لى چياڭ شاڭخەي ھەمكارلىق تەشكىلاتىغا ئەزا دۆلەتلەر ھۆكۈمەت باشلىقلىرى (زۇڭلىلىرى) كېڭىشىنىڭ 22-قېتىملىق يىغىنىغا قاتناشتى

　　شۇ جاي ۋاقتى 10-ئاينىڭ 26-كۈنى چۈشتىن بۇرۇن، گوۋۇيۈەن زۇڭلىسى لى چياڭ بىشكەكتە شاڭخەي ھەمكارلىق تەشكىلاتىغا ئەزا دۆلەتلەر ھۆكۈمەت باشلىقلىرى (زۇڭلىلىرى) كېڭىشىنىڭ 22-قېتىملىق يىغىنىغا قاتناشتى.

　　شىنخۇا ئاگېنتلىقى مۇخبىرى يۆ يۆۋېي فوتوسى

　　شۇ جاي ۋاقتى 10-ئاينىڭ 26-كۈنى چۈشتىن بۇرۇن، گوۋۇيۈەن زۇڭلىسى لى چياڭ بىشكەكتە شاڭخەي ھەمكارلىق تەشكىلاتىغا ئەزا دۆلەتلەر ھۆكۈمەت باشلىقلىرى ( زۇڭلىلىرى ) كېڭىشىنىڭ 22-قېتىملىق يىغىنىغا قاتناشتى. قازاقىستان زۇڭلىسى سىمايلوف، رۇسىيە زۇڭلىسى مىشۇستىن، تاجىكىستان زۇڭلىسى راسۇلزودا، ئۆزبېكىستان زۇڭلىسى ئارىپوف، ئىراننىڭ بىرىنچى مۇئاۋىن زۇڭتۇڭى مۇخبېر، ھىندىستان، پاكىستان دىپلوماتىيە مىنىستىرى ۋە كۆزەتكۈچى دۆلەتلەر، بېلورۇسىيە زۇڭلىسى گولوفچىنكو، موڭغۇلىيە زۇڭلىسى ئويۇنئېردېڭ قاتارلىقلار يىغىنغا قاتناشتى. قىرغىزىستان زۇڭلىسى جاپپاروف يىغىنغا رىياسەتچىلىك قىلدى.

　　لى چياڭ سۆزىدە مۇنۇلارنى بىلدۈردى: بۇ يىل 7-ئايدىكى شاڭخەي ھەمكارلىق تەشكىلاتى باشلىقلار يىغىنىدا «شاڭخەي روھى»نى ئەۋج ئالدۇرۇپ، تېخىمۇ زىچ شاڭخەي ھەمكارلىق تەشكىلاتى تەقدىرداشلار ئورتاق گەۋدىسى بەرپا قىلىش توغرىسىدا يەنىمۇ ئىلگىرىلىگەن ھالدا مۇھىم ئورتاق تونۇش ھاسىل قىلىنىپ، نۇقتىلىق ۋەزىپىلەر ئايدىڭلاشتۇرۇلدى، جۇڭگو ھەرقايسى تەرەپلەر بىلەن بىرلىكتە دۆلەت باشلىقلىرى يىغىنىنىڭ روھىنى ياخشى ئەمەلىيلەشتۈرۈشنى خالايدۇ. شاڭخەي ھەمكارلىق تەشكىلاتىنىڭ ئەسلىي مەقسىتىنى ئەسلىسەك، بىزنىڭ بىر يەرگە كېلىشىمىزدىكى سەۋەب رايون ئىشلىرىغا رايون سىرتىدىكى دۆلەتلەرنىڭ كاشىلىسىغا ئۇچرىماي، شۇ رايوندىكى دۆلەتلەر ئۆزى ئىگە بولۇش، مەسلىھەتلىشىپ ئىش كۆرۈش ئىمكانىيىتىگە ئىگە قىلىشتىن ئىبارەت. بۇلتۇرقى سەمەرقەنت باشلىقلار يىغىنىدا رەئىس شى جىنپىڭ سىياسىي جەھەتتە ئۆزئارا ئىشىنىش، ھەمكارلىقتا باراۋەر مۇئامىلە قىلىش، ئېچىۋېتىش، كەڭ قورساق بولۇش، ئادىللىق ۋە ھەققانىيلىقتا چىڭ تۇرۇش شاڭخەي ھەمكارلىق تەشكىلاتىنىڭ تەرەققىي قىلىپ زورىيىشىدىكى مۇۋەپپەقىيەتلىك يول، دەپ تەكىتلىگەن. كەلگۈسىگە نەزەر سالساق، ئەسلىي مەقسىتىمىز ۋە بۇرچىمىزنى ئېسىمىزدە چىڭ ساقلاپ، مۇۋەپپەقىيەت قازىنىش يولىدا چىڭ تۇرۇپ، ئىنسانىيەت تەقدىرى ئورتاق گەۋدىسى بەرپا قىلىش ئىدىيەسىنىڭ يېتەكچىلىكىدە، ئىنسانىيەت تەقدىرى ئورتاق گەۋدىسى بەرپا قىلىش ئىدىيەسىنىڭ يېتەكچىلىكىدە، بىر نىشانغا قاراپ ئىلگىرىلەپ، ئۆزئارا نەتىجە يارىتىپ، ھەرقايسى ساھەلەردىكى ھەمكارلىقنى پۇختا ئالغا سىلجىتىپ، مەزكۇر رايون ھەم دۇنيانىڭ تىنچلىقى ۋە تەرەققىياتى ئۈچۈن تېخىمۇ كۆپ ئېنىقلىق ۋە ئاكتىپ كۈچ قوشۇشىمىز كېرەك.

　　لى چياڭ شاڭخەي ھەمكارلىق تەشكىلاتىنىڭ ھەمكارلىقىنى چوڭقۇرلاشتۇرۇش توغرىسىدا تۆت تۈرلۈك تەكلىپ بەردى: بىرىنچى، رايون بىخەتەرلىك توسىقىنى ئورتاق مۇستەھكەملەپ، سىرتنىڭ ئارىلىشىشىغا قەتئىي قارشى تۇرۇپ، مەزكۇر تەشكىلاتنىڭ بىخەتەرلىك تەھدىتى ۋە خىرىسىغا تاقابىل تۇرۇش مېخانىزمىنى تېزدىن مۇكەممەللەشتۈرۈش كېرەك،«ئۈچ خىل كۈچ» ۋە دۆلەت ھالقىغان تەشكىلات جىنايىتىگە قاتتىق زەربە بېرىش كېرەك. ئىككىنچى، ئىقتىسادنىڭ تېز ئەسلىگە كېلىشىنى ئورتاق ئىلگىرى سۈرۈپ، بىخەتەر، يۇقىرى ئۈنۈملۈك قاتناش سىستېمىسى بەرپا قىلىپ، سودا سېلىنمىسىنى ئەركىنلەشتۈرۈش ۋە قولايلاشتۇرۇشنى ئۈزلۈكسىز ئىلگىرى سۈرۈپ، كەسىپ زەنجىرى ۋە تەمىنلەش زەنجىرىنىڭ مۇقىم، راۋان بولۇشىنى قوغداش كېرەك. ئۈچىنچى، «بىر بەلباغ، بىر يول»قۇرۇلۇشىنى ئورتاق ئىلگىرى سۈرۈش كېرەك. 3-نۆۋەتلىك «بىر بەلباغ، بىر يول» خەلقئارا ھەمكارلىق باشلىقلار مۇنبىرى مۇۋەپپەقىيەتلىك ئۆتكۈزۈلدى، بۇ 10 يىلدىن بۇيان، «بىر بەلباغ، بىر يول» بۈگۈنكى دۇنيادىكى ئەڭ ئالقىشقا ئېرىشكەن خەلقئارا ئاممىۋى مەھسۇلات ۋە ئەڭ چوڭ كۆلەمدىكى خەلقئارا ھەمكارلىق سۇپىسىغا ئايلاندى. يۇقىرى سۈپەتلىك «بىر بەلباغ، بىر يول»نى ئورتاق قۇرۇشنى ھەرقايسى دۆلەتلەرنىڭ تەرەققىيات ئىستراتېگىيەسى بىلەن جىپسىلاشتۇرۇشنى كۈچەيتىپ، مۇھىم ئىقتىساد كارىدورى قۇرۇلۇشىنى يەنىمۇ ئىلگىرى سۈرۈپ، شاڭخەي ھەمكارلىق تەشكىلاتى تەرەققىيات بانكىسىنى ياخشى قۇرۇش كېرەك. تۆتىنچى، خەلقنىڭ ئىناق ئۆتۈشىنى ئورتاق ئىلگىرى سۈرۈپ، مائارىپ، مەدەنىيەت، ساياھەت، تەنتەربىيە قاتارلىق جەھەتلەردىكى ھەمكارلىقنى ئۈزلۈكسىز چوڭقۇرلاشتۇرۇش كېرەك.

　　يىغىنغا قاتناشقان ھەرقايسى تەرەپلەر شاڭخەي ھەمكارلىق تەشكىلاتىنىڭ «شاڭخەي روھى»نى جارى قىلدۇرۇشقا كۈچ چىقىرىپ، قۇرۇلغانلىقىغا 22 يىل بولغاندىن بۇيان ئۈزلۈكسىز تەرەققىي قىلىپ زورايغانلىقى، خەلقئارادىكى تەسىر كۈچىنىڭ كۈنسېرى ئاشقانلىقىنى بىلدۈردى. دۆلەت باشلىقلىرى كېڭىشىنىڭ ئورتاق تونۇشىنى ئەمەلىيلەشتۈرۈپ، «ئۈچ خىل كۈچ» ۋە دۆلەت ھالقىغان تەشكىلات جىنايىتىگە ئورتاق زەربە بېرىپ، ئىقتىساد-سودا، قاتناش، يېزا ئىگىلىكى، ئېنېرگىيە، پۇل مۇئامىلە، يۇقىرى، يېڭى تېخنىكا، ئېكولوگىيەلىك مۇھىتنى ئاسراش، يېشىل تەرەققىيات قاتارلىق ساھەلەردىكى ھەمكارلىقنى كۈچەيتىپ، «بىر بەلباغ، بىر يول»نى ئورتاق قۇرۇشنى ئىلگىرى سۈرۈپ، ئۇل ئەسلىھەلەرنى تۇتاشتۇرۇشنى مۇكەممەللەشتۈرۈپ، ساياھەت، مائارىپ قاتارلىق ئادىمىيەت ئالاقىسىنى چوڭقۇرلاشتۇرۇش كېرەك. ھەرقايسى تەرەپلەر شاڭخەي ھەمكارلىق تەشكىلاتىنىڭ مېخانىزم قۇرۇلۇشىنى كۈچەيتىپ، ھەقىقىي كۆپ تەرەپچىللىكنى ئەمەلىيەتتە كۆرسىتىپ، قول تۇتۇشۇپ رايون بىخەتەرلىكىنى قوغداپ، رايون گۈللىنىشىنى ئىلگىرى سۈرۈپ، خەلقئارا سىستېمىنىڭ تېخىمۇ سىغدۇرۇشچان، ئىمكانىيەتلىك سىجىل يۆنىلىشكە قاراپ تەرەققىي قىلىشىغا تۈرتكە بولۇشقا قوشۇلدى.

　　لى چياڭ يىغىنغا قاتناشقان ئەزا دۆلەت رەھبەرلىرى بىلەن قوشما ئاخبارات ئىمزالاپ ۋە ئېلان قىلىپ، شاڭخەي ھەمكارلىق تەشكىلاتىنىڭ ئىقتىساد-سودا، تۆمۈريول، مېخانىزم قۇرۇلۇشى قاتارلىق كۆپ تۈرلۈك ھەمكارلىق ھۆججەتلىرى ۋە قارارلىرىنى تەستىقلىدى.

　　ۋۇ جېڭلۇڭ يىغىنغا قاتناشتى.

　　مەنبە: خەلق تورى