خەلق تورى ئۇيغۇرچە قانىلىنىڭ 24-نويابىر بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 11-ئاينىڭ 22-كۈنى سانتىياگودا چىلى زۇڭتۇڭى باچېلېت بىلەن سۆھبەتلەشتى. ئىككى دۆلەت باشلىقلىرى جۇڭگو-چىلى مۇناسىۋىتىنىڭ تەرەققىياتىغا ئىجابىي باھا بېرىپ، ئىككى دۆلەت مۇناسىۋىتىنىڭ ئورنىنى جۇڭگو – چىلى ئومۇميۈزلۈك ئىستراتېگىيەلىك ھەمراھلىق مۇناسىۋىتى دەرىجىسىگە كۆتۈرۈپ، جۇڭگو – چىلى مۇناسىۋىتىنىڭ تېخىمۇ زور تەرەققىياتىنى ئىلگىرى سۈرۈشنى بىردەك قارار قىلدى.
شى جىنپىڭ مۇنداق دەپ كۆرسەتتى: لاتىن ئامېرىكىسىدا «ھەقىقىي دوست دۇنيانىڭ ئۇ قېتىدا تۇرۇپمۇ كۆڭلىڭىزدىكىنى تاپالايدۇ» دېگەن ماقال بار. جۇڭگو بىلەن چىلى دەل مۇشۇنداق ياخشى دوست. ئىككى دۆلەتنىڭ ئارىلىقى يىراق بولسىمۇ، ئوي-پىكىرلىرى بىر يەردىن چىقىدىغان بولۇپ، جۇڭگو-لاتىن ئامېرىكىسى مۇناسىۋىتى تارىخىدا كۆپ تۈردە «بىرىنچى»لىكنى ياراتتى. ئىككى تەرەپ سىياسىي جەھەتتە بىر-بىرىگە يۈكسەك دەرىجىدە ئىشىنىپ، ئىقتىسادىي جەھەتتە ئۆزئارا مەنپەئەت يەتكۈزۈپ، ئورتاق پايدا ئالدى، كۆپ تەرەپلىك ھەمكارلىقى كۈندىن-كۈنگە قويۇقلاشقاچقا، جۇڭگو-چىلى مۇناسىۋىتى پىشىپ يېتىلىپ مۇقىملاشقان يېڭى باسقۇچقا قەدەم قويدى. جۇڭگو بىلەن چىلى تەرەققىياتنىڭ ئاچقۇچلۇق باسقۇچىدا تۇرۇۋاتىدۇ، ئىسلاھاتنى چوڭقۇرلاشتۇرۇش ئارقىلىق تەرەققىياتنى ئىلگىرى سۈرۈش ئۈچۈن تىرىشىۋاتىدۇ. بىز جۇڭگو-چىلى مۇناسىۋىتىنىڭ يېڭى باشلىنىش نۇقتىسىدا تۇرۇپ، پائال ئىلگىرىلەپ، جۇڭگو-چىلى مۇناسىۋىتىنى جۇڭگو-لاتىن ئامېرىكىسى مۇناسىۋىتىدە ئالدىنقى ئورۇنغا قويۇپ راۋاجلاندۇرۇشىمىز كېرەك.
شىنجاڭ گېزىتى تەرجىمىسى
مەنبە: خەلق تورى