باش بەت قىلىڭ بەت ساقلاڭ ئالاقىلىشىڭ بىز
  • مۇھىم
  • مەملىكەت
  • شىنجاڭ
  • خەلقئارا

ئەڭ يېڭى سۈرەتلەر



ئالبوم







خەلق تورى>>تەنتەربىيە خەۋەرلىرى

ئۇيغۇر پۇتبول مەستانىلىرى قالتىس سۆيۈندى

2014.07.13 15:06         مەنبە: خەلق تورى

پرىنتېرلاش خەت چوڭ-كىچىكلىكى

  خەلق تورى ئۇيغۇرچە قانىلىنىڭ 12-ئىيۇل بېيجىڭدىن بەرگەن تېلېگراممىسى:

  ــــ مەن پۇتبولغا بەك قىزىقىمەن، ئىلگىرىكى دۇنيا لوڭقىسى، ياۋروپا لوڭقىسى ۋە كلۇب مۇسابىقىلىرىنى خەنزۇچە كۆرەتتىم، بۇ قېتىم شىنجاڭ تېلېۋىزىيە ئىستانسىسىنىڭ كېچىنى كېچە دېمەي نەق مەيداندىن ئۇيغۇر تىلىدا كۆرسىتىشىگە بارلىق ئۇيغۇر پۇتبول مەستانىلىرى بەكلا خوشال، دەپ ئويلايمەن! - دېدى شىنجاڭ ئۇنىۋېرسىتېتىنىڭ ئوقۇغۇچىسى پەرھات قاينام،- مەيلى ئۇلار قانداقلا چۈشەندۈرسۇن مۇشۇنداق خەلقئارا پۇتبول مۇسابىقىسىنى ئۆز ۋاقتىدا ئانا تىلىمىزدا كۆرۈۋاتقىنىمىزنىڭ ئۆزى بىر خوشاللىق.

  ــــ شىنجاڭ تېلېۋىزىيە ئىستانسىسىنىڭ بۇ قېتىم دۇنيا لوڭقىسى پۇتبول مۇسابىقىسىدىكى 64 مەيدان مۇسابىقىدىن 31 مەيداننى تاللاپ، ئەمەلىي ئەھۋالىنى نەق مەيداندىن بىۋاسىتە ئۇيغۇر تىلىدا ئۇلاپ كۆرسىتىشى شىنجاڭ تېلېۋىزىيە ئىشلىرىنىڭ تېز سۈرئەتتە تەرەققىي قىلىۋاتقىنىنى بىلدۈرۈش بىلەن بىللە كەڭ پۇتبول مەستانىلىرى قوشۇنىنىڭ تېخىمۇ زورىيىۋاتقانلىقىنى بىلدۈرىدۇ، ئەزەلدىنلا پۇتبولغا ئالاھىدە ئىشتىياقى بولغان خەلقىمىز ئۈچۈن، ئۇيغۇر تىلىدا بىۋاسىتە ئۇلاپ كۆرسىتىلىشى ئۇلارنى تېخىمۇ بەك سۆيۈندۈردى. ھازىر مەخسۇس ئۇيغۇرچە قانال تەسىس قىلىش خەلقنىڭ ئىھتىياجى، دەۋرنىڭ تەقەززاسىدۇر، شۇڭا شىنجاڭ تېلېۋىزىيە ئىستانسىسىدا مەخسۇس بىر تەنتەربىيە قانىلى تەسىس قىلىنىپ خەلقنىڭ مەنىۋى ئىھتىياجى قاندۇرۇلسا دىگەن ئۈمىدتىمەن،ــــ دېدى ئۈرۈمچى شەھەرلىك «جېڭدا» شېركىتىدىكى ئادىل ئابلا.

  ــــ شىنجاڭ تېلېۋىزىيە ئىستانىسى 5 - قانىلىنىڭ دۇنيا لوڭقىسى پۇتبول مۇسابىقىسىنى ئۇيغۇر تىلىدا بىۋاسىتە كۆرسىتىشى شىنجاڭ تېلېۋىزىيەسى تەنتەربىيە پوروگراممىلىرى تارىخىدىكى بىر بۆسۈش. تەكلىپلىك رىياسەتچىلەر ئۆز تىلىمىزدا كۆرۈرمەنلەرگە نەق مەيدان كۆرۈنۈشلىرىنى تەھلىل قىلىپ، پۇتبول بىلىملىرىنى چۈشەندۈرىشىنىڭ ئۆزىمۇ بىر بۆسۈش، بىز بۇنىڭدىن خۇرسەن بولدۇق. مۇمكىن بولسا بىزنىڭ تەكلىپلىك رىياسەتچىلىرىمىز تېخىمۇ جۇشقۇن، نەق مەيداندىكى قىزغىن جىددىي توقۇنۇشنى ئۆز ھېسسىياتى بىلەن بىرلەشتۈرۈپ، نۇتۇق جەھەتتىنمۇ تولۇق ئىپادىلەپ بېرەلىسە، تېخىمۇ ياخشى بولاتتى دەپ ئويلايمەن،ــــ دېدى يەككە تىجارەتچى ھاشىم ئوبۇل.

  ــــ دۇنيا لوڭقىسى پۇتبول مۇسابىقىسىنى نەق مەيداندىن بىۋاسىتە ئۇيغۇر تىلىدا كۆرسىتىش ئاپتونوم رايونىمىزنىڭ جەنۇبى ۋە شىمالىدىكى بىر قىسىم خەنزۇ تىلىنى ئانچە چۈشەنمەيدىغان پۇتبول ھەۋەسكارلىرىنىڭ پۇتبولنى چۈشىنىشىگە قولايلىق ئېلىپ كەلدى. بولۇپمۇ ئۇيغۇر تىلىدا توپ ۋارتاغا قانداق كىردى، قانداق يەرلەردە خاتالىق يۈز بەردى، قىزىل، سېرىق جازا كارتىلىرى نېمە ئۈچۈن بېرىلدى دېگەندەك بىر قاتار مەسىلىلەر نەق مەيداندا چۈشەندۈرۈلۈپ، كۆرۈرمەنلەرنىڭ توپ كۆرۈش قىزغىنلىقى ئاشۇرۇلدى،ــــ دېدى ئۇزۇندىن بېرى دۇنيا لوڭقىسى پۇتبول مۇسابىقىسىغا ئوخشاش مۇسابىقىلەرنى قولدىن بەرمەي كۆرۈپ كەلگەن تەڭرىتاغ رايونلۇق شەھەر باشقۇرۇش-مەمۇرىي قانۇن ئىجرا قىلىش ئىدارىسىدىكى ئىپار ھېزىم،ــــ ئۇنىڭدىن باشقا ھازىر تەكلىپلىك رىياسەتچىلەر، مۇخبىرلار، ھەر قايسى مەكتەپلەرنىڭ تەنتەربىيە ئوقۇتقۇچىلىرى تەكلىپ قىلىنىۋاتىدۇ، بۇ مەخسۇس پۇتبول كوماندىلىرىدا تۇرغان، توپ تېپىپ كۆرگەن پۇتبولچىلارغا سېلىشتۇرغاندا پۇتبول ھەققىدىكى چۈشەنچىسى تۆۋەنرەك بولىدىكەن. شۇڭا شىنجاڭ پۇتبول كوماندىسىدىن مەخسۇس پۇتبول تېپىدىغان پۇتبولچىلارنى تەكلىپ قىلىپ، رىياسەتچىلىككە قويسا، چۈشىنىشچانلىقى تېخىمۇ ئاشقان بولاتتى. كەسپىي پۇتبولچىلار نەق مەيداندىكى ئىنچىكە ھالقىلارنى، ھەر بىر توپچىنىڭ ئورنى، توپ تېپىش ئالاھىدىلىكى، توپ تېپىش ئۇسسۇلى قاتارلىق كەسپىي ئاتالغۇلارنى ئېنىق چۈشەندۈرۈپ بېرەلەيدۇ ھەم رېپىرلارنىڭمۇ قايسى كوماندىغا بەكىرەك يان بىسىۋاتقىنىنى ياكى توغرا رېپىرلىق قىلغان-قىلمىغانلىقى ھەققىدىكى مەسىلىلەرگە پۇتبول كوماندىسىدا تۇرۇپ توپ تەپكەنلەر توغرا باھا بىرەلەيدۇ.

  ــــ مەن كىچىكىمدىن توپ ئويناشقا قىزىقىمەن، شۇڭلاشقىمۇ، توپ مۇسابىقىلىرىنى كۆپ كۆرۈمەن. ھازىر شىنجاڭ تېلېۋىزىيەسى 5 - قانىلىدا دۇنيا لوڭقىسى پۇتبول مۇسابىقىسىنى ئۇيغۇر تىلىدا چۈشەندۈرۈشى ناھايىتى ياخشى بولدى. بۇ نۇرغۇن خەنزۇ تىلىنى ياخشى چۈشەنمەيدىغانلارنى ئۆز تىلىمىزدا چۈشىنىپ تۇرۇپ كۆرۈش ئىمكانىيىتىگە ئىگە قىلدى. دۇنيا لوڭقىسى پۇتبول مۇسابىقىسىنى ئۇيغۇر تىلىدا چۈشەندۈرىدىغان پۇتبول رىياسەتچىلىرى ئىنكاسى تېز، سۆز قابىلىيىتى يۇقىرى، كۆرۈرمەنلەرنى شۇ توپ مەيدانىغا باشلاپ كېرىپ تۇرۇپ، ئۇلارغا ئىنچىكە تاكتىكىلارنى، تېرىنېرنىڭ ئىدىيەسىنى، كوماندا ئەزالىرىنىڭ ئەمەلىي ئەھۋالىنى ئېنىق بىلدۈرەلىسە، قىزغىن كەيپىياتتا رىياسەتچىلىك قىلىپ، كۆرۈرمەنلەرمۇ توپ كۆرۈۋېتىپ رىياسەتچىلەر بىلەن بىرگە، توپ كىرگەندە ۋارقىراپ ئورنىدىن سەكرەپ قوپۇپ كېتىدىغان، جىددىي، قىزغىن كەيپىياتنى تۇرغۇزالىغان بولسا تېخىمۇ ياخشى بولاتتى.

  مۇخلىس فەرھاد كىچىكىدىنلا پۇتبول ئويناشنى ياخشى كۆرەتتى، ئۇ ئوتتۇرا مەكتەپ ۋە ئالىي مەكتەپلەردە ئوقۇۋاتقاندا مەكتەپ پۇتبول كوماندىسىدا توپ ئويناپلا قالماي، خىزمەتكە چىققىلى بەش – ئالتە يىل بولغان، يېشى 30 دىن ئاشقان بۈگۈنكى كۈندىمۇ يەنىلا پۇتبولغا بولغان ئوتتەك قىزىقىشىنى تاشلىمىغان ئىدى. 6- ئىيۇل ئۇنى زىيارەت قىلغىنىمىزدا ئۇ زوق – شوقى بىلەن سۆزلەپلا كەتتى:

  ــــ بۇ قېتىمقى مۇسابىقىلەر بىزنىڭ ۋاقتىمىز بويىچە بەك كەچتە ئوينىلىدىغان بولغاچقا، ئۇخلاپ قالماسلىق ئۈچۈن، دوستلار مەسلىھەتلىشىپ، بىللە كۆرۈۋاتىمىز. ئىلگىرى ھەر قېتىملىق دۇنيا لوڭقىسى پۇتبول مۇسابىقىسى، ياۋروپا لوڭقىسى پۇتبول مۇسابىقىسى، داڭلىق كلۇبلار ئارا ئۆتكۈزۈلگەن پۇتبول مۇسابىقىلىرىنى مەركىزىي تېلېۋىزىيە ئىستانسىسىنىڭ بىۋاستە ئۇلاپ كۆرسىتىشىدىن كۆرەتتۇق. شىنجاڭ تېلېۋىزىيە ئىستانسىسى بىر قانچە يىل ئىلگىرىلا دۇنيا لوڭقىسى پۇتبول مۇسابىقىسىدىن تاللاپ، ئۇيغۇر تىلىدا بىۋاستە ئۇلاپ كۆرسىتىشنى يولغا قويغان بولسىمۇ، ئەمما بۇ قېتىملىق ئۇيغۇر تىلىدا بىۋاستە ئۇلاپ كۆرسىتىش مەيلى سەۋىيە جەھەتتىن بولسۇن، مەيلى چۈشەندۈرگۈچىلەرنىڭ ئىنكاسى جەھەتتىن بولسۇن بۇرۇنقىدىن كۆپ ئىلگىرلىگەنلىكىنى ھىس قىلدۇق. گەرچە ئۆزۈم ئۇزۇن يىل توپ ئوينىغان بولساممۇ، ئەمما پۇتبولغا مۇناسىۋەتلىك نۇرغۇن ئاتالغۇنى خەنزۇچە ئاتاپ ئۆگىنىپ قالغاچقا، ئۇنىڭ ئۇيغۇرچە ئاتىلىشىنى تولۇق بىلمەيتتىم. بۇ قېتىم بىز ئاساسەن دېگۈدەك ئۇيغۇر تىلىدا بىۋاستە ئۇلاپ كۆرسىتىشنى كۆرگەچكە، پۇتبولغا ئائىت نۇرغۇن ئۇيغۇرچە ئاتالغۇلارنى بىلىۋالغاندىن سىرت، نۇرغۇن پۇتبولچىلارنىڭ ئىسمىنىمۇ تولۇق بىلىۋالدۇق.

  مۇخلىس فەرھاد سۆزىنىڭ ئاخىرىدا ، بۇنىڭدىن كېيىن مەركىزىي تېلىۋىزىيە ئىستانسىسىنىڭ تەنتەربىيە قانىلىدا ھەپتىدە بىر بېرىلىدىغان «تەنتەربىيە دۇنياسى (足球天下)»غا ئوخشاش پروگراممىلارنى شۇ كۈنىلا ئۇيغۇر تىلىغا تەرجىمە قىلىپ كۆرسەتكەن بولسا، بىزدەك ئۇيغۇر پۇتبول مەستانىلىرى دۇنيا پۇتبولچىلىقى ۋە پۇتبول چولپانلىرىنىڭ يېقىنقى ئەھۋالىدىن ۋاقتىدا خەۋەردار بولۇپ تۇرغان بولاتتۇق، دەپ ئۆزىنىڭ ۋە دوستلىرىنىڭ ئارزۇسىنى ئوتتۇرىغا قويدى.

  يېشى 50 لەرگە بېرىپ قالغان ئەنۋەرمۇ قىزغىن توپ مەستانىلىرىنىڭ بىرى ئىدى. ئۇمۇ ئوخشاشلا، بۇ قېتىملىق دۇنيا لوڭقىسى پۇتبول مۇسابىقىسىنىڭ ھەر بىر مەيدان مۇسابىقىسىنى تولۇق كۆرۈپ كېلىۋاتاتتى. 4- ئىيۇل ئەنۋەرگە تېلېفون قىلغىنىمىزدا، ئۇ يېقىن ئۆتىدىغان ئۈچ ئائىلىدىكىلەرنىڭ بىرلىكتە توپ كۆرۈش ئۈچۈن، شۇلاردىن بىرىنىڭ جەنۇبىي تاغدىكى ئۆيىگە چىققانلىقىنى ئېيتتى.

  ـــ پۇتبول مۇسابىقىسىنى ئاغىينىلەر بىللە كۆرسە، كەيپىيات تېخىمۇ يۇقىرى بولىدىكەن، ئۇيغۇر تىلىدا چۈشەندۈرىشىنى ئاڭلاپ كۆرسە، ئادەمنى خۇددى ئۆزىمىزنىڭ تەنھەركەتچىلىرى ئويناۋاتقاندەك ھىسسىياتقا كەلتۈرۈپ، تېخىمۇ يېقىنلىق تۇيغۇسى بېرىدىكەن. بۇ قېتىمقى ئۇيغۇر تىلىدا بىۋاستە ئۇلاپ كۆرسىتىشكە قاتناشقان بارلىق يولداشلارغا ئۇيغۇر توپ مەستانىلىرى نامىدىن چوڭقۇر رەھمەت ئېيتىمەن، ئۇلار ھەقىقەتەن كۆپ، ئەتراپلىق تەييارلىق كۆرۈپتۇ. بۇنىڭدىن كېيىن دۇنيادىكى داڭلىق كلۇبلار ئارا مۇسابىقىدىن ھەپتىدە بىرەر مەيدان تاللاپ، ھازىرقىدەك ئۇيغۇر تىلىدا بىۋاستە ئۇلاپ كۆرسەتكەن بولسا، قالتىس خۇش بولغان بولاتتۇق. بۇ ماڭا ئوخشاش نۇرغۇن كىشىلەرنىڭ مەنىۋىي تۇرمۇشىنى مەلۇم دەرىجىدە بېيىتقان بولاتتى،ــــ دېدى ئەنۋەر بىزگە.

  قەلبىنۇر ئابدۇرېشىت بىلەن پاراڭلىشىپ ئولتۇرۇپ، ئۇنىڭمۇ ھەر كۈنى دېگۈدەك ئوغلىغا ھەمراھ بولۇپ، بۇ قېتىمقى دۇنيا لوڭقىسى پۇتبول مۇسابىقىسىنى كۆرىۋاتقانلىقىدىن خەۋەر تاپتۇق.

  ــــ ئوغلۇم بۇ يىل تولۇقسىز 3 – يىللىققا چىقتى، ئۇ پۇتبولنى بەك ياخشى كۆرۈدۇ، ئېرىم خىزمەتكە تەسىر يېتىشىدىن ئەنسىرەپ يېرىم كېچىدە بېرىلىدىغان مۇسابىقىنى كۆرمەيۋاتىدۇ. مەن ئۆيدە دەم ئېلىۋاتقان بولغاچقا، ئوغلۇمغا ھەمراھ بولۇپ كۆرگەچ، پۇتبولغا ئائىت خېلى كۆپ نەرسىلەرنى بىلىۋالدىم. خەنزۇ تىلىدا ئوقۇيدىغان ئوغلۇممۇ مېنىڭ تەلىپىم بويىچە ئۇيغۇر تىلىدىكى بىۋاستە ئۇلاپ كۆرسىتىشنى كۆرۈپ، ئوبدانلا كۆنۈپ قالدى. ئۇيغۇر تىلىدا چۈشەندۈرۈلۈۋاتقان بولغاچقا، مەنمۇ ئوغلۇمغا ماسلىشىپ تەڭ مۇلاھىزە قىلىپ قويىمەن تېخى،ــــ دېدى قەلبىنۇر بىزگە.

  مۇھەررىر: ت. ئا.ئەركمان

  مەنبە: خەلق تورى

مەسئۇل مۇھەررىر : ئالىم راخمان

${KEYWORD}

ئالاقىدار خەۋەرلەر