10-دېكابىر سائەت 10:06 دە غۇلجىدىن شاڭخەيگە بارىدىغان T206/3 قېتىملىق پويىز 1000 دىن ئارتۇق يولۇچىنى ئېلىپ، غۇلجا ۋوگزالىدىن شاڭخەيگە قاراپ يولغا چىقتى، بۇنىڭ بىلەن ئىلى دەريا ۋادىسىدىن ئىچكىرىگە بىۋاسىتە قاتنايدىغان پويىز بولماسلىق تارىخىغا خاتىمە بېرىلىپ، دېڭىز بويىدىكى تەرەققىي قىلغان رايونلارغا تۇتىشىدىغان يول ئېچىلدى.
غۇلجا ۋوگزالىنىڭ مۇئاۋىن باشلىقى گې جىڭنىڭ مۇخبىرغا ئېيتىپ بېرىشىچە، لىنىيە ئېچىۋېتىلگەن تۇنجى كۈنىدە پويىزدىكى يولۇچىلار يۇرتىغا قايتقان ئىشلەمچىلەر ۋە تۇغقان يوقلايدىغان يولۇچىلارنى ئاساس قىلغان بولۇپ، جېڭجۇغا بارىدىغان يولۇچىلار ئەڭ كۆپ بولغان. بۇ پويىزنىڭ 15-دېكابىردىن بۇرۇنقى بېلىتى سېتىلىپ بولغان، 16-،17-دېكابىرنىڭ بېلىتى ئاز قالغان، 18-دېكابىردىن كېيىنكى بېلەتلەر بىرقەدەر يېتەرلىك ئىكەن. چاغانلىق ۋە تەتىللىك يولۇچى توشۇش مەزگىلىدە، بۇ پويىزنىڭ غۇلجا-ئۈرۈمچى قاتارلىق قىسقا مۇساپىلىك بېلىتى سېتىلمايدىكەن.
غۇلجىدىن شاڭخەيگە بارىدىغان T206/3 قېتىملىق پويىز سائەت 10:06 دە غۇلجا ۋوگزالىدىن قوزغىلىدىغان بولۇپ، ئۈچىنچى كۈنى سائەت 17:46 دە شاڭخەيگە يېتىپ بارىدۇ، ئومۇمىي مۇساپىگە جەمئىي 55 سائەت 40 مىنۇت ۋاقىت كېتىدۇ. بۇ لىنىيەنىڭ ئېچىۋېتىلىشى بىلەن ئىلى ئوبلاستىنىڭ ھەر قايسى ناھىيە-شەھەرلىرىدىن ئىچكىرى ئۆلكىلەرگە بېرىش ۋاقتى قىسقىراپ، ئىچكىرى ئۆلكىلەر بىلەن بولغان ئىقتىساد، مەدەنىيەت ۋە ساياھەت قاتارلىق كۆپ جەھەتتىكى ئالاقە ئالماشتۇرۇش كۈچىيىدۇ. پۇقرالارنىڭ سەپەرگە چىقىشىغا قولايلىق يارىتىلىپلا قالماي، يەنە يولۇچى توشۇشنىڭ جانلىنىش مەزگىلىدىكى بېلەت سېتىۋېلىش قىيىن بولۇش مەسىلىسى يەنىمۇ يېنىكلەيدۇ. ئۇنىڭدىن باشقا يەنە، تېخىمۇ كۆپ ساياھەتچى جەلپ قىلىنىپ، غۇلجىنىڭ ساياھەت، يېمەك-ئىچمەك، پارچە سېتىش قاتارلىق ئۈچىنچى كەسىپلىرى مىسلى كۆرۈلمىگەن تەرەققىياتلارغا ئېرىشىدۇ.