سۈرەتتە: ئۇزۇن سەپەر يۈرۈشلۈك توشۇغۇچى راكېتانىڭ 301 قېتىملىق ئۇچۇشى.
خەلق تورى ئۇيغۇرچە قانىلىنىڭ 1- ئاپرىل بېيجىڭدىن بەرگەن تېلېگراممىسى: 3-ئاينىڭ 21-كۈنى سائەت 23تىن 51 مىنۇت ئۆتكەندە، ئېلىمىزنىڭ شىچاڭ سۈنئىي ھەمراھ قويۇپ بېرىش مەركىزىدە، ئۇزۇن سەپەر 3-نومۇرلۇق B بەلگىلىك توشۇغۇچى راكېتا ئارقىلىق تيەنليەن 2-نومۇرلۇق 01 سۈنئىي ھەمراھى ئالەم بوشلۇقىغا يەتكۈزۈلدى، سۈنئىي ھەمراھ يەر شارىنىڭ ماس قەدەملىك ئوربىتىسىغا ئوڭۇشلۇق كىردى. بۇ قېتىملىق ۋەزىپە ئۇزۇن سەپەر سىستېمىسىدىكى راكىتالارنىڭ 301-قېتىملىق ئۇچۇشى بولۇپ قالدى.
تيەنليەن 2-نومۇرلۇق 01 سۈنئىي ھەمراھ بولسا دۆلىتىمىزنىڭ 2-ئەۋلاد سانلىق مەلۇمات داۋاملاشتۇرغۇچى سۈنئىي ھەمراھ سىستېمىسىنىڭ تۇنجى سۈنئىي ھەمراھى بولۇپ، ئادەملىك ئالەم ئۇچقۇسى، سۈنئىي ھەمراھ، توشۇغۇچى راكېتا ۋە غەيرىي ئالەم ئۇچقۇسى ئابونتلىرىنى سانلىق مەلۇمات داۋاملاشتۇرۇش، ئۆلچەپ كونتروللاش ۋە يوللاش قاتارلىق مۇلازىمەتلەر بىلەن تەمىنلەيدۇ.
تيەنليەن 2-نومۇرلۇق داۋاملاشتۇرغۇچى سۈنئىي ھەمراھى سىستېمىسى ۋەزىپە پىلانلاش، سىستېما باشقۇرۇش، كەسپىي يۈرۈشتۈرۈش جەھەتتە تيەنليەن 1-نومۇرلۇق داۋاملاشتۇرغۇچى سۈنئىي ھەمراھ سىستېمىسىغا قارىغاندا كۆرۈنەرلىك ئىلگىرىلەشلەرنى قولغا كەلتۈرگەن بولۇپ، سانلىق مەلۇمات يوللاش تېزلىك نىسبىتى ۋە كۆپ نىشانلىق مۇلازىمەت ئىقتىدارىمۇ زور دەرىجىدە ئۆستۈرۈلۈپ، يۇقىرى ، ئوتتۇرا، تۆۋەن ئوربىتىلىق سۈنئىي ھەمراھ، ئادەملىك ئالەم ئۇچقۇسىنىڭ ئۇچۇر قايتۇرۇش ئۈنۈمى، ئوربىتىدا يۈرۈش بىخەتەرلىكى ۋە ۋەزىپىسىنى يولغا قويۇش جانلىقلىقىنى ئاشۇرۇشتا مۇھىم رولىنى جارى قىلدۇرىدۇ.
كۆرۈپ بېكىتكۈچى: ياسىن قادىر
مەنبە: خەلق تورى