باش بەت قىلىڭ بەت ساقلاڭ خەت ساندۇقى ئالاقىلىشىڭ بىز
  • مۇھىم
  • مەملىكەت
  • شىنجاڭ
  • خەلقئارا

ئەڭ يېڭى سۈرەتلەر



ئالبوم





خەلق تورى>>مۇھىم خەۋەرلەر

شى جىنپىڭ رۇسىيە پىرېزىدېنتى پۇتىن بىلەن سۆھبەتلەشتى

2013.03.25 10:00         مەنبە: جۇڭگو ئۇيغۇرچە رادىيو تورى

پرىنتېرلاش خەت چوڭ-كىچىكلىكى

دۆلەت رەئىسى شى جىنپىڭ تۈنۈگۈن موسكۋادىكى كېرمىل سارىيىدا رۇسىيە پىرېزىدېنتى پۇتىن بىلەن سۆھبەتلەشتى.
  جۇڭگو ئۇيغۇرچە رادىيو تورى 23-مارت بېيجىڭ خەۋىرى: دۆلەت رەئىسى شى جىنپىڭ تۈنۈگۈن موسكۋادىكى كېرمىل سارىيىدا رۇسىيە پىرېزىدېنتى پۇتىن بىلەن سۆھبەتلەشتى، ئىككى دۆلەت باشلىقلىرى جۇڭگو رۇسىيە مۇناسىۋىتى ۋە زور خەلقئارالىق، رايون مەسىلىلىرىدە چوڭقۇر پىكىر ئالماشتۇردى.

  پۇتىن شى جىنپىڭنىڭ رۇسىيەدە زىيارەتتە بولغانلىقىنى قىزغىن قارشى ئالدى، پۇتىن مۇنۇلارنى بىلدۈردى: رەئىس شى جىنپىڭنىڭ تۇنجى بولۇپ رۇسىيەدە زىيارەتتە بولۇشى ئىككى تەرەپنىڭ رۇسىيە جۇڭگو مۇناسىۋىتىگە يۈكسەك ئەھمىيەت بەرگەنلىكى ۋە بۇ مۇناسىۋەتنىڭ ئالاھىدە خاراكتېرى ۋە ئىستراتېگىيەلىك ئەھمىيىتىنى كۆرسىتىپ بەردى، بۇ تارىخىي ئەھمىيەتكە ئىگە بىر قېتىملىق زىيارەت، ئىشىنىمەنكى بۇ قېتىمقى زىيارەت چوقۇم مول مۇۋەپپىقىيەتلىك بولۇپ، رۇسىيە بىلەن جۇڭگونىڭ ئومۇميۈزلۈك ئىستراتېگىيەلىك شېرىكلىك مۇناسىۋىتىنىڭ تەرەققىياتىنى كۈچلۈك ئىلگىرى سۈرىدۇ.

  شى جىنپىڭ مۇنۇلارنى تەكىتلىدى: جۇڭگو بىلەن رۇسىيە ئۆزئارا ئەڭ ئاساسلىق، ئەڭ مۇھىم ئىستراتېگىيەلىك ھەمكارلىق شېرىكلىرى، جۇڭگو بىلەن رۇسىيەنىڭ ئومۇميۈزلۈك ئىستراتېگىيەلىك شېرىكلىك مۇناسىۋەتنى چوڭقۇرلاشتۇرۇشى ئىككى دۆلەتنىڭ دىپلوماتىيە ئومۇملۇقى ۋە تاشقى مۇناسىۋىتىدە ئىستراتېگىيەلىك ئورۇنغا ئىگە، جۇڭگو بىلەن رۇسىيە مۇرەككەپ، ئۆزگىرىشچان خەلقئارا ۋەزىيەت ۋە يەنىلا كەسكىن بولۇۋاتقان خەلقئارا ئىقتىسادىي مۇھىتتا كۆپ تەرەپلىك ئىستراتېگىيەلىك ھەمكارلىقىنى تېخىمۇ كۈچەيتىشى كېرەك، ئىككى تەرەپ ئۆزئارا سىياسىي جەھەتتىن قوللاشنى نۇقتىلىق كۈچەيتىپ، قارشى تەرەپنىڭ ئىگىلىك ھوقۇقى، بىخەتەرلىكى، تەرەققىيات مەنپەئەتىنى قوغداش تىرىشچانلىقىنى، قارشى تەرەپنىڭ ئۆز دۆلىتىنىڭ ئەھۋالىغا ئۇيغۇن كېلىدىغان تەرەققىيات يولىدا مېڭىشىنى، قارشى تەرەپنىڭ تەرەققىي قىلىپ گۈللىنىشىنى قەتئىي قوللىشى، ئەمەلىي ھەمكارلىقنى ئومۇميۈزلۈك كېڭەيتىپ، ئىككى دۆلەتنىڭ يۇقىرى سەۋىيەلىك سىياسىي مۇناسىۋىتىدىكى ئۈستۈنلىكنى ئەمەلىي ئۈنۈمگە ئايلاندۇرۇپ، ئورتاق تەرەققىياتنى ئىشقا ئاشۇرۇشى، خەلقئارا ۋە رايون ئىشلىرىدا يېقىندىن ماسلىشىپ، ماسلاشتۇرۇپ، ئىككى دۆلەتنىڭ ئورتاق ئىستراتېگىيەلىك بىخەتەرلىكىنى، بىرلەشكەن دۆلەتلەر تەشكىلاتى نىزامنامىسىدىكى باش مەقسەت، پىرىنسىپ، خەلقئارا مۇناسىۋەتنىڭ ئاساسىي مىزانىنى قەتئىي قوغداپ، ئىككىنچى دۇنيا ئۇرۇشى نەتىجىلىرى ۋە ئۇرۇشتىن كېيىنكى خەلقئارا تەرتىپنى، خەلقئارانىڭ ئادىللىقى، ھەققانىيلىقىنى قوغداپ، دۇنيانىڭ تىنچلىقى، مۇقىملىقى، گۈللىنىشىنى ئىلگىرى سۈرۈشى كېرەك.

  پۇتىن مۇنۇلارنى بىلدۈردى: ئەمەلىيەت رۇسىيە بىلەن جۇڭگونىڭ ئومۇميۈزلۈك ئىستراتېگىيەلىك شېرىكلىك مۇناسىۋىتىنىڭ ئىككى دۆلەت خەلقىنىڭ مەنپەئەتىگە ئۇيغۇن ئىكەنلىكى، شۇنداقلا ئۇنىڭ بۈگۈنكى خەلقئارا مۇناسىۋەتنىڭ مۇھىم ئىجابىي ئامىلىغا ئايلانغانلىقىنى ئىسپاتلىدى، رۇسىيە ئىككى دۆلەتنىڭ ئىستراتېگىيەلىك ھەمكارلىقىنى كۈچەيتىشنى خالايدۇ.

  ئىككى تەرەپ مۇنداق دەپ قارىدى: جۇڭگو بىلەن رۇسىيەنىڭ زور كۆلەمدە ئىقتىسادىي ھەمكارلىق ئېلىپ بارىدىغان پەيتى ۋە شارائىتى پىشىپ يېتىلدى، ئومۇملۇق ۋە يىراق كەلگۈسىدىن چىقىش قىلىپ، ئۆزئارا تولۇقلاش ئۈستۈنلىكى ۋە تەرەققىيات يوشۇرۇن كۈچىنى تولۇق قېزىپ، ئىقتىساد سودا ھەمكارلىقىغا ئەھمىيەت بېرىپ ۋە كۈچەيتىپ، ھەرقايسىسىنىڭ ئىقتىسادىي ئەمەلىي كۈچى ۋە خەلقئارا رىقابەت كۈچىنى بىرلىكتە ئاشۇرۇش، ئىككى دۆلەت ھۆكۈمەتلىرى ئارىسى ۋە ھەرقايسى تارماقلار، ھەرقايسى ساھەلەردىكى ھەمكارلىق مېخانىزمىنىڭ رولىنى تولۇق جارى قىلدۇرۇپ، ئىستراتېگىيەلىك چوڭ تۈرلەردە پائال ھەمكارلىشىش كېرەك.

  ئىككى تەرەپ مۇنداق دەپ قارىدى: ئىككى تەرەپ نېفىت بىلەن تەمىنلەشنى كۆپەيتىش، تەبىئىي گاز تۇرۇبا يولى ياساش، جۇڭگو رۇسىيەدىن سۇيۇقلاندۇرۇلغان تەبىئىي گاز ئىمپورت قىلىش، مەبلەغ جەھەتتە شېرىكلىشىپ نېفىت چەككىلەش زاۋۇتى قۇرۇش قاتارلىقلاردا ھاسىل قىلىنغان ئورتاق تونۇشنى پائال ئەمەلىيلەشتۈرىدۇ، يادرو ئېنېرگىيەسى، ئېلېكتىر كۈچى، كۆمۈر قاتارلىق ساھەلەردىكى ھەمكارلىقىنى كېڭەيتىدۇ.

  ئىككى تەرەپ ئىككى دۆلەتنىڭ يەرلىكلەر ھەمكارلىقىنى بىرتۇتاش پىلانلاپ ۋە ماسلاشتۇرۇپ، چېگرا ھالقىغان تۆمۈر يول، تاشيول، كۆۋرۈك قاتارلىق قۇرۇلۇشلارنى ئىلگىرى سۈرۈپ، ئېكولوگىيەلىك مۇھىت، چېگرا ھالقىغان سۇ بايلىقىنى قوغداش قاتارلىق جەھەتلەردىكى ھەمكارلىقنى كۈچەيتىشنى قارار قىلدى.

  ئىككى تەرەپ ئادىمىيەت ساھەسىدە ياشلار ئالماشتۇرۇشىغا ئەھمىيەت بېرىدىغانلىقى، ئىككى دۆلەت ئالىي مەكتەپلەر ئالماشتۇرۇشىغا مەدەت بېرىدىغانلىقى، ئۆزئارا ئەۋەتىدىغان ئوقۇغۇچىلار سانىنى كۆپەيتىدىغانلىقى، 2014- ۋە 2015-يىلى ئۆزئارا جۇڭگو رۇسىيە ياشلار دوستلۇق ئالماشتۇرۇشى يىلى ئۆتكۈزىدىغانلىقىنى بىلدۈردى. ئىككى تەرەپ يەنە ساياھەت يىلى پائالىيىتىنى بىرلىكتە ئۆتكۈزىدۇ، سەھىيە، داۋالاش، دورا قاتارلىق ساھەلەردىكى ھەمكارلىقنى كۈچەيتىدۇ، جۇڭگو رۇسىيەنىڭ جۇڭگو كومپارتىيەسى 16-قۇرۇلتىيى ئېچىلغان خارابىنى رېمونت قىلىش ۋە قوغداش خىزمىتىنى قوللىغانلىقىغا رەھمەت ئېيتتى، جۇڭگو رۇسىيەنىڭ يېكاتېرىنبۇرگ شەھىرىنىڭ 2020-يىللىق دۇنيا كۆرگەزمىسى ئۆتكۈزۈشنى ئىلتىماس قىلىشىنى قوللايدۇ. ئىككى تەرەپ بىرلەشكەن دۆلەتلەر تەشكىلاتى، شاڭخەي ھەمكارلىق تەشكىلاتى، ئالتۇن كېسەك دۆلەتلىرى قاتارلىق رامكا ئىچىدىكى ھەمكارلىقنى قويۇقلاشتۇرىدۇ، ئاسىيا تىنچ ئوكيان ئىشلىرى، چاۋشيەن يېرىم ئارىلى ۋە غەربىي ئاسىيا، شىمالىي ئافرىقا ۋەزىيىتىدە ئالاقە ۋە ماسلىشىشنى كۈچەيتىپ، خەلقئارا مۇناسىۋەتنىڭ دېموكراتلىشىشىنى بىرلىكتە ئىلگىرى سۈرۈپ، دۇنيانىڭ تىنچلىقى، تەرەققىياتىنى قوغدايدۇ. ئىككى تەرەپ « جۇڭگو بىلەن رۇسىيەنىڭ ئىناق قوشنىدارلىق دوستلۇق ھەمكارلىق شەرتنامىسىنى يولغا قويۇشنىڭ 2013-يىلدىن 2016-يىلغىچە بولغان پىروگراممىسى»نى تەستىقلىدى.

  سۆھبەتتىن كېيىن ئىككى دۆلەت باشلىقلىرى«جۇڭخۇا خەلق جۇمھۇرىيىتى بىلەن رۇسىيە فېدراتسىيەسىنىڭ ھەمكارلىشىپ ئورتاق غەلبە قىلىش، ئومۇميۈزلۈك ئىستراتېگىيەلىك ھەمكارلىق، شېرىكلىك مۇناسىۋەتنى چوڭقۇرلاشتۇرۇش ھەققىدىكى بىرلەشمە بايانات»قا بىرلىكتە ئىمزا قويدى، شۇنداقلا ئىككى دۆلەت ھۆكۈمەتلىرى ۋە كارخانىلىرى ئارىسىدىكى كۆپ تۈرلۈك ھەمكارلىق ھۆججەتلىرىگە ئىمزا قويۇش مۇراسىمىغا شاھىد بولدى، بۇ ھۆججەتلەر خادىملارنىڭ ئالاقىسىغا قولايلىق يارىتىش، قانۇنسىز كۆچمەنلەرگە زەربە بېرىش، ئېنېرگىيە، ئېكولوگىيەلىك مۇھىتنى قوغداش، ئادىمىيەت، يەرلىكلەر ھەمكارلىقى، پۇل مۇئامىلە، مەبلەغ سېلىش، ئاساسىي مۇئەسسەسە قۇرۇلۇشى قاتارلىق ساھەلەرگە مۇناسىۋەتلىك.

  سۆھبەتتىن ئىلگىرى شى جىنپىڭ پۇتىن كېرمىل سارىيىدا ئۆز شەرىپىگە ئۆتكۈزگەن داغدۇغىلىق قارشى ئېلىش مۇراسىمىغا قاتناشتى.

  شۇ كۈنى شى جىنپىڭ يەنە رۇسىيەدىكى نامسىز قەھرىمانلار قەبرىسىگە گۈلچەمبىرەك قويدى.

مەسئۇل مۇھەررىر : قەدىرىيە