تەيۋەننىڭ شىنبېي شەھىرىدىكى سەككىز ئەۋلىيا باغچىسىدا 27-ئىيۇن كەچ ئۆتكۈزۈلگەن ھەسەن- ھۈسەن يىغىلىشىدا ئوت كېتىپ، چاڭ - توزانلىق پارتلاش يۈز بېرىپ 474 ئادەم يارىلانغان، بۇنىڭ ئىچىدە چوڭ قۇرۇقلۇقتىن بارغان ئۈچ ئادەم بار ئىكەن. خەۋەردە ئېيتىلىشىچە، بۇ شىنبېي شەھىرىدىكى ئاپەتتىن قۇتقۇزۇش تارىخىدا كۆرۈلگەن يارىلانغانلار سانى ئەڭ كۆپ بولغان بىر قېتىملىق ھادىسە ئىكەن .
مۇناسىۋەتلىك تارماقلارنىڭ بىلدۈرۈشىچە، نۆۋەتتە دوختۇرخانىغا ئېلىپ بېرىلغانلار ئىچىدە قازا قىلغانلار يوق ئىكەن.
شىنبېي شەھەرلىك سەھىيە ئىدارىسىنىڭ 28- ئىيۇن سەھەر سائەت 4:00 گىچە قىلغان ئىستاتىستىكىسىدا قۇتقۇزۇش ئاپتوموبىلى بىلەن دوختۇرخانىغا ئېلىپ بېرىلغان ۋە دوختۇرخانىغا ئۆزى بارغان يارىدارلارنىڭ سانى 431 غا يەتكەنلىكى كۆرسىتىلگەن ، بۇ سان داۋاملىق كۆپىيىشى مۇمكىنكەن ، بۇنىڭدىن باشقا يەنە نۇرغۇن ئېغىر يارىدارلار دوختۇرخانىدا كۈزىتىلىۋېتىپتۇ.
ساقچى تەرەپ 27- ئىيۇن كېچىدە ۋەقە يۈز بەرگەن نەق مەيداندىن رەڭلىك چاڭ - توزان چاچقان ئىككى نەپەر خىزمەتچى خادىمنى تۇتۇپ كەتكەن ، كېيىن يەنە بۇنىڭغا مۇناسىۋەتلىك نۇرغۇن ئادەم كېچىلەپ سوراق قىلىنغان ھەمدە نەق مەيداندا پائالىيەتكە مەسئۇل خادىم لۈ جۇڭجى، نەق مەيداندا ئۈسكۈنىلەرگە مەسئۇل خادىم چيۇ بومىڭ، ئالاھىدە خادىم لياۋ جۈنمىڭ قاتارلىقلارمۇ سەھەر سائەت 3 دە ساقچى ئىدارىسىغا ئېلىپ بېرىلغان.
شىنبيې شەھىرىنىڭ باشلىقى جۇ لىلۇن 27-ئىيۇن كەچتە سەككىز ئەۋلىيا باغچىسىنىڭ دەرھال تىجارەت توختىتىشىنى تەلەپ قىلغان.