سۈرەتتە: 5-ئاينىڭ 1-كۈنى، دۆلەت كومىسسارى، قوشۇمچە دىپلوماتىيە مىنىستىرى ۋاڭ يى بېيجىڭدا دومىنىكا جۇمھۇرىيىتىنىڭ دىپلوماتىيە مىنىستىرى بارگاس بىلەن «جۇڭخۇا خەلق جۇمھۇرىيىتى بىلەن دومىنىكا جۇمھۇرىيىتىنىڭ دىپلوماتىك مۇناسىۋەت ئورنىتىش توغرىسىدىكى بىرلەشمە ئاخباراتى»نى ئىمزالىدى.
خەلق تورى ئۇيغۇرچە قانىلىنىڭ 2- ماي بېيجىڭدىن بەرگەن تېلېگراممىسى: دۆلەت كومىسسارى، قوشۇمچە دىپلوماتىيە مىنىستىرى ۋاڭ يى 1-ماي چۈشتىن بۇرۇن دومىنىكا جۇمھۇرىيىتىنىڭ دىپلوماتىيە مىنىستىرى بارگاس بىلەن بېيجىڭدا «جۇڭخۇا خەلق جۇمھۇرىيىتى بىلەن دومىنىكا جۇمھۇرىيىتىنىڭ دىپلوماتىك مۇناسىۋەت ئورنىتىش توغرىسىدىكى بىرلەشمە ئاخباراتى»نى ئىمزالىدى، بىرلەشمە ئاخباراتنىڭ ئاساسىي مەزمۇنى تۆۋەندىكىچە:
جۇڭخۇا خەلق جۇمھۇرىيىتى بىلەن دومىنىكا جۇمھۇرىيىتى ئىككى دۆلەت خەلقىنىڭ مەنپەئەتى ۋە ئارزۇسىغا ئاساسەن، ئاخبارات ئىمزالانغان كۈندىن باشلاپ ئۆزئارا ئېتىراپ قىلىشنى ھەمدە باش ئەلچى دەرىجىلىك دىپلوماتىك مۇناسىۋەت ئورنىتىشنى قارار قىلدى.
ئىككى دۆلەت ھۆكۈمىتى ئۆزئارا ئىگىلىك ھوقۇقى ۋە زېمىن پۈتۈنلۈكىگە ھۆرمەت قىلىش، ئۆزئارا تاجاۋۇز قىلىشماسلىق، بىر-بىرىنىڭ ئىچكى ئىشلىرىغا ئارىلاشماسلىق، باراۋەرلىكتە ئۆزئارا مەنپەئەت يەتكۈزۈش، تىنچلىقتا بىللە تۇرۇش پىرىنسىپى ئاساسىدا ئىككى دۆلەتنىڭ دوستلۇق مۇناسىۋىتىنى راۋاجلاندۇرۇشقا قوشۇلدى.
دومىنىكا جۇمھۇرىيىتى ھۆكۈمىتى دۇنيادا بىرلا جۇڭگو بارلىقىنى، جۇڭخۇا خەلق جۇمھۇرىيىتى ھۆكۈمىتىنىڭ جۇڭگونىڭ بىردىنبىر قانۇنلۇق ھۆكۈمىتى ئىكەنلىكىنى، تەيۋەننىڭ جۇڭگونىڭ ئايرىلماس بىر قىسمى ئىكەنلىكىنى ئېتىراپ قىلىدۇ. بۇنىڭغا ئاساسەن، دومىنىكا جۇمھۇرىيىتى ھۆكۈمىتى شۇ كۈندىن باشلاپ تەيۋەن بىلەن بولغان «دېپلوماتىك مۇناسىۋەت»نى ئۈزىدۇ.
جۇڭگو-دومىنىكا دىپلوماتىك مۇناسىۋەت ئورنىتىش ئاخباراتىغا بېيجىڭدا ئىمزا قويۇلۇشتىن بۇرۇن، دومىنىكا زۇڭتۇڭى ئۇقتۇرۇش ئېلان قىلىپ، بىر جۇڭگو پىرىنسىپىنى ئېتىراپ قىلىدىغانلىقىنى، تەيۋەن رايونى بىلەن بولغان ئاتالمىش «دىپلوماتىك مۇناسىۋەت»نى ئۈزگەنلىكىنى جاكارلىدى.
كۆرۈپ بېكىتكۈچى: ياسىن قادىر
مەنبە: خەلق تورى