خەلق تورى ئۇيغۇرچە قانىلىنىڭ 30- ئاۋغۇست بېيجىڭدىن بەرگەن تېلېگراممىسى: 10-نۆۋەتلىك مەملىكەتلىك ۋەتەنگە قايتقان مۇھاجىرلار ۋە مۇھاجىرلار ئائىلە تاۋابىئاتلىرى قۇرۇلتىيى 8- ئاينىڭ 29- كۈنى چۈشتىن بۇرۇن بېيجىڭ خەلق سارىيىدا ئۆتكۈزۈلدى. شى جىنپىڭ، لى كېچياڭ، لى جەنشۇ، ۋاڭ ياڭ، ۋاڭ خۇنىڭ، خەن جېڭ، ۋاڭ چىشەن قۇرۇلتايغا قاتنىشىپ تەبرىكلىدى، جاۋ لېجى پارتىيە مەركىزىي كومىتېتىغا ۋاكالىتەن سۆز قىلدى.
جاۋ لېجى پارتىيە مەركىزىي كومىتېتىغا ۋاكالىتەن «يېڭى دەۋردە مۇھاجىرلارنىڭ كۈچىنى مۇجەسسەملەپ، مىللەتنى گۈللەندۈرۈشنىڭ يېڭى سەھىپىسىنى پۈتەيلى» دېگەن تېمىدا تەبرىك سۆز قىلدى. جاۋ لېجى ئالدى بىلەن قۇرۇلتاينىڭ ئېچىلغانلىقىنى قىزغىن تەبرىكلىدى، ۋەتەنگە قايتقان كەڭ مۇھاجىرلار ۋە مۇھاجىرلار ئائىلە تاۋابىئاتلىرى، چەت ئەلدىكى مۇھاجىر قېرىنداشلار ۋە مۇھاجىرلار بىرلەشمىسى خىزمەتچىلىرىدىن سەمىمىي ھال سورىدى.
جاۋ لېجى تەبرىك سۆزىدە مۇنداق دېدى: 9-قېتىملىق مەملىكەتلىك ۋەتەنگە قايتقان مۇھاجىرلار، مۇھاجىرلار ئائىلە تاۋابىئاتلىرى قۇرۇلتىيىدىن بۇيان، ھەر دەرىجىلىك مۇھاجىرلار بىرلەشمىسى تەشكىلاتلىرى «تۆت ئاڭ»نى مۇستەھكەم تۇرغۇزۇپ، ئاڭلىق ھالدا شى جىنپىڭنىڭ يېڭى دەۋر جۇڭگوچە سوتسىيالىزم ئىدىيەسىنى يېتەكچى قىلىپ، جاسارەت بىلەن ئىلگىرىلەپ، ھەقىقىي تۇتۇپ ئەمەلىي ئىشلەپ، مۇھاجىرلار بىرلەشمىسى ئىسلاھاتىنى چوڭقۇر ئىلگىرى سۈردى، تۈرلۈك خىزمەتلەردە يېڭى تەرەققىياتنى ئىشقا ئاشۇردى، مۇھاجىرلار بىرلەشمىسى كادىرلىرى يېڭى قىياپىتىنى نامايان قىلدى. ۋەتەنگە قايتقان كەڭ مۇھاجىرلار، مۇھاجىرلار ئائىلە تاۋابىئاتلىرى ۋە چەت ئەلدىكى مۇھاجىر قېرىنداشلار باشتىن-ئاخىر ۋەتىنىمىز بىلەن ھەمنەپەس ۋە تەقدىرداش بولۇپ، ئۆزگىچە ئەۋزەللىكىنى جارى قىلدۇرۇپ، پائال تۆھپە قوشتى، ۋەتەننى ۋە يۇرتىنى سۆيۈشتەك پاك قەلبى، بوشاشماي كۈرەش قىلىش روھى ۋە ئوچۇق، ئۆزىگە ئىشىنىدىغان خەلقئارا ئوبرازىنى نامايان قىلدى.
كۆرۈپ بېكىتكۈچى: موللانىياز تۇنىياز
مەنبە: خەلق تورى