«قىزىل تۇتۇش بۇيرۇقى چىقىرىلغان جىنايەتچى» شۈ گوجۈننىڭ ئومۇمنىڭ پۇلىغا خىيانەت قىلىش، يۆتكەپ ئىشلىتىش دېلوسىغا بىرىنچى سوتتا ھۆكۈم ئېلان قىلىندى!

　　قىزىل تۇتۇش بۇيرۇقى چىقىرىلغان خادىم جۇڭگو بانكىسى كەيپىڭ تارماق بانكىسىنىڭ سابىق باشلىقى شۈ گوجۈننىڭ ئومۇمنىڭ پۇلىغا خىيانەت قىلىش، يۆتكەپ ئىشلىتىۋېلىش دېلوسىغا 1-سوتتا ھۆكۈم ئېلان قىلىندى

　　2023-يىل 13-دېكابىر گۇاڭدۇڭ ئۆلكىسى جياڭمېن شەھەرلىك ئوتتۇرا خەلق سوت مەھكىمىسى جۇڭگو بانكىسى كەيپىڭ تارماق بانكىسىنىڭ سابىق باشلىقى شۈ گوجۈننىڭ ئومۇمنىڭ پۇلىغا خىيانەت قىلىش، يۆتكەپ ئىشلىتىۋېلىش دېلوسىغا ئاشكارا ھۆكۈم ئېلان قىلىپ، خىيانەتچىلىك جىنايىتى، ئومۇمنىڭ پۇلىنى يۆتكەپ ئىشلىتىۋېلىش جىنايىتى بىلەن جاۋابكار شۈ گوجۈنگە مۇددەتسىز قاماق جازاسى بېرىشنى قارار قىلدى. شۇنداقلا، شۈ گوجۈن سىياسىي ھوقۇقىدىن ئۆمۈرۋايەت مەھرۇم قىلىنىدۇ ۋە قوشۇمچە بارلىق شەخسىي مال-مۈلكى مۇسادىرە قىلىنىدۇ، جىنايەت تاپاۋىتى ۋە ئۇنىڭ تۇغۇندىسى قايتۇرۇۋېلىنىدۇ. شۈ گوجۈن سوت مەھكىمىسىنىڭ ھۆكۈمىگە بويسۇنىدىغانلىقىنى، نارازىلىق ئەرزى سۇنمايدىغانلىقىنى بىلدۈردى. شۈ گوجۈن 2001-يىلى جىنايىتىدىن قورقۇپ قېچىپ كەتكەن. 2002-يىلى خەلقئارا جىنايى ئىشلار ساقچى تەشكىلاتى تەرىپىدىن خەلقئارا قىزىل رەڭلىك ئومۇمىي ئۇقتۇرۇش ئېلان قىلىنغان. 2021-يىلى ئامېرىكىدىن مەجبۇرىي دۆلەتكە قايتۇرۇلغان.

　　قاراپ چىقىپ ئېنىقلىنىشىچە، 1993-يىلىدىن 2001-يىلىغىچە، جاۋابكار شۈ گوجۈن جۇڭگو بانكىسى كەيپىڭ تارماق بانكىسى ئىشخانىسىنىڭ مۇدىرى، مۇئاۋىن بانكا باشلىقى، بانكا باشلىقى قاتارلىق ۋەزىپىلەردىكى قولايلىقتىن پايدىلىنىپ، شۈ چاۋفەن، يۈ جېندۇڭ قاتارلىقلار بىلەن بىرلىشىپ، ساختا قەرز پۇل بېجىرىش ئارقىلىق بانكا مەبلىغىنى ئالداپ ئېلىۋېلىش، شىركەتنىڭ نورمال قەرز قايتۇرۇش مەبلىغىنى ئىگىلىۋېلىش ياكى بىۋاسىتە پۇل يۆتكەش قاتارلىق ۋاسىتىلەرنى قوللىنىپ، 62 مىليون 217 مىڭ 300 يۈەن ھۆكۈمەت پۇلىغا، 363 مىليون يۈەن شياڭگاڭ پۇلىغا، 1 مىليون 461 مىڭ يۈەن گېرمانىيە پۇلىغا خىيانەت قىلغان. بۇنى خەلق پۇلىغا سۇندۇرغاندا 900 مىليون يۈەندىن ئاشقان؛ 355 مىليون يۈەن ھۆكۈمەت پۇلى، 20 مىليون يۈەن شياڭگاڭ پۇلى، 126 مىليون يۈەن ئامېرىكا دوللىرى يۆتكەپ ئىشلىتىلگەن. بۇنى خەلق پۇلىغا سۇندۇرغاندا 1 مىليارد 400 مىليون يۈەندىن ئاشىدۇ. جياڭمېن شەھەرلىك ئوتتۇرا خەلق سوت مەھكىمىسى مۇنداق دەپ قارىدى: جاۋابكار شۈ گوجۈننىڭ قىلمىشىدىن خىيانەتچىلىك جىنايىتى، ئومۇمنىڭ پۇلىنى ئىشلىتىۋېلىش جىنايىتى شەكىللىنىدۇ، خىيانەت سوممىسى پەۋقۇلئاددە كۆپ ھەمدە دۆلەت ۋە خەلقنىڭ مەنپەئەتىنى پەۋقۇلئاددە زور زىيانغا ئۇچراتقان، ئومۇمنىڭ پۇلىنى ئىشلىتىۋېلىش سوممىسى زور. شۈ گوجۈننىڭ سوتقا بارغاندىن كېيىن ئۆزىنىڭ جىنايىتىنى ئېتىراپ قىلىپ جىنايىتىگە پۇشايمان قىلغانلىقى ۋە جىنايىتىگە توۋا قىلغانلىقىنى كۆزدە تۇتۇپ، قانۇن بويىچە ئۇنىڭغا يېنىك جازا بېرىلسە بولىدۇ، شۇڭا سوت مەھكىمىسى يۇقىرىقى ھۆكۈمنى چىقاردى. خەلق قۇرۇلتىيى ۋەكىللىرى، ئاخبارات مۇخبىرلىرى ۋە جەمئىيەتتىكى ھەر ساھە ئاممىسىدىن 20 دىن ئارتۇق كىشى سوتنى سىرتتىن ئاڭلىدى.

　　مەنبە: خەلق تورى