يېقىندا ، ئۆمۈر مۇساپىسى 78 داۋاندىن ئاشقان ، قولىدىكى قەلىمىنى 60 يىلدىن بۇيان توختاتماي تەۋرىتىپ كەلگەن پېشقەدەم شائىر توختى قاسىم خۇشالنىڭ 60 يىللىق ئەدەبىي ئىجادىيەت ئىلمىي مۇھاكىمە يىغىنى ئېچىلدى . مايتاغ نېفىت-خىمىيە سانائىتى شىركىتى زاۋۇت رايونىنىڭ رەھبەرلىرى ، قاراماي ئەدەبىيات-سەنئەتچىلەر بىرلەشمىسى ، قاراماي كەسپىي تېخنىكا ئىنىستىتۇتىنىڭ رەھبەرلىرى ۋە مايتاغ ئەدەبىيات-سەنئەتچىلەر بىرلەشمىسىنىڭ ئەزالىرى ، ئەدەبىي ئىجادىيەت ھەۋەسكارلىرى ، شائىرنىڭ ئائىلە تاۋابىئاتلىرى ، ئۇرۇغ-تۇغقان ۋە دوست بۇرادەرلىرى يىغىنغا قاتناشتى.
يىغىندا توختى قاسىم خۇشالغا تون كىيگۈزۈلۈپ ، شىنجاڭ يازغۇچىلار جەمئىيىتى ، قاراماي يازغۇچىلار جەمئىيىتى ۋە ئالاقىدار مەتبۇئات ، نەشرىيات ئورۇنلىرىنىڭ تەبرىك خەتلىرى ئوقۇپ ئۆتۈلدى . قاراماي ئەدەبىيات-سەنئەتچىلەر بىرلەشمىسىدىن كەلگەن مېھمانلار شائىرنىڭ ئىجادىيەت ھاياتىغا يۇقىرى باھا بەردى . يىغىندا يەنە توختى قاسىم خۇشال ئەسەرلىرى ھەققىدىكى مۇھاكىمە ماقالىلار ئوقۇلۇپ ، توختى قاسىم ئەسەرلىرىنىڭ بەدىئىي قىممىتى ، قەلىمىدىكى ئىزچىللىق ، تىل ئىشلىتىش ئالاھىدىلىكى توغرىسىدا چوڭقۇر مۇھاكىمە ئېلىپ بېرىلدى .