خەن جېڭ ياپونىيەنىڭ سابىق باش ۋەزىرى فۇكۇدا ياسىئو بىلەن كۆرۈشتى

　　دۆلەتنىڭ مۇئاۋىن رەئىسى خەن جېڭ 25-چېسلا بېيجىڭدا ياپونىيەنىڭ سابىق باش ۋەزىرى فۇكۇدا ياسىئو بىلەن كۆرۈشتى.

　　خەن جېڭ مۇنۇلارنى بىلدۈردى: بۇ يىل جۇڭگو-ياپونىيە تىنچلىق، دوستلۇق شەرتنامىسى ئىمزالانغانلىقىنىڭ 45 يىللىقى، جۇڭگو بىلەن ياپونىيەنىڭ تىنچ بىللە تۇرۇش، ئەۋلادمۇئەۋلاد دوستانە ئۆتۈشى ئىككى دۆلەت ۋە ئىككى دۆلەت خەلقىنىڭ تۈپ مەنپەئەتىگە ئۇيغۇن، ئاسىيا ھەتتا دۇنيادىمۇ مۇھىم ئەھمىيەتكە ئىگە. جۇڭگو-ياپونىيە ئەلئارا دوستلۇقىنىڭ ئاساسى چوڭقۇر، مەنپەئىتى چوڭقۇر يۇغۇرۇلغان، ئىككى تەرەپ ئالاقىلىشىش، ئالماشتۇرۇشنى يەنىمۇ كۈچەيتىپ، ھەرقايسى ساھەلەردىكى ئەمەلىي ھەمكارلىقنى چوڭقۇرلاشتۇرۇپ، ئۆزئارا ئۆگىنىش، ئۆزئارا ئۆرنەك ئېلىش، ئۆزئارا مەنپەئەت يەتكۈزۈپ ئورتاق پايدا ئېلىشنى ئىشقا ئاشۇرۇشى كېرەك. جۇڭگو فۇكۇدا ياسىئو ئەپەندى ۋە ياپونىيە مەدەنىيەت ساھەسىدىكى دوستانە زاتلارنىڭ جۇڭگو-ياپونىيە ئادىمىيەت ئالاقىسىنى ئىلگىرى سۈرۈش ئۈچۈن بوشاشماي تىرىشچانلىق كۆرسەتكەنلىكى ۋە مۇھىم تۆھپە قوشقانلىقىغا ئاپېرىن ئوقۇيدۇ. ئىككى تەرەپنىڭ ھەمكارلىقنى كۈچەيتىپ، ئىككى دۆلەت مۇناسىۋىتىنى ياخشىلاش ۋە راۋاجلاندۇرۇش، خەلقنىڭ دوستلۇق ھېسسىياتىنى كۈچەيتىشتە تېخىمۇ زور رول ئوينىشىنى ئۈمىد قىلىمەن.

　　فۇكۇدا ياسىئو مۇنۇلارنى بىلدۈردى: ياپونىيە بىلەن جۇڭگونىڭ دوستلۇق ئالاقىسى ئۇزاق تارىخقا ئىگە، رېئال مەنپەئەت ئالاقىسى قويۇق. ئادىمىيەت ئالاقىسىنى قانات يايدۇرۇش ئىككى دۆلەت خەلقىنىڭ ئۆز ئارا چۈشىنىشى ۋە ئىشىنىشىنى ئىلگىرى سۈرۈشكە پايدىلىق، ئورتاق تىرىشىپ، مەدەنىيەت ئالاقىسىنى ئۆز ئىچىگە ئالغان ھەرقايسى ساھەلەردىكى ھەمكارلىقنى داۋاملىق ئىلگىرى سۈرۈشنى خالايمىز.

　　مەنبە: خەلق تورى