خەلق تورى ئۇيغۇرچە قانىلىنىڭ 5-دېكابىر بېيجىڭدىن بەرگەن تېلېگراممىسى: 4-دېكابىر خەلق گېزىتى چەتئەل نۇسخىسىنىڭ 4-بېتىدە ئېسىپ قويۇلغان بىر نەچچە پارچە گېلەمنىڭ سۈرىتى ۋە «ئاقسۇنىڭ غەيرىي ماددىي مەدەنىيەت كۆرگەزمىسى خاڭجۇدا ئۆتكۈزۈلدى» تېمىسىدىكى ماقالە بېرىلدى. ماقالىدە ئىخچام تىللار بىلەن ئاقسۇنىڭ «كۈسەن مەدەنىيىتى»، «دولان مەدەنىيىتى»، «ئاقسۇ ئالمىلىرى قىزاردى» قاتارلىق پائالىيەتلىرى تونۇشتۇرۇلدى.
ئىگىلىنىشىچە، بۇ يىل ئاقسۇ ۋىلايىتى ئاپتونوم رايونلۇق ھۆكۈمەت ۋە شىنجاڭغا ياردەم بېرىدىغان ئۆلكە-شەھەرلەرنىڭ ياردىمىدە، ئۆز ئەۋزەللىكىدىن پايدىلىنىپ، ئالاھىدىلىكىنى تىرىشىپ قېزىپ، بىر قاتار تەشۋىقات پائالىيىتىنى قانات يايدۇرۇپ، ئاقسۇ دېگەن بۇ نامنى پۈتۈن مەملىكەتنىڭ نەزەر دائىرىسىگە كىرگۈزدى. بۇ قېتىم خەلق گېزىتى چەتئەل نۇسخىسىنىڭ ئاقسۇ غەيرىي ماددىي مەدەنىيەت كۆرگەزمىسىنى تونۇشتۇرۇشى ئاقسۇ ۋىلايىتىنىڭ «ئاقسۇ ئالمىسى»، «كۈسەن مەدەنىيىتى»، «دولان مەدەنىيىتى» قاتارلىق ئىقتىسادىي مەدەنىيەت ئۆزگىچىلىكىنى تېخىمۇ كەڭ دائىرىدە تەشۋىق قىلىپ، ئاقسۇ نامىنى تېخىمۇ كەڭ تونۇتتى.
يېقىندا ئۆتكۈزۈلگەن ئاقسۇ ئالمىسىنى توردا تالىشىش پائالىيىتىدە نەچچە مىڭ تال ئاقسۇ ئالمىسى بىر قانچە سىكونتتىلا تۈگىگەن ئىدى، ئاقسۇ ئالمىسى زاكازلىرى تەمىنلەش مىقدارىدىن زور دەرىجىدە ئېشىپ كەتكەن بولۇپ، تورداشلارنىڭ ئىنكاسىدىن قارىغاندا، ئاقسۇ ئالمىلىرى مەملىكەت بويىچە ئالما بازىرىدا كۆرۈنەرلىك بازار ۋە شەرەپكە ئېرىشتى.
مەنبە: خەلق تورى