خەلق تورى ئۇيغۇرچە قانىلىنىڭ 23-ئىيۇن بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 22-ئىيۇن تاشكەنت كۆكساراي دۆلەت مېھمانسارىيىدا ئۆزبېكىستان زۇڭتۇڭى كەرىموف بىلەن سۆھبەتلەشتى. ئىككى دۆلەت باشلىقلىرى جۇڭگو-ئۆزبېكىستاننىڭ ئەنئەنىۋى دوستلۇقى ۋە ئىككى تەرەپ مۇناسىۋىتىنىڭ تەرەققىياتىدا مول نەتىجىلەر قولغا كەلتۈرۈلگەنلىكىگە يۈكسەك باھا بېرىپ، جۇڭگو بىلەن ئۆزبېكىستاننىڭ ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورنىتىپ، ئىككى دۆلەت ھەمكارلىقىنى ئىلگىرى سۈرۈدىغانلىقىنى بىردەك قارار قىلدى.
شى جىنپىڭ مۇنۇلارنى تەكىتلىدى: جۇڭگو-ئۆزبېكىستان 2012-يىلى ئىستراتېگىيەلىك ھەمراھلىق مۇناسىۋىتى ئورناتقاندىن بۇيان، ئىككى تەرەپنىڭ ھەمكارلىقى تېز تەرەققىي قىلىپ، سىياسىيدا ئۆز ئارا ئىشىنىپ، ئۆز ئارا مەنپەئەت يەتكۈزۈپ ھەمكارلىشىپ، ئىستراتېگىيەنى ماس، ئومۇميۈزلۈك ئىلگىرى سۈرۈپ، مول نەتىجىلەرگە ئېرىشتى. جۇڭگو، ئۆزبېكىستان بىلەن زىچ ماسلىشىپ، ئىككى دۆلەت مۇناسىۋىتىنىڭ تەرەققىياتىدا تېخىمۇ كۆپ ئەمەلىي نەتىجىلەرنى قولغا كەلتۈرۈشكە تۈرتكە بولۇشنى خالايدۇ. ئىككى تەرەپ بىر-بىرىنى قوللاشنى كۈچەيتىپ، بىر-بىرىنىڭ يادرولۇق مەنپەئىتىنى قوغدىشى كېرەك. ئىقتىساد، سودا، ئىشلەپچىقىرىش ئىقتىدارى، ئېنېرگىيە، يېزا ئىگىلىك، پۇل مۇئامىلە، ئۇل ئەسلىھە قاتارلىق ساھەلەردىكى كونكرېت ھەمكارلىقنى ئومۇميۈزلۈك چوڭقۇرلاشتۇرۇپ، ئىككى دۆلەتنىڭ ئورتاق تەرەققىياتىنى ئىلگىرى سۈرۈپ، تېخىمۇ كۆپ كونكرېت ھەمكارلىق نەتىجىلىرى بىلەن ئومۇميۈزلۈك ئىستراتېگىيەلىك ھەمراھلىق مۇناسىۋىتىنىڭ مەزمۇنىنى بېيىتىشى كېرەك. بىخەتەرلىك ھەمكارلىشىش سەۋىيەسىنى ئۆستۈرۈپ، رايونلارنىڭ تىنچ، مۇقىملىقىنى قوغدىشى كېرەك. ئادەمىيەت ئالاقىسىنى كۈچەيتىپ، جۇڭگو-ئۆزبېكىستاننىڭ ئەلئارا دوستلۇقىنى كۈچەيتىشى كېرەك. خەلقئارا ئىشلاردىكى ماسلىشىشنى كۈچەيتىپ، ئىستراتېگىيەلىك ھەمكارلىق سەۋىيەسىنى ئۆستۈرۈشى كېرەك. (شىنجاڭ گېزىتى تەرجىمىسى)
مەنبە: خەلق تورى