دۆلەت رەئىسى شى جىنپىڭ تۈنۈگۈن خەلق سارىيىدا بېنگال زۇڭلىسى ھاسىنا بىلەن كۆرۈشتى.
شى جىنپىڭ مۇنۇلارنى بىلدۈردى: جۇڭگو جۇڭگو-بىنگال مۇناسىۋىتىگە يۈكسەك ئەھمىيەت بېرىدۇ، بېنگالنى جەنۇبىي ئاسىيا ۋە ھىندى ئوكيان رايونىدىكى مۇھىم تەرەققىيات ۋە ھەمكارلىق شېرىكى دەپ قارايدۇ، ئىككى دۆلەت مۇناسىۋىتىنىڭ ئىستىقپالا پارلاق. كېلەر يىلى ئىككى دۆلەت دىپلوماتىك مۇناسىۋەت ئورناتقانلىقىنىڭ 40 يىللىقى، ئىككى تەرەپ يۇقۇرى قاتلاملىقلار ئالاقىسىنى ساقلاپ، كۆپ خىل شەكىللىك تەبرىكلەش پائالىيەتلىرىنى ئۆتكۈزۈپ، ھەرقايسى سەھەلەردىكى ئەمەلىي ھەمكارلىقنى كېڭەيتىپ، جۇڭگو بىلەن بېنگالنىڭ تېخىمۇ يېقىن بولغان ئومۇميۈزلۈك ھەمكارلىق، شېرىكلىك مۇناسىۋىتىنىڭ يېڭى پەللىگە ئۆرلىشىگە تۈرتكە بولۇشى كېرەك. جۇڭگو بېنگالنىڭ ئۆز دۆلىتىنىڭ ئەمەلىيىتىگە ماس كېلىدىغان تەرەققىيات يولىدا مېڭىشىنى قوللايدۇ، يېزا-ئىگىلىكى قاتارلىق ساھەلەردە بېنگال بىلەن تېخنىكا ۋە تەجرىبىلەردىن ئورتاق بەھرىمان بولۇپ، بېنگالنىڭ نامراتلارنى ئازايتىشى ۋە تەرەققىي قىلىشىغا ياردەم بېرىشنى خالايدۇ. بېنگال دېڭىز يىپەك يولىدىكى مۇھىم دۆلەت. جۇڭگو بېنگالنىڭ يىپەك يولى ئىقتىساد بەلۋىغى قۇرۇشقا ۋە 21-ئەسىر دېڭىز يىپەك يولى ھەمكارلىقى تەشەببۇسىغا ئاكتىپ قاتنىشىشىنى، شۇنىڭ بىلەن بىر ۋاقىتتا، بېنگال، جۇڭگو، ھىندىستان، بېرما ئىقتىساد كارىدورى قۇرۇلۇشىغا قاتنىشىپ، مەنپەئەت ئورتاق گەۋدىسى قۇرۇپ، ئىككى دۆلەت ۋە مەزكۇر رايون خەلقىگە بەخت يارىتىشىنى قارشى ئالىدۇ. ئىككى تەرەپ يەنە مۇھىم مەسىلىلەردىكى چۈشىنىش ۋە ماسلىشىشنى كۈچەيتىپ، تىنچلىقنى قوغداش، تېررورلۇققا قارشى تۇرۇش قاتارلىق ساھەلەردىكى ھەمكارلىقنى كۈچەيتىشى كېرەك.
ھاسىنا جۇڭگونىڭ ئۇزۇندىن بۇيان بېنگالنى قوللاپ كەلگەنلىكى ۋە ياردەم قىلىپ كەلگەنلىكىگە رەھمەت ئېيتتى. ئۇ مۇنداق دېدى: ھازىر بېنگال نامراتلىقتىن قۇتۇلۇپ، 2021-يىلىغا بارغاندا، ئوتتۇراھال كىرىملىك دۆلەت قۇرۇش نىشانىنى ئىشقا ئاشۇرۇش ئۈچۈن تىرىشماقتا. بېنگال جۇڭگونىڭ تەرەققىي قىلىشتىكى مۇۋەپپەقىيەتلىك تەجرىبىلىرىنى ئەينەك قىلىپ، جۇڭگو بىلەن ھەمكارلىقنى كۈچەيتىشنى خالايدۇ. جۇڭگونىڭ يادرولۇق مەنپەئەتىگە چېتىلىدىغان ۋە كۆڭۈل بۆلىدىغان زور مەسىلىلەردە داۋاملىق جۇڭگونى قەتئىي قوللايدۇ. بېنگال جۇڭگو ئوتتۇرىغا قويغان «بىر بەلباغ، بىر يول» قۇرۇش مۇھىم تەشەببۇسىغا قوشىلىدۇ. بېنگال، جۇڭگو، ھىندىستان، بېرما ئىقتىساد كارىدورى جەنۇبىي ئاسىيا رايونىنىڭ ئىقتىسادىي تەرەققىياتىدا مۇھىم ئەھمىيەتكە ئىگە، بېنگال بۇنىڭغا ئاكتىپ قاتنىشىشنى خالايدۇ.