خەلق تورى ئۇيغۇرچە قانىلىنىڭ 26-ئىيۇل بېيجىڭدىن بەرگەن تېلېگراممىسى: 9-نۆۋەتلىك خەلقئارا ياشلار يادرو ئېنېرگىيە يىغىنى 26-ئىيۇل تۇنجى قېتىم ئېلىمىزدە ئېچىلدى، 32 دۆلەت ۋە رايوندىن كەلگەن 500 گە يېقىن يادرو پەن-تېخنىكىسىدىكى ياش مۇتەخەسسىس خاڭجۇ شىزىخۇ كۆلىگە جەم بولۇپ، يادرو ئېنېرگىيەسىنىڭ كەلگۈسى تەرەققىياتى توغرىسىدا پىكىر ئالماشتۇرۇپ ئورتاق ئىزدەندى. مۇخبىرنىڭ يىغىندىن ئىگىلىشىچە، 7-ئايغىچە، جۇڭگونىڭ قۇرۇقلۇق يادرو ئېلېكتىر ئومۇمىي قۇرۇلمىسى سىغىمى 55 مىليون كىلوۋاتقا يەتكەن، بۇنىڭ ئىچىدە ئايلىنىۋاتقان يادرو ئېلېكتىر ماشىنا گۇرۇپپىسى 34، قۇرۇلۇۋاتقان ماشىنا گۇرۇپپىسى 20 بولۇپ، قۇرۇلۇۋاتقان يادرو ئېلېكتىر ماشىنا گۇرۇپپىسى كۆلىمى بويىچە دۇنيادىكى ئالدىنقى قاتارغا ئۆتتى.
بۇ نۆۋەتلىك «يادرو ئېنېرگىيەسى ئارقىلىق بەختلىك تۇرمۇش يارىتايلى» ئاساسىي تېمىسىدىكى ياشلار يادرو ئېنېرگىيە يىغىنىنى خەلقئارا ياشلار يادرو ئېنېرگىيە كېڭىشى تەشكىللىگەن بولۇپ،بىر ھەپتىدە، دۇنيانىڭ ھەرقايسى جايلىرىدىن كەلگەن ياشلار ۋەكىللىرى خاڭجۇغا جەم بولۇپ، يادرو ئېنېرگىيەسى، يادرو يېقىلغۇسىنىڭ ئايلىنىشى، يادرو خەۋپسىزلىكى، يادرو سىنتېزلىنىشى، يادرو تېخنىكىسىنىڭ ئەمەلىي قوللىنىلىشى، ئاۋامنىڭ قاتنىشىشى، ئىختىساسلىقلارنى يېتىشتۈرۈش قاتارلىق قىزىق نۇقتا تېمىلىرىنى چۆرىدەپ، دۆلەت دوكلاتى، ئاساسىي مەقسەت دوكلاتى ۋە تېخنىكا مۇزاكىرىسى قاتارلىق شەكىللەر ئارقىلىق خەلقئارا ئاتوم ئېنېرگىيە ئاپپاراتى قاتارلىقلار بىلەن ئورتاق پىكىر ئالماشتۇرىدۇ.
شىنجاڭ گېزىتى تەرجىمىسى
مەنبە: خەلق تورى