شىنخۇا ئاگېنتلىقىنىڭ 23-ئۆكتەبىر بېيجىڭدىن بەرگەن خەۋىرى: دۆلەت رەئىسى شى جىنپىڭ 23-چېسلا دياۋيۈتەي دۆلەت مېھمانخانىسىدا ھىندىستان زۇڭلىسى سىنگى بىلەن كۆرۈشتى. شى جىنپىڭ سىنگى ئارقىلىق زۇڭتۇڭ كامادا مۇقەرجى ۋە دۆلەت كونگرىسى پارتىيەسىنىڭ رەئىسى سونىيا گەندىگە سەمىمىي سالام يوللىدى. شى جىنپىڭ مۇنداق دېدى: ئالىيلىرى ھىندىستاننىڭ نوپۇزلۇق سىياسىيونى، جۇڭگو خەلقىنىڭ قەدىناس دوستى، جۇڭگو-ھىندىستان مۇناسىۋىتىنىڭ تەرەققىياتى ئۈچۈن مۇھىم تۆھپە قوشتىلا. جۇڭگو بىلەن ھىندىستان ئۇزاق تارىخقا ئىگە قەدىمىي مەدەنىيەتلىك دۆلەت، شۇنداقلا ھازىرقى دۇنيادىكى ئەڭ چوڭ تەرەققىي قىلىۋاتقان دۆلەتلەر. ئىككى دۆلەت نوپۇسىنىڭ يىغىندىسى دۇنيا نوپۇسىنىڭ ئۈچتىن بىرىدىن ئېشىپ كېتىدۇ. جۇڭگو-ھىندىستان مۇناسىۋىتى ئىككى تەرەپ كاتىگورىيەسىدىن ھالقىپ، دۇنياۋى ئىستىراتېگىيەلىك ئەھمىيەتكە ئىگە بولدى. مەن زۇڭلى ئەپەندىنىڭ دۇنيادا جۇڭگو بىلەن ھىندىستان ئورتاق تەرەققىي قىلىشىغا يېتەرلىك ئىمكانىيەت بار، دېگەن سۆزىنى قوللايمەن. مېنىڭچە، دۇنيامۇ جۇڭگو بىلەن ھىندىستاننىڭ ئورتاق تەرەققىياتىغا مۇھتاج. ھازىرقى دۇنيادىكى ئەڭ مۇھىم ئىككى تەرەپ مۇناسىۋەتلىرىنىڭ بىرى بولغا جۇڭگو-ھىندىستان مۇناسىۋىتى ئىككى دۆلەت خەلقىگە بەخت يارىتىپلا قالماي، ئاسىيا ھەتتا دۇنيانىڭ كەلگۈسىگە چوڭقۇر تەسىر كۆرسىتىدۇ. (چيەن تۇڭ خەۋىرى؛ جۇڭگو مىللەتلەر تەرجىمە ئىدارىسى تەرجىمىسى)
مەنبە: خەلق تورى