- مۇھىم
- مەملىكەت
- شىنجاڭ
- خەلقئارا
ئەڭ يېڭى سۈرەتلەر
كۇچادا ئۈچ كۈن
ئۆمەر مۇھەممەتئىمىن كروران
2014.10.28 15:28 مەنبە: خەلق تورى
1
يامغۇر پاتقاقلىغاندا يولۇمنى
يېتىلىگەنچە قولۇمنى
بىر كۆڭۈل ئېپ ماڭدى مېنى كۇچاغا.
باشئەگىم بۇرۇنقى سۈكۈتى بىلەن
قالدى ئارتتا، قالدى دوست، ئاغا.
ئەسلىمىسىگە ئەكىرىپ
شۇتاپ مېنى كىمدۇر سۆيەتتى،
كىمدۇر پېشانەمنى تىكىپ سۆكەتتى.
دۈشمەنسىز بولماس ئەر
دەخلىسىز تۇرساڭمۇ دالادا ئەگەر
يىلتىزىڭنى كولاپ باقىدۇ
سېنى ئۆچۈرگۈچكە سولاپ باقىدۇ...
ئالتۇن بولساڭ راستىنلا
ئالتۇنلۇقىڭ مەڭگۈ قالمايدۇ ئۆچۈپ.
توپا گەژگەڭگە مىنسىمۇ بەزەن
زەرگەرگە ھامىنى ئۇچرايسەن
توپا بىر پۈۋلەشتە كېتىدۇ كۆچۈپ...
تۇپرىقىغا تەگدى ئايىغىمىز،
كۈن كۇچاغا باققان چېغى تىك.
ئاپتاپ كوۋۇكلىغان يۈزلەردىن
قايماق لەيلەۋاتقان سۆزلەردىن
ئۆزىكىمگە شۇر-شۇر ئاقتى بىر يىلىك...
2
ئىزدىدىم كۈسەننى رەستە-رەستىدىن،
تارشا بىتىكلەر ئۆڭۈپ كەتكەن.
دىرىلدەر كەتمىشنىڭ ئاۋاق بەدىنى
دۈگدەيگەن خارابىلەر توڭۇپ كەتكەن.
قاپتۇ قىيادىكى مىڭ ئۆيدە
سۇجۇپ مۇڭ قاچىلاپ ياسىغان بەرباپ.
بۇددانىڭ كەئىبىسىدەك تۇرىدۇ ئەنە
كومراجىۋا ئۆگەن بويىدا
ئۇ شۇتاپ ھەيكەلسىمان تەۋەررۈك ئەرباپ.
كۈسەن كۆچكەن بۇندىن يازمىلارغا،
كۆمۈپ قويۇپ تەرجىمىھالىنى ساڭرامغا.
ئۆلگەن سەلتەنەت سارغىيىپ ياتار،
يېشى نەچچە مىڭلىق ئۆرۈلگەن تامدا.
3
«مىراجخان»دىن «بۇلبۇلجان»غىچە
ئۇچۇپ چىققان چېغى ئويماق ئېغىزدىن؛
تېتىغاندەك بولدۇم تويغىچە
سۇجۇپنىڭ تاتلىق-تاتلىق مېغىزىدىن.
ساماۋەرنى قۇندۇرۇپ باشقا،
قارلىغاچنى كۆندۈرۈپ قاشقا،
ئۇسسۇلچى تاشلىغاندا كۆڭلۈمگە قارماق،
دومىلاپ كۆزۈمدىن يامرىغان ياشتا
ئايلاندىم ئورخۇندىكى مەڭگۈ تاشقا...
پەرىلەر پورەكلىگەن كوچىلاردا
چۈشكەندە پالۋان سۈپەت ئەرلەر كۆزۈمگە
سەزدىم ئېرىشكەندەك تۈمەن قولداشقا...
قايتتىم بىر قولۇمدا كۇچانىڭ نېنى،
بىر يەشىكتە ئۆرۈكى ياغدەك.
تۇيغۇمنى بىر ئوت ئىشغال قىلىۋالدى،
پۇتۇم ئالدىمدا، كۆزۈم ئارتتا قالدى،
ۋەتىنىمنىڭ بۇ ئەزىز يۇرتى
كۆكلەتتى يۈرىكىمدە بىر نېمە تاغدەك...
2013-يىل 6-ئاينىڭ 21-كۈنى، كۇچا
مەسئۇل مۇھەررىر : ھەبىبە ئىسمائىل
ئالاقىدار خەۋەرلەر
باش بەت قىلىڭ
بەت ساقلاڭ ئالاقىلىشىڭ بىز 
