خەلق تورى ئۇيغۇرچە قانىلىنىڭ 9-يانۋار بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 8-يانۋار دىياۋيۈتەي دۆلەت مېھمانخانىسىدا ئېلىمىزگە دۆلەت ئىشلىرى زىيارىتىگە كەلگەن فىرانسىيە زۇڭتۇڭى ماكرون بىلەن كۆرۈشتى.
قىش پەسلىدىكى دىياۋيۈتەي شەپەق نۇرىغا چۆمۈلگەن بولۇپ، گۈزەل، پاكىز، شۇنداقلا ئادەتتىن تاشقىرى جىمجىت ئىدى. ئىككى دۆلەت رەھبىرى سەمىمىي، دوستانە كەيپىياتتا چوڭقۇر سۆھبەتلەشتى. شى جىنپىڭ مۇنداق دېدى: جۇڭگو بىلەن فىرانسىيە شانلىق تارىخىي مەدەنىيەتكە ئىگە دۆلەتلەر. زۇڭتۇڭ ماكرون جاناپلىرى يېڭى يىل كىرىشى بىلەنلا ئاسىيادىكى تۇنجى زىيارىتىدە جۇڭگوغا كېلىپ، جۇڭگو-فىرانسىيە مۇناسىۋىتىگە يۈكسەك ئېتىبار بەرگەنلىكىنى نامايان قىلدى. فىرانسىيە يېڭى جۇڭگو بىلەن تۇنجى بولۇپ رەسمىي دىپلوماتىك مۇناسىۋەت ئورناتقان غەربتىكى چوڭ دۆلەت. 1964-يىلى رەئىس ماۋ زېدۇڭ بىلەن گېنېرال دېگول ئاجايىپ سىياسىي يىراقنى كۆرەرلىك بىلەن ئىككى دۆلەتنىڭ دىپلوماتىك مۇناسىۋەت ئورنىتىشى توغرىسىدا تارىخىي قارار چىقىرىپ، ئەينى ۋاقىتتىكى دۇنيا ۋەزىيىتىگە تەسىر كۆرسەتكەنىدى، بۇ شۇنداقلا ھەم بۈگۈنكى دۇنيانىڭ تەرەققىياتىدىمۇ مۇھىم ئەھمىيەتكە ئىگە. يېڭى دەۋردە بىز داۋاملىق تارىخىي مەسئۇلىياتچانلىق روھى بىلەن توغرا يولدا مېڭىشتا چىڭ تۇرۇپ، جۇڭگو-فىرانسىيە مۇناسىۋىتىنى تېخىمۇ گۈزەل كەلگۈسىگە يۈزلەندۈرۈشىمىز كېرەك.
شىنجاڭ گېزىتى تەرجىمىسى
مەنبە: خەلق تورى