شى جىنپىڭ: شەرەپلىك تارىخنى قەدىرلەپ، سىياسىي خىسلەتنى مەڭگۈ ساقلاپ، دۆلەتنى قۇدرەت تاپقۇزۇش ۋە ئارمىيەنى گۈللەندۈرۈشنى ئىلگىرى سۈرۈش ئۈچۈن قۇدرەتلىك ئىجابىي كۈچنى مۇجەسسەملەيلى

　　خەلق تورى ئۇيغۇرچە قانىلىنىڭ 10- دېكابىر بېيجىڭدىن بەرگەن تېلېگراممىسى: رەئىس شى جىنپىڭ ۋە مەركىزىي ھەربىي كومىتېتنىڭ تەستىقلىشى بىلەن، پۈتۈن ئارمىيە پېشقەدەم كادىرلار خىزمىتى خادىملىرى، ئىلغار كادىرلار دەم ئېلىش ئورنى، دەم ئېلىشقا، پېنسىيەگە چىققان ئىلغار كادىرلار، ئىلغار پېشقەدەم كادىر خىزمەتچىلەر قاتارلىقلارنى تەقدىرلەش تېلېۋىزىيە يىغىنى 9- چېسلا بېيجىڭدا ئېچىلدى. ج ك پ مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ مۇھىم يوليورۇق بەردى ۋە يىغىننىڭ ئېچىلغانلىقىنى قىزغىن تەبرىكلىدى، ھەربىيلىكتىن دەم ئېلىشقا، پېنسىيەگە چىققان پۈتۈن ئارمىيەدىكى پېشقەدەم كادىرلارغا ئالىي ئېھتىرام بىلدۈردى، پۈتۈن ئارمىيەدىكى پېشقەدەم كادىر خىزمەتچىلەردىن سەمىمىي ھال سورىدى.

　　شى جىنپىڭ مۇنۇلارنى تەكىتلىدى: ئارمىيىدىن دەم ئېلىشقا، پېنسىيىگە چىققان كادىرلار بولسا، پارتىيە رەھبەرلىكىدىكى ئىنقىلاب، قۇرۇلۇش، ئىسلاھات ئىشلىرى ئۈچۈن مۇھىم تۆھپە قوشتى، پارتىيە ۋە خەلق ئۇلارنى مەڭگۈ ئۇنتۇپ قالمايدۇ. مەن دەم ئېلىشقا، پېنسىيەگە چىققان كادىرلارنىڭ ئەسلىي مەقسەتنى ئۇنۇتماي، بۇرچنى ئەستە چىڭ ساقلاپ، شەرەپلىك تارىخنى قەدىرلەپ، سىياسىي خىسلىتىنى مەڭگۈ ساقلىشىنى ئۈمىد قىلىمەن. ھەر دەرىجىلىك پارتكوم، ئورگانلار ۋە پېشقەدەم كادىرلار خىزمىتى بىلەن شۇغۇللانغۇچىلار پارتىيەمىز ۋە ئارمىيەمىزنىڭ ئېسىل ئىستىلىغا ۋارىسلىق قىلىش، جۇڭخۇا مىللىتىنىڭ ئەنئەنىۋى گۈزەل ئەخلاقىنى نۇرلاندۇرۇش يۈكسەكلىكىدىن چىقىش قىلىپ، پېشقەدەملەرنى ھۆرمەتلەپ، پېشقەدەملەرگە كۆيۈنۈپ، ئۇلارغا پۈتۈن ۋۇجۇدى بىلەن مۇلازىمەت قىلىپ، ئارمىيەنىڭ پېشقەدەم كادىرلار خىزمىتىدە يېڭىلىق يارىتىش ۋە ئۇنى تەرەققىي قىلدۇرۇشقا ئۈزلۈكسىز تۈرتكە بولۇپ، دۆلەتنى قۇدرەت تاپقۇزۇش، ئارمىيەنى گۈللەندۈرۈشنى ئىلگىرى سۈرۈش ئۈچۈن قۇدرەتلىك ئىجابىي كۈچنى مۇجەسسەملىشى كېرەك.

　　كۆرۈپ بېكىتكۈچى: موللانىياز تۇنىياز

　　مەنبە: خەلق تورى