارتىلىدۇ.
5 – باب قوشۇمچە پىرىنسىپ
28 – ماددا كەنت ئاھالە كومىتېتى تەركىبىدىكىلەر، كەنت نازارەتچىلىك كومىتېتى تەركىبىدىكىلەر ۋە كەنت ئاھالە گۇرۇپپىسى باشلىقلىرىنى سايلاشتا ‹‹شىنجاڭ ئۇيغۇر ئاپتونوم رايونىنىڭ كەنت ئاھالە كومىتېتى سايلام چارىسى››دىكى بەلگىلىمىلەر تەتبىقلىنىدۇ.
29 – ماددا بۇ چارە 2015 – يىل 3 – ئاينىڭ 1 – كۈنىدىن باشلاپ يولغا قويۇلىدۇ.
(تەرجىمىسىنى ئاپتونوم رايونلۇق خەلق قۇرۇلتىيى دائىمىي كومىتېتى قانۇن – نىزاملارنىڭ تەرجىمىسىنى بېكىتىش گۇرۇپپىسى بېكىتتى)
مەسئۇل مۇھەررىر : ئالىم راخمان
ئالاقىدار خەۋەرلەر
باش بەت قىلىڭ
بەت ساقلاڭ ئالاقىلىشىڭ بىز 
